SIGERHERREN: Pernilla Eugenie Epland skaut fart mot slutten av løpet, og sikra seg sigeren. (Foto: Eirik Førde)
SIGERHERREN: Pernilla Eugenie Epland skaut fart mot slutten av løpet, og sikra seg sigeren. (Foto: Eirik Førde)

Nybakt norgesmeister til Nordenkampen

Søndag blei Pernilla norgesmeister på 3000 meter innandørs for kvinner. No er ho klar for nordisk landslagskamp.
Publisert 08.02.2019 kl. 06.00.

– Eg var veldig spent. Eg såg at Tessa Frenay, ho som var rekna som min største utfordrar, sprang godt på laurdagen, seier Pernilla Eugenie Epland.

I helga som var, skulle tysnesingen til pers under NM i friidrett innandørs.

– Men så var det å stola på at eg var i god form. Så lenge foten ikkje plaga meg, skulle det gå fint, held ho fram.

Onsdagen i forvegen hadde Pernilla nemleg fått ein liten støkk under ei trening. Plutseleg fekk ho veldig vondt i den eine leggen, og ho måtte avslutta økta.

Fredag kom ho til hos fysioterapeuten, som ikkje anbefalte å springa to løp på ei helg.

Slik gjekk det til at Pernilla, som opphaveleg skulle springa 1.500 meter laurdag og 3.000 meter søndag, berre sprang søndagen.


Spennande løp

– Eg snakka med Tessa (Frenay, journ.merk) på førehand, om at me skulle byta på å dra, slik at det ikkje berre blei ein som drog, mens den andre låg bak og slappa av, seier Pernilla.

Etter åtte rundar, merka Pernilla at ho blei tung i kroppen. Rivalen Tessa Frenay, frå Halden IL, var plutseleg lengre og lengre unna.

– Eg tenkte «er det køyrt no?». Men den siste runden er det alltid noko som klikkar. Eg såg at eg henta ho inn. Då det var 100 meter igjen såg eg at eg var rett bak ho. Eg kjente at no tar eg ho igjen, seier løparen frå Tysnes.

Med ein heidundrande innspurt, suste Pernilla forbi konkurrenten, og enda opp som norgesmeister på 3000 meter kvinner, med tida 9,34,20.

– Det var ein god følelse. Eg kjente at eg hadde ein god toppfart mot slutten, og følte meg eigentleg sterk. Det kjentest veldig bra.

– Men det var ein periode eg kjende eg ikkje hadde mykje igjen. Eg valde å ligga i mitt eige tempo, i staden for å ligga rett oppi ho, legg Pernilla til.


Skal representera Norge

Under NM i friidrett utandørs på Byrkjelo i fjor, tok Pernilla heim ein gullmedalje i 10.000 meter for kvinner. Etter sist helg er altså tysnesingen dobbel norgesmeister.

Ho har likevel ingen planar om å legga løpeskoa på hylla med det første:

– Eg er tatt ut til den norske troppen til Nordenkampen. På søndag skal eg springa 3.000 meter innandørs, seier Pernilla.

Nordenkampen er eit nordisk meisterskap i friidrett, mellom Norge, Sverige, Finland, Island og Danmark.

På 3000 meter kvinner skal Pernilla, saman med Karoline Bjerkeli Grøvdal, representera Norge.

Arrangementet går av stabelen i Bærum idrettspark, søndag 10. februar.


Motivasjonen er viktig

– Kva tips har du til andre som vil bli gode i sport?

– Skal du bli god, er du nøydt til å ha ein indre motivasjon for det du driv med, seier Pernilla.

Sjølv spring ho oftast to gongar per dag.

– Eg spør aldri meg sjølv om eg vil ut og springa, eg berre gjer det. Ein må ha motivasjonen, og setta seg mål; det gjeld all idrett, legg ho til.

– Det er òg viktig å ha noko å trena for.


Siste saker Gå til framsida

Leiar: God dialog med grunneigarane er nødvendig

Over 90 personar på folkemøte om E39-planane viser at det er heilt nødvendig at vegvesenet stiller på Tysnes for å informera om status for den nye stamvegen.Store delar av Tysnes har vore samde om at ein ny E39 bør gå gjennom kommunen vår. Kommunestyret i Tysnes har vore samrøystes på dette. Politikarane var og...