SIGER: J12-laget kunne jubla etter storsiger mot Bjarg. Bak frå venstre: Anna Haaland Haugsgjerd, Tora Nødland Austvik, Ingvil Vermedal, Alma Vermedal og Milena Titoka. Framme frå venstre: Malene Lygre Kongsvik, Louise Vermedal Lunde, Elise Sørhus Dalen og Camilla Matre Rosseland. (Foto: Trine-Lise Aasen)
SIGER: J12-laget kunne jubla etter storsiger mot Bjarg. Bak frå venstre: Anna Haaland Haugsgjerd, Tora Nødland Austvik, Ingvil Vermedal, Alma Vermedal og Milena Titoka. Framme frå venstre: Malene Lygre Kongsvik, Louise Vermedal Lunde, Elise Sørhus Dalen og Camilla Matre Rosseland. (Foto: Trine-Lise Aasen)

Storsiger for Jenter 12

Fleire Tysnes-lag har vore i aksjon på handballbanen i helga.
Publisert 19.02.2019 kl. 19.41.

– I ein sånn kamp er det fint at me får øvd oss litt i ulike posisjonar, og at fleire av spelarane får mykje speletid, fortel Geir Austvik.

Han er trenar for Tysnes IL sitt Jenter 12-lag, som laurdag reiste til Bergen for å møta Bjarg 4. Tysnes-jentene hadde full kontroll frå start til slutt. Til pause stod det 0–13, og sluttresultatet vart 5–23.

– Det vart igrunn lett match, men me får likevel øvd oss ganske bra. Jentene byrjar å verta ganske gode, fortel trenaren.

J12-laget har vunne 13 av 15 kampar så langt i sesongen, og kjempar dermed med Løv-Ham 2 og Kjøkkelvik 3 om å vinna serien til slutt.

– No har jentene vinterferie, før dei siste fem kampane i mars. Det vert fem spennande kampar der me har moglegheit til å verta avdelingsleiar. Det ligg an til at det vert seriefinale mot Løv-Ham siste helga i mars, seier Austvik.

Alle dei resterande kampane til Jenter 12 vert spelt heime i Tysneshallen.


J15-siger

Austvik er også trenar for Jenter 15-laget, og melder at også dei fekk seg ein siger i helga, då dei spelte borte mot Nordre Fjell. Trenaren hadde på førehand varsla at det ville verta ein tøff kamp, men laget gjorde jobben, særleg takka vera ein god start på oppgjeret.

– Dei fyrste 18 minuttane er noko av det beste me har prestert, og me leia då med ni mål. I denne perioden hadde me eit godt forsvar, solid keeper og flotte angrep, fortel Austvik.

Heimelaget kom så meir inn i kampen, og det stod 6–12 på resultattavla til pause.

– Me gjer ikkje noko særleg god andreomgang. Både spelarane, og eg som trenar vert litt frustrerte og sure, seier han.

Laget heldt likevel unna, og resultat vart til slutt 15–21 i favør Tysnes.


Fleire lag i aksjon

Damelaget til Tysnes IL har hatt ein brukbar sesong, men fekk det tøft borte mot Lindås søndag. Nordhordlendingane ligg på andreplass på tabellen, og kjempar om opprykk.

Heimelaget var best i begge omgangar, og slo Tysnes med siffera 34–20.

Også Jenter 11 var i aksjon i helga. Søndag spelte dei to kampar i Haukelandshallen i Bergen. I fyrste kampen hamna dei under 5–7 til pause mot Årstad 2, men kjempa seg inn i kampen og sikra uavgjort 11–11.

Litt seinare same dag spelte J11-laget mot Fana 7. I denne kampen stod det 5–5 til pause, før tysnesingane drog i frå i andre omgang og vann 15–11.


SKOT: Jentene har fem heimekampar igjen av sesongen, og kjempar heilt i toppen i avdelinga. Her er det Louise Vermedal Lunde som fyrer av eit skot mot Bjarg. (Foto: Trine-Lise Aasen)
SKOT: Jentene har fem heimekampar igjen av sesongen, og kjempar heilt i toppen i avdelinga. Her er det Louise Vermedal Lunde som fyrer av eit skot mot Bjarg. (Foto: Trine-Lise Aasen)

Siste saker Gå til framsida

Lesarbrev: Hugs valdagen den 9. september

Det er ei dårleg demokratisk innstilling å ikkje stemma ved eit val. Same om du er noko ueinig med dei ulike partia, så er det alltid eit parti det kan vera greitt å gje si stemme til. Me i Tysnes FrP meiner me har eit godt valprogram, som seier noko om det som må bli betre i Tysnes kommune.Tysnes FrP er svært opptatt av at det ikkje må bli reduksjon i talet på ferjeanløp til og frå...

Klar for kommunal praksis

Jon Agnar Leirvik skal det neste halve året bu og arbeida på Tysnes, som ein del av statsvitskapsutdanninga.