NM-SPELING: Tysnes musikklag på scenen i Grieghallen fredag føremiddadg. (Foto: Nora Stien)
NM-SPELING: Tysnes musikklag på scenen i Grieghallen fredag føremiddadg. (Foto: Nora Stien)

Flott innsats under brass-NM i Grieghallen

Norgesmeisterskapen i brass er eit fast årleg høgdepunkt for Tysnes musikklag. I år fekk dei ein fin sjetteplass i andredivisjon.
Publisert 09.02.2019 kl. 22.29. Oppdatert kl. 22.51.

Dirigent Yngve Nikolaisen er svært godt nøgd med plasseringa.

– Det tyder at me får spela i Grieghallen neste år også, seier han nøgd.

Det var fredag føremiddag Tysnes musikklag gjekk på scenen i Grieghallen. Laurdag kveld kom resultatet og plasseringa.

– Det gjekk veldig fint, er kommentaren til Yngve Nikolaisen til «Tysnes» seint laurdag kveld, etter at resultata er klare.

Tretten korps deltok i andredivisjon.

– Å verta nummer seks tyder at me har truffe med stykket, seier han.

Dirigenten var også godt nøgd fredag, etter at spelinga var unnagjort.

Og det var ikkje berre dirigenten som var nøgd.

– Eg trur alle medlemene i korpset var nøgd med eigen innsats, seier han.

«The Forest of Dean» er namnet på stykket som dei framførte. Dirigenten fortel at dei hadde valt eit stykke som dei trudde ville passa til eit norgesmeisterskap.

– Det er eit britisk stykke, ein hyllest som komponisten skreiv til læremeisteren sin, seier han.

– Det er eit variasjonsstykke, som er både roleg og hurtig, vanskeleg og lett, med store skilnader i karakter frå del til del, forklarar han.

Han karakteriserer den tolv minuttar lange framføringa som fysisk tung.

– Det er ein kraftprestasjon for alle dei 29 som var på scenen. Det er fysisk tungt, varer lenge og har ein tung slutt, men me har ei god stamme med blanding av unge og eldre som toler å spela lenge, seier han.

NM i brass vert arrangert i februar kvart år i Bergen. Her møtest vaksenkorps frå heile landet, fordelt på seks divisjonar. Tysnes musikklag spelar i år i andredivisjon. Dei gjekk på scenen klokka 10.50 fredag føremiddag, som nummer fem av korpsa i sin divisjon. Brøttum Brass var fyrst ut klokka 09.30. I alt var det tretten korps i andredivisjon i år. Sist ut var Fjell Brass klokka 14.10.


Resultat 2. divisjon

1. Brøttum Brass 96

2. Sola Brass Band 95

3. Sørum Musikklag 94,5

4. Ørskog Brass 94

5. Follesø Musikklag 93

6. Tysnes Musikklag 92,5

7. Fjell Brass 92

8. Manger Old Star 91,5

9. Alexander Brass B. 91

10. Jølster Musikklag 90,5

11. Haukås Musikklag 90

12. Sagvåg Musikklag 89,5

13. Stangaland Brass 89


Siste saker Gå til framsida

Godøysund var draumeplassen for mange

Rita Steckmest Sivertsen (52) vaks opp med somrane på Godøysund og hotellet der då familien eigde det. No har ho, broren Tom og mannen hennar, Nils Petter Sivertsen, kjøpt tilbake Godøysund og vil rydda og leggja til rette for at mange igjen kan bruka øyane der til gode naturopplevingar.