INTERNASJONAL OMTALE: Kåre Martin Kleppe, Tysnes kommune og Hordfast-prosjektet fekk i førre veke internasjonal omtale hos den amerikanske mediestasjonen NPR. (Arkivfoto: Vetle Mikkelsen)
INTERNASJONAL OMTALE: Kåre Martin Kleppe, Tysnes kommune og Hordfast-prosjektet fekk i førre veke internasjonal omtale hos den amerikanske mediestasjonen NPR. (Arkivfoto: Vetle Mikkelsen)

Kåre Martin Kleppe og Hordfast med internasjonal omtale

I førre veke vart Hordfast-prosjektet og intervju med Kåre Martin Kleppe kringkasta i eit av dei største radioprogramma i USA.
Publisert 17.01.2019 kl. 13.00.

I haust skreiv «Tysnes» at ordførar Kåre Martin Kleppe skulle intervjuast av BBC World Radio og det amerikanske medieselskapet NPR, som skulle laga radioinnslag om Hordfast-prosjektet.

I førre veke publiserte NPR radioinnslaget i programmet «Morning Edition», og som nettsak på eigne heimesider.


Stor lyttarskare

NPR er basert i Washington DC, og er ein av dei største radiokanalane i USA. I mars 2018 skreiv NPR sjølv at dei har 37,7 millionar lyttarar kvar veke. Morgonsendinga «Morning Edition» er eit av dei mest populære radioprogramma i USA, med kring 15 millionar lyttarar kvar veke.

Kleppe sjølv synest det er flott med internasjonal omtale.

– Det er kjekt at prosjektet får internasjonal merksemd. Eg sa velvillig ja då vegvesenet spurte meg om eg ville stilla opp, fortel ordføraren.

Før intervjuet i haust sa Kleppe at dette var ei ypparleg moglegheit til å marknadsføra Hordfast og Tysnes.

– No vart min del av saka litt begrensa, men eg håpar likevel det vil gjera folk litt nysgjerrig på prosjektet og på Tysnes kommune, fortel han.

LES OGSÅ: Samferdsleministeren vil realisera Hordfast


Dead fish in a rush

«The ferry is a beautiful trip, but it’s more an obstacle than a good connection,» seier Kleppe i intervjuet med NPR.

Han vart i intervjuet spurt om kva det ville bety for Tysnes-samfunnet å få brua på plass. Kleppe prata mellom anna om kva ei bru over Bjørnafjorden ville bety for oppdrettsnæringa i regionen.

«Kleppe says better transport connections will encourage more investment and make it easier for the region’s fishing industry to get its salmon to market,» står det i artikkelen.

Dette vart følgt opp med fylgjande sitat frå ordføraren:

«It’s a saying that there’s nothing in the world that is in a bigger rush than a dead fish.»

– Det vart litt Petter Solberg-engelsk, innrømmer Kleppe lattermildt.

– Det er eit uttrykk som er brukt innanfor næringa, men eg måtte på sparket koma opp med ein engelsk variant, fortel han vidare.

LES OGSÅ: Nyeferja la til i Våge


Plukka opp på Twitter

Sitatet til Kleppe har til og med vorte plukka opp på Twitter av enkelte amerikanske lyttarar, inkludert Matthew Dowd, som er politisk kommentator i ABC News. Nokre timar etter at innslaget var sendt på NPR, var Dowd på Twitter.

«The rush of the President to address the country and administration officials going on tv suddenly, quickly and widely reminds me of a Norwegian fishing industry saying «there’s nothing in the world that is in a bigger rush than a dead fish»,» skreiv han.

Tweeten fekk 250 «likes» og vart «retweeta» 56 gonger.

Kleppe sjølv er godt nøgd med saka og reaksjonane som er komne.

– Det er eit prosjekt som fortener internasjonal omtale. Eg ser at mange har fått med seg saka, og det er kjekt. Eg håpar jo at brua vil verta ein turistattraksjon også, fortel Kleppe.

Her kan du lesa NPR si sak om Hordfast og Tysnes-ordføraren, og høyra radioinnslaget.


Siste saker Gå til framsida

Tjelden kom rekordtidleg

Måndag denne veka melde Svein Ove Agdestein at han hadde sett tjelden for fyrste gong i år. Det er rekordtidleg.– Normalt plar tjelden koma 8. eller 9. mars. Eg har aldri før registrert ein tjeld så tidleg som 18. februar, fortel Svein Ove Agdestein.I over 30 år har han følgt med på når den fyrste tjelden har meldt sin ankomst på Siriskjeret, den ytterste tuppen på...