SIGER: J10-laget vann begge kampane sine søndag. Mot Bjarg forsvarte Hedvig Klemmetsby (t.v.), Iselin Nilsen (t.h.) og dei andre Tysnes-jentene seg bra.
SIGER: J10-laget vann begge kampane sine søndag. Mot Bjarg forsvarte Hedvig Klemmetsby (t.v.), Iselin Nilsen (t.h.) og dei andre Tysnes-jentene seg bra.

– Det var ingen som trudde me skulle vinna

J10-laget låg under med sju mål mot Bjarg, men snudde til siger.
Publisert 08.01.2019 kl. 07.01. Oppdatert kl. 11.46.

– Eg brølte for fullt då me sette inn det avgjerande målet, seier ei nøgd Anna Gaugstad Birkeland.

Verken ho eller dei andre jentene på J10-laget til Tysnes IL klarte å halda gleda tilbake då dei avgjorde kampen mot Bjarg i Tysneshallen søndag.


Hamna under

Det vart ein særs spennande kamp mot Bjarg, sjølv om det undervegs ikkje såg ut til å verta altfor nervepirrande.

Tidlegare på dagen hadde Tysnes-jentene slått Fitjar med siffera 20–2, men det var ein langt tøffare motstandar som venta seinare på dagen. Allereie etter fem minutt spel hadde Bjarg fått inn tre mål, medan Tysnes endå ikkje hadde fått ballen i nettet.

Fyrste omgang vart i sjansar og spel relativt jamnspelt, men heimelaget sleit med å scora på ei svært solid Bjarg-målvakt. Til pause var stillinga 1–5.

LES OGSÅ: Tredje siger på rad


Bjarg auka leiinga

Starten av andre omgang fortsette som starten av fyrste, og bortelaget fekk inn tre raske mål. På stillinga 1–8 trudde dei fleste kampen var avgjort.

– Det var ingen som trudde me skulle vinna då me låg under med sju mål, seier Anna.

Ho var sjølv ekstra motivert for å ta sigeren mot Bjarg.

– Det er dette laget eg sjølv spelte for då eg budde i by’n, så denne kampen hadde eg ordentleg lyst til å vinna.


Kom i kampmodus

Tysnesingane fekk etter kvart inn nokre mål, og håpet vart tent hos jentene.

– Me kom i kampmodus, seier Hedvig Klemmetsby.

Jentene fann ut kva som måtte til, og lukkast med planane. Dei skrytte mykje av kvarandre etter matchen.

– Isarlin (Nødland, journ. anm) har nokre kraftige skot, og ho scora mange mål i andre omgang. Eg og Iselin (Nilsen, journ.anm) er ikkje like høge som Bjarg-spelarane, så me berre dukka under alle saman. I tillegg fekk me beskjed i pausen om å bruka vingane våre meir, og det fekk me til, seier Anna i sin analyse.

LES OGSÅ: I Sportsåret som gjekk


Snudde kampen

Sakte men sikkert tok heimelaget innpå Bjarg, og med tre minutt igjen på klokka stod det plutseleg 10–10 på resultattavla.

Dei siste minutta vart nervepirrande. Fyrst gjekk Bjarg på ny opp i leiinga til 10–11, men Tysnes utlikna. Så var det heimelaget sin tur til å ta leiinga, og med under eitt minutt igjen, stod det 12–11.

Dei tilreisande frå Bergen fekk eit par store sjansar i sluttminuttet, men det var Tysnes som kontra inn det siste målet i siste sekund av kampen. Då sluttsignalet lydde stod det 13–11 på tavla, og det vart store jubelscenar då spelarane sprang mot trenar Catrine Nilsen for å feira.

– Me kjente at me skulle vinna dette, fortel Isarlin.


Kjekk kamp å vinna

– Dette var ein lagsiger, seier Anna.

Ho fortel at alle var med og bidrog i opphentinga. Tysnes viste mykje godt spel mot eit godt Bjarg-lag, og Tysnes-målvaktene Isarlin og Hedvig, som stod i mål kvar sin omgang, hadde begge mange redningar.

Av dei to kampane laget spelte søndag, enda det med to sigrar, men det var den siste sigeren som smakte best.

– Det er mykje kjekkare å vinna ein slik kamp som denne, enn då me vann 20–2 tidlegare i dag, seier Anna.

– Det er gøyare når det er jamnt, skyt Hedvig inn.

LES OGSÅ: Jenter 15 tapte med eitt mål


Stolt trenar

Det er Margrete Klemmetsby som er hovudtrenar for laget, men det var Catrine Nilsen som leia jentene søndag, slik ho ofte gjer når det er kampar.

– Dette vart litt for spennande, fortel ho etter kampen mot Bjarg.

Catrine har sjeldan opplevd liknande gledesscenar etter ein kamp.

– Eg trur det er denne kampen dei har hatt mest glede av å vinna. Alle spelarane viste seg fram og spelte bra. Det var flott å sjå den idrettsgleda etter kampen. Det er ein kjempegjeng, fortel ho.


Handballglede

Det er ingen tvil om at handballen betyr mykje for tiåringane, og dei ser ut til å kosa seg på banen.

– Me driv med handball fordi det er gøy, seier Isarlin, og får med seg dei andre jentene i det argumentet.

Det er ei talentfull spelargruppe på Tysnes, som trivst med idretten.

– Me trenar to gonger i veka, seier Anna.

På spørsmål om kor gode dei vil verta, er svaret klart hos alle.

– Me vil verta best moglege handballspelarar, seier dei samstemde.

LES OGSÅ: Grasrotandelen: Over 100.000 til Njardar/Tysnes


JUBEL: Det var ein strålande nøgd gjeng etter kampen mot Bjarg. Bak frå venstre: Sunniva Dalland, Ann Kristin Misje og Isarlin Nødland. Midten frå venstre: Vilde Amalie Aasen, Anna G. Birkeland og Iselin Nilsen. Framfor ligg Hedvig Klemmetsby. Hanne Sofie Kongsvik Brandvik var også med på kampane søndag.
JUBEL: Det var ein strålande nøgd gjeng etter kampen mot Bjarg. Bak frå venstre: Sunniva Dalland, Ann Kristin Misje og Isarlin Nødland. Midten frå venstre: Vilde Amalie Aasen, Anna G. Birkeland og Iselin Nilsen. Framfor ligg Hedvig Klemmetsby. Hanne Sofie Kongsvik Brandvik var også med på kampane søndag.
PASNING: Anna Gaugstad Birkeland var godt nøgd med å slå gamle lagkameratar hos Bjarg.
PASNING: Anna Gaugstad Birkeland var godt nøgd med å slå gamle lagkameratar hos Bjarg.
FORSVAR: Sunniva Dalland gjorde det vanskeleg for motstandaren sin høgreving å scora.
FORSVAR: Sunniva Dalland gjorde det vanskeleg for motstandaren sin høgreving å scora.
LÅG UNDER TIL PAUSE: Det måtte ein pauseprat til for å snu kampen.
LÅG UNDER TIL PAUSE: Det måtte ein pauseprat til for å snu kampen.
JUBEL: Jentene strekte hendene i vêret etter mål i siste sekund.
JUBEL: Jentene strekte hendene i vêret etter mål i siste sekund.
GLEDE: Då sluttsignalet lydde, sprang jentene mot benken for å jubla med trenar Catrine Nilsen. Ho har sjelden opplevd så stor glede blant jentene etter ein handballsiger.
GLEDE: Då sluttsignalet lydde, sprang jentene mot benken for å jubla med trenar Catrine Nilsen. Ho har sjelden opplevd så stor glede blant jentene etter ein handballsiger.

Siste saker Gå til framsida

Leiar: Tysnes bør få meir enn 400.000 i grasrotmidlar

Norsk Tipping har fordelt grasrotmidlane for 2018. Den viser at lag og organisasjonar i Tysnes har fått heile 433.568 kroner inn på bankkontoane sine frå tippeselskapet på Hamar. Det er eit svært bra tilskot til økonomien til ulike lokale lag og organisasjonar i kommunen vår.Det er idrettslaga som ser ut til å...

Debatt: – Vi kjøpte ikke for å drive hotell

Vi har satt i gang en prosess hvor vi ønsker å regulere eiendommen til hyttetomter og et leilighetsbygg. Prosjektet er fortsatt i en veldig tidlig fase. I forbindelse med den påbegynte reguleringsplanen hadde bladet Tysnes en artikkel om prosjektet. Vi redegjør der i korte trekk for hva vi ønsker med...