HJORTEFEST: Desse damene viste fram matkunstane laurdag. Frå venstre: Bjørg Espevik, Ingunn Lillesletten Hillesvik, Pattama Holtan, Gerd Landeråen og Reidun Myklebust.
HJORTEFEST: Desse damene viste fram matkunstane laurdag. Frå venstre: Bjørg Espevik, Ingunn Lillesletten Hillesvik, Pattama Holtan, Gerd Landeråen og Reidun Myklebust.

Stelte i stand hjortefest for heile Hålandsneset

Grendahuset var fylt til randa med fastbuande og hyttefolk då Hålandsneset jaktlag inviterte til hjortefest laurdag.
Publisert 13.03.2019 kl. 15.00. Oppdatert kl. 17.08.

– Det er viktig at me får vist at hjortekjøtet kan brukast til meir enn sosekjøt, seier Gerd Landeråen.

Damene på kjøkkenet er i gang med den siste finpussen på forrettane til hjortefesten i Grendahuset på Hålandsneset. Det er to ulike rettar som vert servert. Flesteparten har valt roastbiff av hjort, medan dei tøffaste har valt hjort tartar med vaktelegg.

I tillegg til Gerd er det Reidun Myklebust, Bjørg Espevik, Ingunn Lillesletten Hillesvik og Pattama Holtan som står for maten.

– Det tek litt tid. Det er mykje som skal stellast i stand, fortel Reidun.


Storslagen meny

For damene lokkar med ein meny verdig ein real hjortefest. Forretten med roastbiff og tartar set standarden for kvelden, og vidare ventar ei rekkje ulike rettar. Alt sjølvsagt basert på hjortekjøt.

Til hovudrett er det ulike delar grilla og sous vide-tillaga hjortekjøt med tilbehør, og tre ulike variantar av hjortegryte. Deriblant gulasjgryte og asiatisk gryte med hjortehjarta. Til dessert er det tyttebærfromasj med bær frå Hålandsneset, medan det innimellom slaga vert servert spekelår av hjortekalv, spekepølse med hjort og villsau, spekte hjortehjarta og ost frå Myrdal gard.


Kortreist og lokalt

Det er dei nære og kortreiste ingrediensane som er i fokus. Hjorten har jaktlaget sjølv skote, og så mange av ingrediensane som mogleg er sanka lokalt.

– Me har kortreist kantarell, tranebær og tyttebær, og til og med ramsløk som me har funne her lokalt, fortel Gerd.

Det er nesten osten frå Myrdal som har reist lengst av maten på hjortefesten.

– Me får verkeleg vist fram all maten me har rundt oss, seier Gerd vidare.


Fyrste gong

Gerd, Reidun, Bjørg og Ingunn er også ein del av arrangementskomiteen til hjortefesten. Det er fyrste gongen jaktlaget inviterer til hjortefest på Hålandsneset, og interessa har vore stor med over 50 påmelde deltakarar.

– Det er veldig flott å kunne samla bygda på denne måten, og det er kjekt at så mange ville koma, fortel Reidun.

Men dei tør ikkje å garantera at det vert ein årleg tradisjon med hjortefest.

– Det tek mykje tid å få i stand dette, men det er veldig sosialt og kjekt, seier Bjørg.


God stemning

I tillegg til god og eksklusiv mat, er det eit breitt program på festen med både prisutdeling, quiz, kulturelle innslag og gode jakthistoriar, i tillegg til at ein får samla heile bygda, både hyttefolk og fastbuande.

– Maten er nydeleg, men det er den sosiale biten som er det aller kjekkaste med dette. Det er kjekt å treffa att folk som eg vaks opp med, fortel Erling Lie, som er på festen med kona Margun.

Ho er ikkje i tvil om at resten av kvelden vert bra.

– Det vert ein kjempekveld. Det har aldri vore ein mislukka fest her i grendahuset, seier ho, og ektemannen nikkar og er samd.

– Det er imponerande av initiativtakarane å få til dette her, avsluttar Erling.


LUKSUSMAT: I mellom forrett, hovudrett og dessert, kunne festdeltakarane forsyna seg med eit utval av speka hjortekjøt, samt ost frå Myrdal gard. (Foto: Per Verner Aase)
LUKSUSMAT: I mellom forrett, hovudrett og dessert, kunne festdeltakarane forsyna seg med eit utval av speka hjortekjøt, samt ost frå Myrdal gard. (Foto: Per Verner Aase)
KOSA SEG: Margun og Erling Lie (t.h.), og Bjørn og Tone Elin Mørner kosa seg med god mat og godt selskap på Hålandsneset laurdag.
KOSA SEG: Margun og Erling Lie (t.h.), og Bjørn og Tone Elin Mørner kosa seg med god mat og godt selskap på Hålandsneset laurdag.
KONTROLL PÅ MATEN: Det vart servert mange rettar, og det var mykje å gjera på kjøkkenet for Bjørg Espevik og Reidun Myklebust.
KONTROLL PÅ MATEN: Det vart servert mange rettar, og det var mykje å gjera på kjøkkenet for Bjørg Espevik og Reidun Myklebust.
FULLT HUS: Over 50 personar melde seg på hjortefesten i grendahuset på Hålandsneset.
FULLT HUS: Over 50 personar melde seg på hjortefesten i grendahuset på Hålandsneset.

Siste saker Gå til framsida

TIX til Tysnesfest 2020

Tysnesfest ligg ikkje på latsida. Dagen etter at festivalen er over, slepper dei den første artisten til neste års festival.