HYTTEVINNAR: Oliver Løvaas Helland (til venstre med mor Monica) vann hovudgevinsten på basaren søndag. Lillebror Dennis og far Ivar var også godt nøgd med overraskinga.
HYTTEVINNAR: Oliver Løvaas Helland (til venstre med mor Monica) vann hovudgevinsten på basaren søndag. Lillebror Dennis og far Ivar var også godt nøgd med overraskinga.

Oliver vann leikehytte

Søndag hadde Tysnes skulekorps basar i Vonheim med god musikk og flotte gevinstar.
Publisert 12.03.2019 kl. 17.14.

– No må du koma ut, så skal eg visa deg noko, seier Arve Belt til unge Oliver Løvaas Helland, som står i døropninga heime saman med far Ivar Helland.

Mørket har senka seg over Våge, men det spørst om Oliver kjem til å leggja seg med det fyrste. På tilhengeren til Arve står nemleg leikehytta som var hovudgevinsten på korpsbasaren i Vonheim søndag.

Oliver får på seg sko og kle, og tuslar ut saman med faren. Etterkvart kjem også lillebror Dennis og mor Monica. Det tek litt tid før han skjøner kva som har skjedd.

– Dette var kjempegøy, seier han til slutt.


Vann hytte

Ein time tidlegare stod Arve på scenen i Vonheim og annonserte Oliver som vinnar av leikehytta. Og då det viste seg at verken han eller familien var til stades, kom den lyse ideen om å køyra hytta dei få hundre metrane heim til familien i Våge, og dermed overraska dei på døra.

Det tok ikkje lang tid før både Oliver og lillebror Dennis fann seg til rette i hytta. Både lys og ringeklokke vart testa flittig ut, og møblane vart nøye inspisert.

– Dette toppa dagen. Det var ein veldig fin måte å overlevera hytta på, og det var heilt perfekt at det var ein på den alderen som vann, seier Arve.


Medaljeutdeling

Men korpsbasaren handla om meir enn berre utlodding av leikehytta. Mange andre gevinstar vart delt ut, både på loddbøker og på åresal. Den fyrste runden med årelotteri vart avslutta med utdelinga av ein kose-elefant.

– Det var kjekt. Eg ynskte meg den, fortel elefant-vinnar Johanne Lien Andersen, som var på basar med farmor Edel Margrete Andersen.

I tillegg til lotteri, fekk også dei frammøtte oppleva god korpsmusikk frå scenen. Onarheim musikklag og Huglo skulekorps spelte til å begynna med, medan Tysnes skulekorps hadde eitt innslag midtvegs i basaren. For skulekorpset var det også utdeling av tre-, fem- og sju- og ti-årsmedaljar. Korpsmedlemmane kom opp på scenen og fekk tildelt medaljane, og hausta velfortent applaus frå publikum.

– Dei er kjempeflinke, og all ære til Nick Hughes og Yngve Nikolaisen for den jobben dei gjer med korpset, fortel Arve Belt.


Kjekt å vera med

Ei av dei som fekk medalje var Ronja Sløgedal. Ho kunne dermed visa fram beviset på at ho har vore med i skulekorpset i tre år.

– Eg kjem i alle fall til å fortsetja nokre år til, så får me sjå om det vert ti-årsmedalje etterkvart, seier ho.

Ronja trivst godt med å vera ein del av korpset, og å spela for dei mange frammøtte i Vonheim søndag.

– Det er veldig gøy å vera med, og det er kjekt å spela fine og utfordrande songar.

Ho er også godt nøgd med innsatsen som har vorte lagt ned til basaren. I tillegg til over 50.000 kroner inntent på loddsal frå loddbøker, fekk korpset inn over 20.000 kroner under sjølve basaren.

– Me har vore veldig flinke i år, konkluderer Ronja.


MEDALJEUTDELING: Dei som har vore med i skulekorpset i tre-, fem- sju- eller ti år, fekk medalje for innsatsen. Desse sju fekk tre-årsmedaljar.
MEDALJEUTDELING: Dei som har vore med i skulekorpset i tre-, fem- sju- eller ti år, fekk medalje for innsatsen. Desse sju fekk tre-årsmedaljar.
PREMIE: Johanne Lien Andersen, som var på besøk hos farmor Edel Margrete Andersen, vann denne elefanten på årelotteriet.
PREMIE: Johanne Lien Andersen, som var på besøk hos farmor Edel Margrete Andersen, vann denne elefanten på årelotteriet.
INNSLAG: Skulekorpset spelte delar av programmet til Hordablæsten seinare i mars, og hausta god applaus frå dei frammøtte.
INNSLAG: Skulekorpset spelte delar av programmet til Hordablæsten seinare i mars, og hausta god applaus frå dei frammøtte.

Siste saker Gå til framsida

Godøysund var draumeplassen for mange

Rita Steckmest Sivertsen (52) vaks opp med somrane på Godøysund og hotellet der då familien eigde det. No har ho, broren Tom og mannen hennar, Nils Petter Sivertsen, kjøpt tilbake Godøysund og vil rydda og leggja til rette for at mange igjen kan bruka øyane der til gode naturopplevingar.