I INNSPURTEN: Lærling Lars Henrik Helland Tvedt gjer klar forretten til dei 60 gjestene som ventar spent i restauranten.
I INNSPURTEN: Lærling Lars Henrik Helland Tvedt gjer klar forretten til dei 60 gjestene som ventar spent i restauranten.

– Me starta planlegginga allereie i haust

Dei to lærlingane Lars Henrik Helland Tvedt frå Sveio og Klaudia Pietruszynska frå Sotra synest det er stas å få vera med å bestemma rettane når Mandelhuset skipar til Lærlingaften.
Publisert 16.02.2019 kl. 06.00.

Dagleg leiar Patrick Madsen tek ein siste sjekk innom kjøkkenet. Klokka tikkar raskt mot 19.00. På Mandelhuset er det lærlingane sin kveld. Dei skal servera 5-rettars.

Dei fyrste gjestene er på plass allereie litt etter klokka 18.00. Fingermat og velkomstdrink står på menyen den fyrste timen.


Viktig med lærebedrifter

– Me er stolte av å vera ei lærebedrift, fortel dagleg leiar på Mandelhuset, Patrick Madsen.

Denne laurdagskvelden er det Lærlingaften som står på programmet.

62 gjester er påmelde.

– Alt er utseld, seier Patrick nøgd.

– Me meiner det er viktig at det finst lærebedrifter i distrikta. For vår del er me opptekne av at tysnesungdomar som ynskjer å gå denne vegen skal kunna få seg læreplass i kommunen. På den måten er me med på å skapa eit miljø for unge som vil ta kokkeutdanning. Det er viktig at me som bedrift tek ansvar, legg han til.

To lærlingar har hatt arbeidsplassen sin på kjøkkenet på Mandelhuset det siste året: Lars Henrik Helland Tvedt frå Sveio og Klaudia Pietruszynska frå Sotra. Ingen av dei er oppvaksne på Tysnes, men Lars Henrik har familierøter frå Onarheim. Mora vaks opp i Limbudalen ved Flakkavågen.

Det er Lars Henrik og Klaudia som har hovudansvaret for menyen denne kvelden.

– Planlegginga av Lærlingaften begynte me med i haust, fortel Lars Henrik.

Dei har brukt den siste veka til å førebu den store kvelden. Januar er ein roleg månad på den lokale serveringsstaden. Då får dei meir tid til jobba med eit prosjekt som dette.

– Me starta allereie måndag med klargjeringa, fortel Lars Henrik, i det han kikkar bort på Klaudia som er fullt oppteken med å røra i sausen til hovudretten; heilsteikt ytrefilet av hjort.


Lærlingane sitt prosjekt

Både Lars Henrik og Klaudia trivst godt som lærlingar på Mandelhuset.

– Det er ein kjekk plass å vera, seier dei.

Linn Mari Kvamsdal er kjøkkensjef og har rettleiingsansvaret for lærlingane.

– Me har ein flink kjøkkensjef, skryter Patrick.

– Etter ombygginga i fjor fungerer kjøkkenet vårt fint. No har me anledning til å arrangera slike gøye kveldar som dette, legg han til.

Etter nyttår har det vore stengt nokre veker og personalet har hatt fri. Lærlingaften er den fyrste dagen med gjester i restauranten etter jul.

Kjøkkensjefen er med på Lærlingaften for å rettleia dei to unge. Men Linn Mari er oppteken av at dette skal vera lærlingane sin kveld, der dei får prøva seg på eiga hand.

– Dette er deira prosjekt. Her er det plass til både litt prøving og feiling, og litt hjelp, strekar ho under.

Både Lars Henrik og Klaudia synest det er stas at dei får vera med å bestemma rettane, og setja saman smakane.

– Dei fyrste dagane testa me ut smakar, det er viktig at maten passar godt saman. Litt har me endra undervegs, for at resultatet skal bli best mogeleg, difor er det greitt å ha god tid, forklarar dei.

Heile menyen er sett saman av lokale råvarer.

– Alt har me laga frå botnen av. Alt frå sausar til isen lager me sjølve, som alltid, seier Lars Henrik og Klaudia, tydeleg nøgde.


– Me har kontrollen

– No er det ein halvtime att, seier Patrick, idet han kjem ein snartur innom kjøkkenet.

Lars Henrik er i ferd med å gjera forretten klar, rå lyr og aure som er skorne opp i terningar og lagt i limejuice i ein halvtime.

– Me har kontrollen, røper dei til journalisten.

– Dei er flinke til å fordela oppgåvene seg imellom, skryter kjøkkensjefen.

Klaudia er i ferd med å steika ferdig fisken. Den eine retten er steikt skrei.

– Med så mykje som fem rettar må me rekna med at det vil gå eit par timars tid, forklarar kjøkkensjefen.

Ho er oppteken av at gjestene må få god tid rundt matborda. Det må ikkje gå for fort.

Patrick kjem inn att på kjøkkenet.

– Når klokka er sju, ynskjer eg velkomen. Då må de to lærlingane vera med og presentera menyen. Det går vel bra, meir kommanderer enn spør han, i ein lett tone.

Korkje Klaudia eller Lars Henrik har vore med på det før. Men dei vil kasta seg ut i det.

– Innleiingsvis forklarar eg litt om at me er ei lærebedrift og litt om historia til Mandelhuset, seier ein smilande sjef.


Takk for at de er her

Lars Henrik har vore lærling i snart halvtanna år. Til hausten er læretida over. Kor arbeidsplassen hans blir då, veit han ikkje enno. Klaudia tok til i lære i haust, ho skal og vera i to år. Til hausten kjem det ein ny lærling; Kristoffer Heggland Turøy. Kristoffer har og røter frå Tysnes. Mora kjem frå Heggland. Kristoffer er medhjelpar på kjøkkenet denne kvelden.

Både Lars Henrik, Klaudia og Kristoffer skal jobba på kjøkkenet til våren og sommaren. Det ser dei fram til.

I 2023 er det hundre år sidan Kristoffer Johnsen starta med handel i det som i dag er Mandelhuset. Lite visste han den gongen at butikklokala ein gong skulle bli ein serveringsstad.

– Takk for at de er her. Så lenge de kjem, så vil me halda fram med Mandelhuset, informerte Patrick Madsen til gjestene som hadde funne vegen til Lærlingaften.


Nøgde gjester

Ved det eine gjestebordet i den nye festsalen til Mandelhuset er det berre smilande gjester.

– Lærlingaften er eit godt tilbod. Me synest det er spennande at lærlingane får visa fram kva dei kan. Me har store forventningar til kvelden, seier Elin og Egil Lande.

Dei får full støtte hjå dei andre rundt bordet.

– Ja, det er eit veldig positivt arrangement med Lærlingaften. Me stiller i alle fall opp på slike kveldar, seier Reidun og Øyvind Hjertaker.

– Og så forventar me litt ekstra på ein slik kveld, legg dei smilande til.

– Det er klart me må støtta opp om dette. Me har bruk for denne serveringsplassen, seier Kirsten og Bjørn Helge Epland.

– Og så er me sjølvsagt veldig spent på maten. Den fyrste retten var veldig bra, legg dei til.

Ein ting er gjengen rundt bordet samde om, dei likar alle god mat og flott dekking i ein god atmosfære.

– Og så er det veldig kjekt når lærlingane introduserer rettane.


Meny Lærlingaften

• CEVICHE AV LYR OG AURE - Mango, koriander og honningvinaigrette

• JORDSKOKKSUPPE - Nordisk kokos, råsteikt jordskokk og beef Jerky

• SKINNSTEIKT SKREI - Gulrotpure, smørsteikt kapers, bakt fennikel hasselbackpotet og persillehollandaise

• HEILSTEIKT YTREFILET AV HJORT - med Myrdals vellagra geitost og timianskorpe, persillerotkrem, glaserte kantareller, uthula poteter med potetpure og fløytesaus

• KVIT SJOKOLADEMOUSSE - Bringebærgele, bringebærpikekyss, peanøttis og toffeesausOle Skaten


TIL HOVUDRETT: Klaudia Pietruszynska sørgjer for at fløytesausen til heilsteik ytrefilet skal vera ferdig til rett tid.
TIL HOVUDRETT: Klaudia Pietruszynska sørgjer for at fløytesausen til heilsteik ytrefilet skal vera ferdig til rett tid.
ALLE I ARBEID: Både kjøkkenpersonell og servitørar i full aktivitet før servering av jordskokksuppe. Kristoffer Heggland Turøy (bak), Lars Henrik Helland Tvedt, Klaudia Pietruszynska , Linn Mari Kvamsdal, Sandra Kårstad og Patrick Madsen.
ALLE I ARBEID: Både kjøkkenpersonell og servitørar i full aktivitet før servering av jordskokksuppe. Kristoffer Heggland Turøy (bak), Lars Henrik Helland Tvedt, Klaudia Pietruszynska , Linn Mari Kvamsdal, Sandra Kårstad og Patrick Madsen.
FIN KVELD: F.v. rundt bordet: Bjørn Helge Epland, Kirsten Epland, Reidun Hjertaker, Øyvind Hjertaker, Ingeborg Gaugstad, Arvid Gaugstad, Elin Lande og Egil Lande er opptekne av å støtta opp om arrangement som Lærlingaften.
FIN KVELD: F.v. rundt bordet: Bjørn Helge Epland, Kirsten Epland, Reidun Hjertaker, Øyvind Hjertaker, Ingeborg Gaugstad, Arvid Gaugstad, Elin Lande og Egil Lande er opptekne av å støtta opp om arrangement som Lærlingaften.
VELKOMEN: Patrick Madsen ynskjer velkomen. Blant gjestene denne kvelden er også tilreisande slektningar av dei to lærlingane Lars Henrik og Klaudia.
VELKOMEN: Patrick Madsen ynskjer velkomen. Blant gjestene denne kvelden er også tilreisande slektningar av dei to lærlingane Lars Henrik og Klaudia.
EI HJELPANDE HAND: Kjøkkensjef Linn Mari Kvamsdal er med for å rettleia dei to ungdomane.
EI HJELPANDE HAND: Kjøkkensjef Linn Mari Kvamsdal er med for å rettleia dei to ungdomane.

Siste saker Gå til framsida

Debatt: Miljødiplomet til Hordaland fylkeskommune og Skyss må ned frå veggen no

I seinare tid har det vore diskutert opp og ned om ferjer til og frå Tysnes. Møte har vore organiserte og haldne, folk har fortvila forsøkt på å få svar på spørsmåla sine rundt dette temaet, men Hordaland fylkeskommune og Skyss er tause. Dei vil ikkje plagast med slikt frå distrikta.Her er det politikarane i fylkeskommunen som fylgjer opp initiativa frå sentralt hald, og har tildelt...

To løp på ei veke

Løpssesongen har starta igjen, og Pernilla Eugenie Epland er allereie godt i gang.Onsdag sprang ho 1500-meter under Trond Mohn Games i Fana. Der enda ho opp på ein sjetteplass, med tida 4.26.87.– Eg visste at desse som kom utanlandsfrå hadde ganske gode tider å visa til. Det var ikkje noko poeng for oss norske å henga oss på, seier Epland.Dermed blei løpet todelt frå...