FORLET POLITIKKEN: Arve Belt blir ikkje å sjå i kommunestyresalen etter valet. Det blir heller ikkje andre Venstre-representantar. (Arkivfoto: Øyvind Bjerkestrand)
FORLET POLITIKKEN: Arve Belt blir ikkje å sjå i kommunestyresalen etter valet. Det blir heller ikkje andre Venstre-representantar. (Arkivfoto: Øyvind Bjerkestrand)

Venstre stiller ikkje liste i Tysnes

Til liks med 14 andre kommunar i nye Vestland, blir Tysnes utan Venstre-liste i det komande valet.
Publisert 06.03.2019 kl. 15.00.

– Eg høyrer eit rykte om at de ikkje stiller liste i år?

– Det stemmer. Me klarer ikkje å få folk til å stilla, seier Arve Belt, kommunestyrerepresentant for Venstre i Tysnes.

Trass forsøka, har det altså ikkje lukkast lokallaget å stilla liste.

– Me som har vore aktive til no har ikkje sjanse til å fortsetta. For min eigen del blir det for travelt å driva næringsverksemd og å vera politikar, seier Belt.

I tillegg har ein del av dei som stod på lista ved sist val forlate partiet.


Har slite før

Belt har ikkje spekulert for mykje rundt kvifor det har blitt som det har blitt.

– Venstre har tidlegare slite med å fylla listene på Tysnes. Det har vore vanskeleg i utgangspunktet, seier kommunestyrerepresentanten.

– Eg synest det er veldig synd. Personleg kunne eg gjerne tenkt meg å fortsetta, men tida strekk ikkje til.

Belt er likevel tydeleg på at dette ikkje betyr undergang for Tysnes Venstre.

– Me legg ikkje ned partiet. Me berre leverer ikkje liste til kommunevalet. Eg har eit håp om at det kan ta seg opp igjen seinare. Partiet består, seier Belt.

Han har ein mistanke om at også fleire andre parti slit med å fylla listene, ettersom Tysnes er ein ganske liten plass.


Veldig lærerikt

Belt trur likevel at mange fleire hadde hatt godt av å prøva seg i lokalpolitikken.

– Det har vore kjempeinteressant å vera med. Eg har sete i åtte år, først i landbruk/teknisk og så i kommunestyret.

– Dette er noko alle innbyggarane i ein kommune bør vera innom. Det er veldig lærerikt, meiner han.


Sunt med breidde

Også ordførar Kåre Martin Kleppe (H) synest det er synd Venstre ikkje stiller liste i år.

– Venstre har vore ein god samarbeidspartnar, og eg skulle gjerne ha sett at dei stilte liste til valet i haust. Det er sunt med breidde blant partia, seier Kleppe.

Han er usikker på korleis det vil slå ut på valresultatet.

– Det er umogleg å seia. Me får sjå når den tid kjem, avsluttar ordføraren.


Siste saker Gå til framsida

Lesarbrev: Tommelen opp for SommarTrimTysnes!

I sommer har jeg latt meg inspirere av Sommartrimmen til mange ulike turer på den vakre øyen vår. Ikke visste jeg at vi hadde så mange fantastiske fjelltopper med storslagen utsikt i alle himmelretninger. Det har vært en sann fornøyelse å prøve ut mange av de 35 turforslagene som inngår i Sommartrimmen. Og jeg er mektig imponert over alle de ulike stiene og toppene som har gitt meg...