PERNILLA OG EUROPAMEISTRANE: Ingebrigtsen-brørne var også på treningsleir i same området som Pernilla. F.v. Filip Ingebrigtsen, Pernilla, Henrik Ingebrigtsen og Jakob Ingebrigtsen. (Begge foto: Nils Hetleflåt)
PERNILLA OG EUROPAMEISTRANE: Ingebrigtsen-brørne var også på treningsleir i same området som Pernilla. F.v. Filip Ingebrigtsen, Pernilla, Henrik Ingebrigtsen og Jakob Ingebrigtsen. (Begge foto: Nils Hetleflåt)

Var på treningsleir i Sør-Afrika

– Eg hadde eit supert opphald. All treninga gjekk veldig bra, seier Pernilla Epland etter treningsleiren i to tusen meters høgde.
Publisert 24.01.2019 kl. 06.00.

For fyrste gong i livet har Pernilla Epland fått prøva seg på trening i to tusen meters høgde. Turen gjekk til Sør-Afrika i romjula. For Pernilla sin del varte treningsleiren i to veker. Med på leiren var trenaren til Pernilla, Nils Hetleflåt, frå Stord IL. Andre frå Stord reiste nedover veka etter.


Skal heva nivået

– Målet med treningsleiren er å heva nivået og få god trening i varme og høgde, seier Nils Hetleflåt.

Han veit ikkje korleis det vil slå ut for Pernilla sin del, sidan dette er fyrste høgdeopphaldet hennar.

– Me skal no sjå korleis eit slikt treningsopphald fungerer for henne, legg trenaren til.

Andre nordmenn på treningsleir i Sør-Afrika skulle vera der i heile januar. Ein del reiser vidare til USA etterpå.


Ingebrigtsenbrørne på plass

– Når me er på treningsleir i Sør-Afrika, leiger me hus og bur i same landsbyen som mange andre idrettsutøvarar, forklarar Nils Hetleflåt.

– På eit tidspunkt var me over 20 frå Norge, 30-40 svenske og 15 frå Finland, legg han til.

Ingebrigtsen-familien var og på treningsleir i same landsbyen. Dei kom nedover litt seinare enn Pernilla og Nils.


Gav meirsmak

Pernilla sjølv er klar på at opphaldet gav meirsmak.

– Eg må ned att dit. Det er godt å trena i sommartemperaturar midt på vinteren, seier ho.

Allereie til sommaren kan det verta aktuelt med eit nytt høgdeopphald, men då blir det nok ikkje Sør-Afrika.

Sjølv seier Pernilla at målet i år er å forbetra seg på alle distansar.

– For å bli betre og få ein større framgang, må eg gjera grep, seier ho om opphaldet.


NM innandørs

Allereie om vel ei veke skal ho måla krefter mot andre norske. Då går NM innandørs av stabelen i Haugesund. Der er ho påmeld til 1.500-meteren om laurdagen og 3.000-meteren om søndagen.

– Ambisjonane er alltid medalje. Eg går for det, så får me sjå, seier ho.


Siste saker Gå til framsida

Sogespela står sterkt

Dei mange sogespela han skreiv, var det han fekk mest direkte respons på og mest publikum på. Johannes Heggland var oppteken av teater-mediet, og likte å vera til stades både på premierar og på vegen fram dit.