NOKO MÅ SKJE: «Me helsar ei ny satsing på Godøysund velkomen», skriv bladet Tysnes på leiarplass. (Foto: Ole Skaten)
NOKO MÅ SKJE: «Me helsar ei ny satsing på Godøysund velkomen», skriv bladet Tysnes på leiarplass. (Foto: Ole Skaten)

Leiar: Godøysund-utbygging er viktig for Tysnes

Publisert 14.01.2019 kl. 06.00.

Tysnes-samfunnet bør gle seg over at det endeleg er kome inn eigarar på den gamle og ærverdige hotelleigedomen som vil utvikla dette øyparadiset vidare.

Mange tysnesingar har hatt visjonar om at det skal koma eit nytt hotell i Godøysund. Det er nok ein visjon som ikkje har eit forsvarleg økonomisk grunnlag i 2019. Dei nye eigarane har lagt hotellplanane på is. Det forstår me godt. Å byggja opp eit heilt nytt hotell frå grunnen av på ei øy på Tysnes, langt vekke frå flyplassar og bysentrum i Bergen, vil nok vera eit urealistisk prosjekt i dag.

Me kjøper dessutan argumentet til dei nye eigarane om at dei ikkje vil byggja opp ein konkurrent til Mandelhuset og Haaheim. Både Mandelhuset og Haaheim treng alle gjestene dei kan få, for å styrkja drifta og sikra ei positiv utvikling. Tysnes treng både Mandelhuet og Haaheim i framtida. Eit nytt hotell på Godøysund, som kan vera med å riva grunnen under dei to, vil vera ei feilsatsing. Så får heller tida visa om det ein gong i framtida vil vera grunnlag for eit nytt hotell på øya.

Godøysund var i si stordomstid ei skinande perle, som trekte folk frå fjern og nær. Det er fleire år sidan det skein på Godøysund. No har forfallet for lengst teke overhand. Difor var det med glede me i desember 2016 i «Tysnes» kunne melda at Godøysund hadde fått nye eigarar. «Det er forhåpentlegvis ei lukke for Tysnes-samfunnet», skreiv me på leiarplass den gongen.

Dei nye eigarane vil riva det gamle falleferdige hotellet og byggja leilegheitsbygg for fritidshusvære på same tomta. Det kan verta ei spennande og attraktiv løysing. Delar av det store området vil dei bruka til fritidsbustader. Etter det me skjønar skal det verta ei miljømessig satsing, med lite bilkøyring inn i området, og parkering på Gåseviksida. Det kan også verta ei spennande satsing. Vonleg vert det så attraktivt, at det vert kjøpesterke interessentar som vil feriera i Godøysund.

Kjøpesterke feriegjester som nyttar lokale handleplassar og lokale entreprenørar, bør vera viktige moment når politikarane skal ta stilling til dei nye planane for Godøysund. Dette vil verta positivt for Tysnes.

Signala frå lokalsamfunnet om at Godøysund framleis må verta eit område for allmenta, er tydelege. Me tvilar ikkje på at det vert teke omsyn til.

Me helsar ei ny satsing på Godøysund velkomen.

Les også: Oppgitt over forfallet på Godøysund


Siste saker Gå til framsida

Lesarbrev: Kultur – Språk

Tysnes er ein nynorsk-kommune. Det er derfor med stor undring eg har lese innlegg i avisa frå Tysnes Arbeidarparti sin formann og ordførarkandidat skrive på bokmål på vegner av partiet. Skal ein vera ordførar i Tysnes, må ein kunna uttrykkja seg skriftleg på nynorsk – eventuelt med hjelp frå andre. Kva ein sjølv nyttar privat i skrift og tale, er irrelevant. Avisa 5.9.2019...