KULTBAND: Luxus Leverpostei laga god stemning på Mandelhuset laurdag.
KULTBAND: Luxus Leverpostei laga god stemning på Mandelhuset laurdag.

– God stemning frå start til slutt

Mandelhuset inviterte laurdag til ekte «bygdafest» med TBA og Luxus Leverpostei.
Publisert 20.01.2019 kl. 16.15.

– Me har seld alle 250 billettane, fortel Patrick Russell Madsen, dagleg leiar ved Mandelhuset.

Det var dermed stinn brakke og klart for ordentleg «bygdafest» då Luxus Leverpostei gjekk på scenen på Mandelhuset laurdag kveld.

Arrangøren lova på førehand «rølp i fri utfaldelse», og 90-talsheltane leverte varene.


TBA opna showet

Som ein ekstra bonus til showet var det lokale bandet TBA hyra inn som oppvarming for Luxus Leverspostei.

Ordførar Kåre Martin Kleppe bytte for andledninga ut dress og ordførarkjede for dongerivest og mikrofon, og fekk i gang publikum saman med dei andre bandmedlemmane i TBA. Med seg på scenen hadde han Erlend Tvedt, Hans Christian Haaland, Haakon Haaland, Joar Epland og Marcus Dalland.

TBA opna showet med Robyn-klassikaren «Dancing On My Own», sjølvsagt i ein langt meir rocka variant enn den svenske original-versjonen.

LES OGSÅ: – Målet er å gje ut eit heilt album


Fekk publikum med seg

Derfrå og inn hadde Tysnes-bandet publikum i si hule hand, og leverte store slagarar som «Get Lucky» av Daft Punk, «You Know My Name» av Chris Cornell og «Seven Nation Army» av The White Stripes». Oppvarminga vart avslutta med høg allsongfaktor på Ingenting-låten «Liden», med Erlend Tvedt på vokal.

«Always leave the audience wanting more,» er eit kjent showbusiness-uttrykk, og det var ingen tvil om at publikum ville høyra meir av TBA då dei gjekk av scenen.

– Dette var kjempeløye. Luxus Leverpostei er store idol for oss. og eigentleg inspirasjonskjelda for heile TBA, så det var heilt rått å varma opp for dei, fortel gitarist og vokalist Erlend Tvedt.

Også gitarist Hans Christian Haaland var godt nøgd etter showet.

– Det var mykje folk, og det var tydeleg at folka var her for konserten, og ikkje berre for å sitja i eit hjørne og drikka, seier han.


Rølpeband

Kvelden vart toppa då Luxus Leverpostei entra scenen. Bandet frå Kvinesdal hadde sin gullalder på 90-talet, men er framleis aktive med konsertar og nye plateutgjevingar.

Med låttekstar like svette som lufta i konsertlokalet dei seine kveldstimane laurdag, har gruppa gjennom dryge 20 år oppnådd ein slags kultstatus, spesielt blant dei med ungdomstida si på 90-talet då gruppa slo igjennom.

Songtekstane skal ein forøvrig vera varsam med å sitera i lokalavisa. Bandet har vorte kritisert og slakta av anmeldere for vulgære og dryge tekstar, noko som nok også har vore med på å gje gruppa statusen dei har i dag.

LES OGSÅ: Ina Wroldsen klar for Tysnesfest


Bygdeband

Å koma til Tysnes og spela for 250 menneske er ikkje uvant kost for bandet. Sjølv om dei har stått på langt større scenar enn den på Mandelhuset, føler dei seg heime på bygda.

– Me er frå bygda sjølve, så dette er eit heilt naturleg publikum for oss, fortel vokalist, gitarist og frontfigur Bob Kåre Moen.

Karane i Luxus Leverpostei var godt nøgd med konserten.

– Me har spelt på Tysnes nokre gongar tidlegare, men det er vel 13 år sidan sist. Det var god stemning frå start til slutt, seier vokalisten.


Nøgd vertskap

Patrick Russell Madsen var full av lovord etter konserten.

– Dette var heilt konge. Folk kosa seg glugg i hel, fortel Madsen.

I tillegg til hovudattraksjonen, var han godt nøgd med å få TBA som oppvarmingsband.

– TBA er vel det einaste bandet som ordner med både rigging og rydding sjølv, seier han lattermildt.

For Madsen var dette utan tvil ein stor kveld.

– Det kjekkaste eg veit er å laga fest, avsluttar Madsen.

LES OGSÅ: Inger Lise Hope imponerte på Mandelhuset


OPPVARMING: Dei lokale karane i TBA, med Kåre Martin Kleppe som vokalist, opna showet.
OPPVARMING: Dei lokale karane i TBA, med Kåre Martin Kleppe som vokalist, opna showet.
RØLP: Luxus Leverpostei vert omtala som eit «rølpeband», noko som la det perfekte grunnlaget for «bygdafesten» på Mandelhuset.
RØLP: Luxus Leverpostei vert omtala som eit «rølpeband», noko som la det perfekte grunnlaget for «bygdafesten» på Mandelhuset.

Siste saker Gå til framsida

Lesarbrev: Hugs valdagen den 9. september

Det er ei dårleg demokratisk innstilling å ikkje stemma ved eit val. Same om du er noko ueinig med dei ulike partia, så er det alltid eit parti det kan vera greitt å gje si stemme til. Me i Tysnes FrP meiner me har eit godt valprogram, som seier noko om det som må bli betre i Tysnes kommune.Tysnes FrP er svært opptatt av at det ikkje må bli reduksjon i talet på ferjeanløp til og frå...

Klar for kommunal praksis

Jon Agnar Leirvik skal det neste halve året bu og arbeida på Tysnes, som ein del av statsvitskapsutdanninga.