VIKTIG BIDRAG: Med ti mål var Thea Sløgedal sentral i sigeren over Sandviken søndag. (Arkivfoto: Camilla Korsnes)
VIKTIG BIDRAG: Med ti mål var Thea Sløgedal sentral i sigeren over Sandviken søndag. (Arkivfoto: Camilla Korsnes)

Kontrollert siger for Tysnes-damene

Damelaget opna mars månad med ein sterk bortesiger mot Sandviken.
Publisert 06.03.2019 kl. 12.54.

Etter tre strake tap mot høvesvis Kjøkkelvik, Åsane og Lindås, kunne Tysnes sitt damelag igjen jubla over siger og to poeng mot Sandviken søndag. Sist tysnesingane vann var nettopp mot Sandviken i Tysneshallen i midten av januar.

– Det var ein greitt gjennomført kamp, fortel trenar Sveinung Halvorsen.


Kontroll

Med siffera 10–16 til pause, og 21–30 til full tid, hadde Tysnes god kontroll på Sandviken gjennom heile kampen i Åstveithallen, noko trenaren også stadfestar.

– Eg følte me hadde god kontroll på Sandviken allereie før pause. Me spelte rett og slett betre enn dei, seier han.

Det vart dermed ein solid siger, og fyrste gong sidan kampen mot Viking TIF i november at Tysnes-damene passerte 30-målsgrensa i ein kamp.

– Me er glad for sigeren og poenga, og sjølvtilliten denne kampen gjev jentene vidare, seier Halvorsen, som samtidig fortel at laget hadde mykje å gå på.

– Det er god innsats, og me står godt i forsvar, men me sleit med å få angrepsspelet til å flyta, fortel han.


Forsterkingar

To av dei sentrale spelarane søndag var Thea Sløgedal og Linn Bergesen, som begge var tilbake på laget etter å ha vore vekke i store delar av sesongen.

– Thea og Linn tilfører ein del rutine og tryggleik i laget, fortel trenaren.

Sløgedal vart også den mestscorande for Tysnes med ti mål mot Sandviken.

– Ho studerer i Stavanger, men var heime på vinterferie i helga. Det er veldig kjekt at ho vil vera med når ho har høve til det, seier Halvorsen.


Tre kampar igjen

Damelaget står dermed med seks sigrar og ni tap så langt i sesongen, og har berre tre kampar igjen.

– Neste kamp, heime mot Kleppestø, er ein kamp me skal vinna. Deretter venter to vanskelege kampar mot Voss og Bjarg, fortel trenaren.

Tysnesingane passerte Sandviken på tabellen med sigeren søndag, og ligg dermed på sjetteplass, av tolv lag. Tysnes har ei teoretisk moglegheit til å klatra til femteplass, men ligg tre poeng bak Fana.

Halvorsen er alt i alt nøgd med korleis sesongen har utvikla seg.

– Det har vore ein sesong litt som forventa. Me mista ein del spelarar frå i fjor som var stammen i laget. Denne sesongen har me hatt eit ungt lag. Dei kjempar godt og er ein talentfull gjeng, men manglar rutine på seniornivå. Då er det ekstra kjekt at for eksempel Linn (Bergesen) kjem tilbake og tilfører rutine i laget, avsluttar trenaren.


Siste saker Gå til framsida

Leiar: Tysnes Kraftlag er eit historisk namn som bør vidareførast

Tysnes Kraftlag er eit gamalt og godt innarbeidd namn så vel i lokalsamfunnet som utanfor kommunen sine grenser. I over 70 år har Tysnes Kraftlag eksistert som straumleverandør og netteigar på Tysnes. No har selskapet gått inn i ein ny epoke. Spørsmålet som no har meldt seg, er om selskapet bør skifta namn. Det bør det ikkje.Det var ei skikkeleg storhending som skjedde på Tysnes den...