DISNEY-TEMA: Bergen Vocalis underheldt publikum i Vonheim med Disney-klassikarar frå dei siste 80-åra.
DISNEY-TEMA: Bergen Vocalis underheldt publikum i Vonheim med Disney-klassikarar frå dei siste 80-åra.

Frå «Pinocchio» til «Frost»

Bergen Vocalis skapte Disney-magi i Vonheim laurdag.
Publisert 11.03.2019 kl. 12.14. Oppdatert kl. 12.34.

– Dette var kjempekjekt. Det er koselege lokale og det er god akustikk, fortel Birthe Aarland, som er i strålande humør etter Disney-konserten i Våge laurdag.

Folk i alle aldrar møtte opp i Vonheim for å få med seg konserten til bergenskoret Bergen Vocalis, som Birthe er ein del av. Ho har sjølv budd på Tysnes i tolv år, og såg på førehand fram til å syngja for lokale tysnesingar. Ho var godt nøgd med gjennomføringa.

– Eg håpar folk kosa seg, fortel ho.


For store og små

Sjølve konserten vart ei reise i Disney si filmverd, og koret framførte songar frå dei nyaste filmane og heilt tilbake til «Snehvit og De Syv Dvergene» frå 1937, som var den fyrste heilaftans spelefilmen til Disney. Songane vart stort sett framført kronologisk frå dei eldste filmane fyrst, og innimellom nummera fekk publikum høyra litt om historia til filmane.

På fremste rad sat Marta Dalland og mor Marita Lie Nesse, og dei kosa seg med kormusikken.

– Det var gøy, seier Marta forsiktig i pausen av showet.

– Dei er kjempeflinke, og det er mange kjente songar. Eg kjenner i alle fall igjen dei fleste, seier Marita vidare.

Dottera har ikkje like mykje kjennskap til dei eldste låtane som koret song i fyrste halvdel av konserten, men gler seg til del to. Ryktene seier at det kjem musikk frå filmen «Frost», og Marta nikkar beskjedent på hovudet då ho får spørsmål om ho har sett den filmen, og om ho er kjent med songane derfrå.

– Det vert nok nokre nyare songar etterkvart, seier Marita til dottera.


Klassikarar

Og det gjekk ikkje langt ut i del to av konserten før koret framførte songar frå «Frost» og andre nye Disney-filmar. «Let It Go» var det største høgdepunktet for mange av dei yngre publikummarane, men Bergen Vocalis skapte god stemning frå start til slutt med mange velkjente slagarar.

Det vart julestemning med «When You Wish Upon A Star» frå «Pinocchio», og mykje humor med den norske versjonen av «Under The Sea» frå «Den Lille Havfruen». Det vart også songar frå kjente filmar som «Løvenes Konge», «Pochahontas», «Aristokattene» og «Jungelboken», og publikum kosa seg gjennom to musikalske timar i Vonheim.




TYSNESING: Birthe Aarland, som har budd på Tysnes i tolv år, fekk i stand konserten med koret sitt.
TYSNESING: Birthe Aarland, som har budd på Tysnes i tolv år, fekk i stand konserten med koret sitt.
KOSA SEG: Både Marta Dalland og mor Marita Lie Nesse kosa seg med konserten. – Det var i grunnen like kjekt for vaksne som for dei minste, seier Marita.
KOSA SEG: Både Marta Dalland og mor Marita Lie Nesse kosa seg med konserten. – Det var i grunnen like kjekt for vaksne som for dei minste, seier Marita.
HAVFRUE: Nokre av kormedlemmane kledde seg ut til forestillinga, og publikum fekk seg ein god latter av «den lille havfruen».
HAVFRUE: Nokre av kormedlemmane kledde seg ut til forestillinga, og publikum fekk seg ein god latter av «den lille havfruen».
MUSIKK: Sjølv om Bergen Vocalis i utgangspunktet er eit a capella-kor, hadde dei med seg flinke musikarar frå Griegakademiet til Våge.
MUSIKK: Sjølv om Bergen Vocalis i utgangspunktet er eit a capella-kor, hadde dei med seg flinke musikarar frå Griegakademiet til Våge.
KOR: Alt i alt var det 17 songarar frå koret som var med på konserten laurdag.
KOR: Alt i alt var det 17 songarar frå koret som var med på konserten laurdag.

Siste saker Gå til framsida