FRAMTIDSRETTA: Sofie Dalland ser fram til tida i Forsvaret, men har samtidig klare planar for framtida. (Foto: Privat)
FRAMTIDSRETTA: Sofie Dalland ser fram til tida i Forsvaret, men har samtidig klare planar for framtida. (Foto: Privat)

– Eg vil gi noko tilbake, fordi me har det så godt

Sofie Dalland har lenge sett opp til folk i Forsvaret. No er ho sjølv ute i førstegongstenesta.
Publisert 12.01.2019 kl. 15.00.

– Eg har ein bror som er i militæret, som har jobba der i sju år no. Eg har sett kor kjekt han har hatt det, og så ville eg gjera mitt for landet vårt, seier Sofie Dalland (19).

Søndag reiste ho frå Tysnes til Madlaleiren i Stavanger-området, saman med tysnesjentene Karoline Førdedal Helland og Lene Rønning Sævartveit.

Det byrja, som det ofte gjer, med den første sesjonen, der ein svarer på spørsmål i eit skjema. Då var Sofie litt usikker, og tenkte at forsvaret kanskje var noko ho hadde lyst til. Etter ho blei kalla inn til del to av sesjonen, fann ho for alvor ut at dette var noko ho ville.

– Eg har alltid sett folk som har vore i Forsvaret, og tenkt at det var kult, men eg har òg sett meininga bak det. Eg vil gi noko tilbake, fordi me har det så godt. Eg vil hjelpa til, seier Sofie.


Allereie i gang

Same dag som dei kom til leiren, blei dei tre tysnesingane plassert i ein tropp saman.

– Me har hatt noko som heiter innrykk, og har fått masse info, utstyr og våpen, fortel Sofie vidare.

– Tysdag byrja me med litt opplæring om helse, og om korleis me skal stå når alle i troppen står på rekke.

No skal Sofie og dei andre gjennom to månadar i «rekrutten», med grunnleggande opplæring, før dei skal velja spesialiseringar.

– Eg håper det blir så kjekt som eg har sett for meg at det skal bli. Eg veit at det blir tungt, men eg vil prøva å fokusera på det som blir kjekt, seier ho.


Vil bli sanitet

I mai i fjor var Sofie ferdig med påbygg på vidaregåande. Før det gjekk ho første året helse- og oppvekstfag, og andre året ambulansefag. I Forsvaret vil ho gå ein liknande veg.

– Eg har nokre mål. Eg vil for eksempel bli sanitet. Etter rekrutten på to månadar er det fem vekers kurs på Haakonsvern. Så blir du plassert på ulike stasjonar, f.eks kystvern, fregatt eller ulike leirar, og så er du assistent for den som er sanitet på stasjonen, fortel Sofie.

Ifølgje Sofie har saniteten ansvar for ting som legesjekkar, og å gi ut medisinar; oppgåver som nok ikkje er framande for ho, etter to år med helserelaterte fag på vidaregåande.

– Det er jo mange andre vegar ein kan gå, men eg har ei interesse for kroppen og ulike sjukdommar. Og så liker eg å hjelpa andre, legg Sofie til.


Forskjellige framtidsplanar

– Ser du for deg ein karriere i Forsvaret?

– Eg har ein plan utanom Forsvaret, men om eg får moglegheita til ein karriere her, ser eg ikkje bort ifrå at eg seier ja, svarer Sofie.

– Kva er planen utanom Forsvaret?

– Eg har to forskjellige planar. Eg har jo allereie ambulansefag, så då er det eventuelt å gå to år i lære, og bli ambulansefagarbeidar. Elles vil eg kanskje bli jordmor, avsluttar Sofie.


Siste saker Gå til framsida

Har studert tilstanden til den store eika i Våge

«Festivalkontoret» i Våge skal utvidast. Derfor trong Fonna AS meir info om den gamle eika ved kontoret.– Eg kom med ei anbefaling om å finna ut litt om vitaliteten og helsetilstanden til treet, og gjerne òg finna ut risikoane med treet, seier arborist Kristoffer Nerhus, dagleg leiar i Hardanger Hagehjelp.Han kom i kontakt med Sigvard Madsen i Fonna AS, som følge av...

Tommy stod på og lukkast

Endeleg, etter fire års innsats av fleire gode krefter, og ikkje minst Tommy Gundersen (24) sjølv, har han fått lærlingeplass og er nærast sikra jobb i framtida.