HOTELL MED HAVUTSIKT: 10. klassingane fekk sjå Johan Sverdrup- hotellet på nært hald.
HOTELL MED HAVUTSIKT: 10. klassingane fekk sjå Johan Sverdrup- hotellet på nært hald.

10. klassingane er attraktive

På utdanningsmessa på Leirvik var der mange arbeidsgjevarar og utdanningsinstitusjonar som prøvde å gjera seg interessante for dei som går ut av ungdomsskulen til sommaren.
Publisert 24.01.2019 kl. 15.00.

Dei to 10. klassane ved Tysnes skule fekk torsdag tur til Stord, der dei først var på Kværner. Der fekk dei orientering om verftshistoria, og informasjon om alle dei ulike yrkesfaga dei har ved Kværner Stord. Etter ein rundtur i buss på verftsområdet, brukte dei god tid på utdanningsmessa i idrettshallen på Leirvik.


Fekk prøva sveising

Ein som stortreivst der, var Gaute Eide Bergstø.

– Ja, det å få på meg kjeledress, vernesko og sveisehjelm, det var stort. Eg fekk prøva å sveisa på skikkeleg, og det er noko eg verkeleg kan tenkja meg å jobba med, seier 10. klassingen.

Han fekk også møta tysnesingen Alf Sundal (20), som er norsk og nordisk meister i sveising, og i tillegg har bronse i EM og 10. plass i VM.

– Som sveisar har du mange moglegheiter. Sjølv er eg no i Nordsjøen etter også å ha teke fagbrev som industrirøyrleggjar, seier sveisemeisteren med glimt i auga.

– Då me var på Kværner i dag, forstod eg at det var svært mange ulike yrke dei har der. Eg kan godt tenkja meg å bli industriteknikar eller maskiningeniør, seier Gaute, som er svært fornøgd med dagen borte frå skulen.


Hav og fisk

Alsaker Fjordbruk hadde stand på utdaningsmessa. Ei av dei som stansa der, var Elise Vemedal frå Tysnes skule.

– Eg skal ta studiespesialisering ved Os gymnas, men eg anar ikkje kva eg vil studera etterpå. Det er jo havet som gjev mest jobbar, anten det er med sjømat eller olje og gass. Ved Kværner sa dei at plattformane dei byggjer no skal vera i bruk i 40-50 år, men andre seier jo at oljeaktiviteten blir trappa ned. Kanskje skal eg bli havforskar, undrar Elise medan ho ruslar vidare og ser på alle tilboda verksemdene og utdanningsinstitusjonane lokkar med.


SJØMAT: Elise Vermedal snakka med Ingrid Storetvedt i Alsaker Fjordbruk om ei framtid i oppdrettsnæringa.
SJØMAT: Elise Vermedal snakka med Ingrid Storetvedt i Alsaker Fjordbruk om ei framtid i oppdrettsnæringa.
MØTE MED MEISTEREN: Gaute Eide Bergstø møtte Alf Sundal frå Tysnes, bronsevinnaren i sveise-EM.
MØTE MED MEISTEREN: Gaute Eide Bergstø møtte Alf Sundal frå Tysnes, bronsevinnaren i sveise-EM.
SVEISAR: Gaute stortreivst ved sveiseapparatet.
SVEISAR: Gaute stortreivst ved sveiseapparatet.

Siste saker Gå til framsida

Folketalet auka med 14

Ved utgangen av tredje kvartal i 2019 er folketalet i Tysnes kome opp i 2.862. Det er 14 fleire enn ved utgangen av andre kvartal. Då var folketalet 2.848.Elleve personar er fødd i Tysnes i dette kvartalet, medan fire personar har døydd. Det gjev eit fødselsoverskot på sju.I same periode har det flytta 30 personar inn til Tysnes, av desse fire frå utlandet. 23 personar har flytta...

Klart for ny førjulsmesse

Laurdag er det tid for den tradisjonsrike førjulsmessa i Tysnes bedehus, der overskotet går til Indremisjonen sitt arbeid i vår krets. Her kan ein kjøpa heimebakst, handarbeid og andre kjekke varer, i tillegg til å få med seg eit variert program om ein ynskjer det. Barne- og familiearbeidar i IMS, Lise Marie Thuestad Litlabø stiller som andaktshaldar, og det blir song av både...