SIGER: Tysnes, for anledninga i blåe draktar, slo Kjøkkelvik søndag. Brita Austvik finn her Annica Reimdal Vee som legg an til skot. (Foto: Bernt Lunde)
SIGER: Tysnes, for anledninga i blåe draktar, slo Kjøkkelvik søndag. Brita Austvik finn her Annica Reimdal Vee som legg an til skot. (Foto: Bernt Lunde)

På veg mot fylkesmeisterskapen

Tysnes sitt Jenter 15-lag har hatt ein fantastisk sesong, og oppturen fortsette borte mot Kjøkkelvik søndag.
Publisert 12.02.2019 kl. 06.00.

– Det var nok ein gong ein god forsvarskamp, fortel trenar Geir Austvik etter at J15-laget vann 9–16 over Kjøkkelvik søndag ettermiddag.

Laget vann dermed sin niande kamp for sesongen, og er i førarsetet i kampen om å vinna serien og kvalifisera seg til fylkesmeisterskapen i april.


Hamna under

Austvik fortel at laget fekk ein tøff start mot Kjøkkelvik, men at dei etter kvart fekk kampen inn i sitt spor.

– Me låg under 6–4 halvvegs i fyrste omgang. Men det som er fint i handball er at me kan ta ein time-out, og justera på enkelte ting, seier han.

Justeringane funka godt for tysnesingane.

– Me plukka ut dei beste Kjøkkelvik-spelarane, og dei scora berre tre mål til i resten av kampen. Forsvaret gjorde ein kjempejobb, og Emma (Elgsås, journ.anm.) stod ein kjempekamp i mål, fortel trenaren.


Godt forsvar

Resten av kampen var Tysnes eit par hakk betre enn motstandarane. Fyrst gjekk dei til pause med leiinga 7–10, før ein målfattig andreomgang fastsette sluttresultatet til 9–16.

Bortsett frå to overlegne kampar mot botnlaget Fitjar, vart resultatet mot Kjøkkelvik den største sigeren til Tysnes-jentene denne sesongen.

– Det gode forsvarsspelet legg grunnlaget for sigeren, seier Austvik.

Han har gjennom heile sesongen skrytt av forsvarsspelet til J15-laget, og meiner det har vore ein viktig faktor for den gode sesongen laget har hatt.

– Uansett om ein speler i toppdivisjonen eller på lågere nivå, er det utruleg viktig med eit godt forsvar i botn.

LES OGSÅ: Åsane-muren stoppa Tysnes-damene


Ligg an til å vinna serien

Med ein ny siger i bagasjen, ligg Tysnes no på toppen av tabellen med like mange poeng som Fana 2. Eitt poeng bak ligg Kjøkkelvik, men både dei og Fana har to kampar meir spelt enn Tysnes.

Dermed ligg tysnesingane godt an med tanke på å vinna serien, og dermed kvalifisera seg for fylkesmeisterskapen. Der får dei møta andre serievinnarar frå same nivå i ei sluttspelsturnering.

Trenar Austvik har ikkje erfaring frå fylkesmeisterskapen tidlegare, men trur det er motiverande for laget å ha ein meisterskapsplass i sikte.

– Eg trur jentene synest det er veldig kjekt å kunna koma til fylkesmeisterskapen, seier han.


Tek ein kamp om gongen

Før laget kjem så langt, har dei fire kampar igjen av det ordinære seriespelet, og trenaren vil ikkje ta for gitt at dei sikrar avdelingssigeren.

– Med to kampar meir igjen enn dei andre topplaga (som også skal møta kvarandre, journ.anm.) skal det litt til før me rotar vekk tabelltoppen, men me tek ein kamp om gongen, og veit at ingen kampar er enkle i denne avdelinga. I helga reiser me til Sotra for å møta Nordre Fjell, og me kan ikkje sleppa oss nedpå og tru at det vert enkelt, fortel han.

Austvik er tydeleg på at kvar kamp lever sitt eige liv, og at sjølvtilliten kan variera frå kamp til kamp.

– Me må skaffa oss sjølvtillit i kvar kamp. Det er i angrep det er vanskelegast å få til ting, og når ein ikkje får det til, må ein nullstilla og finna fokus igjen.

Neste kamp mot Nordre Fjell er den siste bortekampen for sesongen, og etter denne ventar tre strake heimekampar mot Kalandseid, Fitjar og Nordre Fjell.

LES OGSÅ: – Jentene er fantastisk flinke


FLEST MÅL: Med fem mål vart Brita Austvik toppscorar for Tysnes i kampen. (Foto: Ragnhild Malkenes)
FLEST MÅL: Med fem mål vart Brita Austvik toppscorar for Tysnes i kampen. (Foto: Ragnhild Malkenes)
SKOT: Annica Reimdal Vee scora tre mål mot Kjøkkelvik. (Foto: Ragnhild Malkenes)
SKOT: Annica Reimdal Vee scora tre mål mot Kjøkkelvik. (Foto: Ragnhild Malkenes)

Siste saker Gå til framsida

Lesarbrev: Hugs valdagen den 9. september

Det er ei dårleg demokratisk innstilling å ikkje stemma ved eit val. Same om du er noko ueinig med dei ulike partia, så er det alltid eit parti det kan vera greitt å gje si stemme til. Me i Tysnes FrP meiner me har eit godt valprogram, som seier noko om det som må bli betre i Tysnes kommune.Tysnes FrP er svært opptatt av at det ikkje må bli reduksjon i talet på ferjeanløp til og frå...

Klar for kommunal praksis

Jon Agnar Leirvik skal det neste halve året bu og arbeida på Tysnes, som ein del av statsvitskapsutdanninga.