POPULÆR ARTIST: Som i 2016 klarte Trine Rein laurdag å selja ut Mandelhuset. Med seg hadde ho gitarist og keyboardist Aleksander Sjølie.
POPULÆR ARTIST: Som i 2016 klarte Trine Rein laurdag å selja ut Mandelhuset. Med seg hadde ho gitarist og keyboardist Aleksander Sjølie.

Fylte Mandelhuset

Publikum storkosa seg då Trine Rein spelte på Mandelhuset laurdag kveld.
Publisert 17.02.2019 kl. 18.29. Oppdatert kl. 18.40.

– Dette var veldig kjekt, og det er ei ære å få ta del i dette, seier Patrick Russell Madsen.

Den daglege leiaren ved Mandelhuset er i strålande humør etter konserten med Trine Rein laurdag kveld.

– Eg er veldig glad når ting fungerer og det er fullt hus, fortel han.


Retur

For fullt hus var det då Trine Rein stod på scenen på Mandelhuset, og stemninga var på topp gjennom heile settet. Konserten hadde vore utseld fleire dagar i forvegen, noko som også var tilfelle då Rein sist besøkte Tysnes, i 2016.

– Eg har vore her eingong før, og då var me klinte oppi eit hjørne, fortalde ho, etter opningslåta «Do You Really Wanna Leave Me This Way», og peika bak i lokalet frå scenen.

– Så gratulerer med utvidinga av Mandelhuset, sa ho vidare.


Éin musikar

I 2016 kom ho til Tysnes med fullt band, men laurdag var det eit meir nedstrippa lydbilete. Med seg hadde ho berre musikaren Aleksander Sjølie, som trakterte både gitar og piano, og var med og song på fleire av låtane.

– Når eg berre har med meg éin musikar, så er det heilt avgjerande at eg har ein så dyktig person med meg. Multimusikarar som Aleksander ser ettertrakta og står høgt i kurs, seier Trine Rein sjølv, etter konserten.


Varierte låtar

Sjølv utan fullt band klarte Sjølie sin imponerande gitarspeling og Rein si kraftfulle stemme å fylla Mandelhuset med både fengjande «upbeat»-låtar, og rolegare balladar.

Publikum var fullt med, og allsongen runga mellom anna på megahiten «Just Missed The Train» og coverlåten «Torn». Sistnemnte er ein låt som Rein laga sin versjon av tilbake i 1996, eitt år før låten fekk sitt internasjonale gjennombrot då australske Natalia Imbruglia laga sin coverversjon.

Det vart også god stemning då Rein sette i gang sin versjon av Elisabeth Andreassen sin legendariske låt «Danse Mot Vår», som Rein tidlegare i år framførte på TV-programmet «Hver Gang Vi Møtes».

LES OGSÅ: – God stemning frå start til slutt


Aktuell artist

For Trine Rein har vore å sjå på TV-skjermen dei siste vekene. Saman med Petter Katastrofe, Sol Heilo, Tom Mathisen, Maria Haukaas Mittet, Lars Bremnes og Elisabeth Andreassen, er Rein med på den åttande sesongen av «Hver Gang Vi Møtes», eit program der artistane møtast og speler kvarandre sine låtar.

– Det er ordentleg kjekt å presentera ein artist som er såpass aktuell, og på TV i beste sendetid, seier Madsen.

TV 2-programmet vert sendt på laurdagar, og Rein takka publikum for at dei valde å gå på konsert i staden for å sjå henne på TV.

– Eg trur det går reprise i morgon, sa Rein, til humring frå salen.


Nøgde publikummarar

Som i 2016, gjekk publikum nøgde frå konserten laurdag, og det var ikkje langt mellom god-orda blant dei frammøtte.

– Ho var veldig flink, og det var ein kjempeflott konsert, fortel Jorunn Opdal, som var til stades med Aashild Årsvoll.

– Eg har berre sett ho på fjernsynet tidlegare, så dette var heilt topp, seier Årsvoll.

Dei synast begge at det er flott med konsertar og at det skjer ting i lokalmiljøet.

– Det er kjekt at det skjer ting og at folk kjem seg ut, er dei begge samde i.

Også hovudpersonen sjølv er godt nøgd med showet.

– Det var veldig hyggeleg, og det var eit godt og lyttande publikum. Også er det veldig flott personell her, seier Rein.

Sjølv om ho har stått på langt større scener enn den på Mandelhuset, trivst ho godt på mindre stader.

– Det er kjekt å koma tett på publikum slik ein gjer her, fortel artisten.

LES OGSÅ: Symra ute med tre nye låtar og EP


Siste saker Gå til framsida

Vegstenging - Myrdal

Vegen til Myrdal vert stengt fredag 22. mars mellom klokka 0800 og 15.00 på grunn av vegarbeid. Gjeld for for privatbilar på strekkja ovanfor Hagen. Brann og ambulanse får passera.