FORNØGDE: Elin Vevatne, Eli Johnsen og Helga Kristine Haaland sette pris på dei musikalske innslaga, og kunne alle songane.
FORNØGDE: Elin Vevatne, Eli Johnsen og Helga Kristine Haaland sette pris på dei musikalske innslaga, og kunne alle songane.

«Schlager og Kanari» i Lunde: – Alt var heilt supert!

Onsdag vitja bokbåten Lunde. På kvelden var det duka for gamle slagerar.
Publisert 07.03.2019 kl. 17.00.

– Me har eit program som me kallar Schlager og Kanari, med songar frå 30-, 40-, 50-, og 60-talet, sa musikar Ingvild Storhaug til «Tysnes» før konserten onsdag.

– Den perioden då trekkspelet var kulast! la kollega og trekkspelspelar Lena Rist-Larsen til.

I desse dagar er dei to slagerdamene på ein slags vestlandsturné. I dagane etter konserten i Lunde venta fem konsertar i Kvinnherad.


Flott på Tysnes

Det var heller ikkje første gong Storhaug har funne vegen til Gudeøya:

– Eg har vore på turné med bokbåten, så eg har vore på Tysnes før, sa Storhaug.

– Eg har aldri vore på bokbåten før! Eg er heilt premiereklar, følgde Rist-Larsen opp, og la til at dette òg var Tysnes-debuten hennar.

Dei beskreiv køyreturen til Lunde som ein tur gjennom ein eventyrskog; øya gjorde tydeleg inntrykk på dei tilreisande.

– Og så er det nærleiken til havet. Me får alltid ein lengsel etter havet når me er i Oslo, sa Storhaug.


Imponerande spenn

Så var det i gang! I løpet av rundt 45 minutt, tok musikarane publikum med seg på ei reise i tid.

Slagerar som «Tulipaner fra Amsterdam», «Hør min sang Violetta», «Moon River» og «Når det kommer en båt med bananer» var blant innslaga.

Storhaug stod i hovudsak for vokaldelen av innslaga, men hadde òg ei rekkje bi-instrument. Rist-Larsen på si side spelte mest trekkspel, men tok seg òg ein tørn med andre instrument.

I tillegg til eit vidt spenn av instrument og songar, baud dei to musikarane på historiar om kvar enkelt song.

– Under krigen var det rasjonering, og folk lengta etter eksotisk frukt, sa Storhaug, då dei kom til kveldens siste song.

– Dei drøymde om ein båt med bananer, men måtte venta heilt til 1946 på det. Då hadde folk gått og lengta, men dei hadde òg øvd på songen til Arve Opsahl, som kom året før. Då den første bananbåten etter krigen kom til Oslo, stod det tusener der og song «Når det kommer en båt med bananer», sa ho, før ho begynte å synga songen.


God respons

Når sant skal seiast, var det ikkje det største publikumet som tok turen til bokbåten onsdag kveld. Dei som kom var likevel engasjerte, og både nynna og song med på songane.

– Me pleidde alltid å spela mange plater heime, då eg var lita. Og så spelte far min toradar, sa Eli Johnsen.

Ho og venninnene Elin Vevatne og Helga Kristine Haaland var godt nøgde med konserten.

– Det var heilt fantastisk, sa Vevatne.

– Ho var både skodespelar og songar, og hadde fin kontakt med publikum, sa Haaland, om Ingvild Storhaug.

– Alt var heilt supert! la Johnsen til.


Siste saker Gå til framsida

Debatt: Miljødiplomet til Hordaland fylkeskommune og Skyss må ned frå veggen no

I seinare tid har det vore diskutert opp og ned om ferjer til og frå Tysnes. Møte har vore organiserte og haldne, folk har fortvila forsøkt på å få svar på spørsmåla sine rundt dette temaet, men Hordaland fylkeskommune og Skyss er tause. Dei vil ikkje plagast med slikt frå distrikta.Her er det politikarane i fylkeskommunen som fylgjer opp initiativa frå sentralt hald, og har tildelt...

To løp på ei veke

Løpssesongen har starta igjen, og Pernilla Eugenie Epland er allereie godt i gang.Onsdag sprang ho 1500-meter under Trond Mohn Games i Fana. Der enda ho opp på ein sjetteplass, med tida 4.26.87.– Eg visste at desse som kom utanlandsfrå hadde ganske gode tider å visa til. Det var ikkje noko poeng for oss norske å henga oss på, seier Epland.Dermed blei løpet todelt frå...