KLAR FOR KONSERT: Bergen Vocalis kjem til Tysnes og skal framføra kjente og kjære Disney-songar. (Foto: Privat)
KLAR FOR KONSERT: Bergen Vocalis kjem til Tysnes og skal framføra kjente og kjære Disney-songar. (Foto: Privat)

Inviterer til Disney-magi for store og små

Birthe Aarland har fått koret sitt frå Bergen med til Tysnes, og er klar for familiekonsert i Vonheim laurdag.
Publisert 07.03.2019 kl. 19.00.

– Det vert masse deilig Disney-musikk, fortel ein entusiastisk Birthe Aarland.

Laurdag ettermiddag tek ho med koret sitt, Bergen Vocalis, til Tysnes for konsert i Vonheim.

– Me kjem til å framføra både gamle og nye klassikarar frå kjente Disney-filmer, seier ho, og nemner at ein mellom anna får høyra «Let It Go» frå filmen «Frost», og «Ta Livet Som Det Faller Seg» frå «Jungelboken».


Familiekonsert

Birthe håpar at mange vil koma og høyra konserten i helga.

– Me har jo lyst å framføra for folk, og me håpar alltid på fullt hus.

Ho fortel også at billettsalet ikkje har gått like godt som ho hadde håpa på, men at mykje kan skje dei siste dagane før konserten.

– Eg har høyrt at tysnesingane er litt seint ute med slike ting, seier ho med eit smil.

Både små og store er velkomne til Vonheim laurdag.

– Det er ein familiekonsert, og den passar godt for born som har byrja å få eit forhold til Disney-filmar, fortel Birthe, som også lovar at det vert moro for vaksne.

– Eg trur folk i alle aldrar har eit eller anna forhold til songar frå Disney-verda. Enten det er nyare filmar som «Frost», eller frå «Snehvit og de syv dvergene». Eg trur dette er noko alle vil ha glede av.

I tillegg til dei to filmane, lokkar ho mellom anna med musikk frå «Løvenes Konge», «Pochahontas» og «Mulan».

– Me er innom alle klassikarane, seier ho.


Tysnesing

– Eg er opphaveleg frå Bergen, men har budd på Tysnes i tolv år, fortel Birthe.

Ho var aktiv i koret medan ho budde i Bergen, men tok ein pause etter at ho flytta til Lunde. Men etter nokre år vart ho aktiv i koret igjen.

– Eg fann ut at det ikkje var noko stort problem å reisa til Bergen for å øva, fortel ho.

No reiser ho over fjorden på øving kvar onsdag.

Det er Birthe sjølv som har teke initiativet til konserten på Tysnes.

– Det er eg som har sett dette i gang. Eg har teke kontakt med folk lokalt og fått ordna med lokale, lys, lyd og scene, fortel ho.

Birthe ser fram til å få med seg koret over Bjørnafjorden, og framføring i Våge.

– Det vert kjempegøy. Eg gler meg stort til å syngja for tysnesingane.


Koret

– Neste år har me jubileum. Då har me halde på i 25 år, fortel Birthe.

Ho fortel at Bergen Vocalis er eit kor på 25 medlemmar, og med eit breidt spekter. Dei har også vore med på mykje forskjellig gjennom koret si levetid.

– Me har sunge det meste. Alt frå sakral musikk til Disney-songar og poplåtar. Me har hatt Jan Eggum innom, me har sunge for Märtha Louise og me var med og song då Flesland vart opna.

Også nyleg har koret opplevd store ting.

– Me vart invitert med til Sølvguttene sin julekonsert i Grieghallen. Det var veldig kjekt, fortel ho.

Birthe tek seg også tid til skryta av deira nye dirigent, samt musikarane som skal vera med til Tysnes.

– Dirigenten vår, Emil Kristoffersen Børø frå Griegakademiet, har løfta oss til nye høgder, og me har veldig dyktige musikarar med oss, også dei frå Griegakademiet.

For sjølv om koret i utgangspunktet er eit a capella-kor, vert det også instrumentlyd i Vonheim laurdag.

– Me har med ordentlege «Disney-instrumentar» som fagott, obo og tverrfløyte, fortel Birthe, som no gler seg stort til konserten.

– Det vert ei festframsyning med mykje Disney-magi.


LOKAL TILKNYTING: Birthe Aarland har budd på Tysnes i tolv år, og får til helga med seg koret sitt til Våge og Vonheim. (Foto: Arkiv)
LOKAL TILKNYTING: Birthe Aarland har budd på Tysnes i tolv år, og får til helga med seg koret sitt til Våge og Vonheim. (Foto: Arkiv)

Siste saker Gå til framsida

Lesarbrev: Hugs valdagen den 9. september

Det er ei dårleg demokratisk innstilling å ikkje stemma ved eit val. Same om du er noko ueinig med dei ulike partia, så er det alltid eit parti det kan vera greitt å gje si stemme til. Me i Tysnes FrP meiner me har eit godt valprogram, som seier noko om det som må bli betre i Tysnes kommune.Tysnes FrP er svært opptatt av at det ikkje må bli reduksjon i talet på ferjeanløp til og frå...

Klar for kommunal praksis

Jon Agnar Leirvik skal det neste halve året bu og arbeida på Tysnes, som ein del av statsvitskapsutdanninga.