HYTTE: Om du er heldig, kan denne bli din. (Foto: Vetle Mikkelsen)
HYTTE: Om du er heldig, kan denne bli din. (Foto: Vetle Mikkelsen)

Skulekorpset freistar med hytte som gevinst

Tysnes skulekorps byrja ferien med seminar. Snart er det også duka for basar.
Publisert 05.03.2019 kl. 06.01.

– Me hadde seminar sist helg, med både gruppeøvingar og fellesøvingar, seier Astrid Belt, styremedlem i Tysnes skulekorps.

Fredag hadde skulekorpset ei god økt med instruktør Yngve Nikolaisen. Laurdagen blei det gruppeøvingar og fellesøvingar med Yngve, Nora Nikolaisen, dirigent Nick Hughes og Linn Pauli.

Sistnemnde er tilsett som slagverkslærar i kulturskulen, og pendlar til øya fleire gongar i månaden for å undervisa.

Framover skal korpset fortsetja med å ha to faste øvingar i veka.


Basar i Vonheim

Skulekorpset går i desse dagar inn i ei travel tid, med mykje øving, blant anna i høve basaren korpset arrangerer i vår.

10. mars går Tysnes skulekorps sin årlege basar av stabelen. Dei som tar turen til Vonheim den dagen kan gleda seg til å høyra resultatet av korpset sine mange øvingar.

– No har medlemene i eit par veker vore ute med loddbøker dei skal selja. Me kjem til å sitja på Triangelen dei neste vekene, seier Astrid Belt, og legg til at loddsalet blir avslutta på basaren.


Spenstige premiar

Ifølgje Belt vil det vera mange flotte gevinstar til dei heldige vinnarane på basaren.

– Dei siste åra har me selt enormt med lodd, fordi Øystein Dalland har laga flotte, små dokkehus. Me tenkte me måtte prøva å ha ein god gevinst, sjølv om han ikkje har ungar i korpset lenger, seier ho.

Derfor kan skulekorpset i år freista ein heldig vinnar med ei eiga, lita hytte.

Hytta er kjøpt og stilt ut hos Tysnes Blomster og Interiør, og er måla, innreia og dekorert av foreldre på dugnad.


Travelt og spennande

Våren er som nemnt ei travel og spennande tid for korpset, og basaren er ikkje det einaste som ventar rundt hjørnet.

– Me skal vera med på Tysnes musikklag sitt korpstreff onsdag 20. mars. Helga etter er det Hordablæsten, seier Belt.

– Og så blir det full rulle mot NM i skulekorps i juni. Det er ei travel tid for korpset, men ei kjekk tid, avsluttar ho.


Siste saker Gå til framsida

Saknar du sofaputa di?

Denne grøne puta blei tysdag føremiddag observert einsam og forlaten i vegbanen på Onarheimsfjellet. Designet er ikkje siste skrik, så den førebelse teorien er at puta kan ha vore ein del av eit tilhengjarlass, på veg mot den sikre død i Eredalen. Men om nokon likevel skulle sakna puta, kan den hentast hos «Tysnes» i Teiglandsvegen 5. Enn så lenge har den fått ein ny sjanse.

Startar prosessen med grunnkjøp til ny barnehage

Kommunestyret har tidlegare vedtatt å byggja ny barnehage på Onarheim. Totalt sett er kostnadsramma på 36,6 millionar kroner, og allereie neste år har kommunen sett av over 13 millionar kroner til prosjektet i investeringsbudsjettet.I år er det også sett av litt midlar for å koma i gang med prosjektet, og i førre kommunestyremøtet diskuterte politikarane grunnkjøp. Politikarane gjekk...