FOR BESTO: Anette Kårstad og dottera Alma Margrete Kårstad Fauske gjekk for mor til Anette, som døydde av lungekreft for fem år sidan.
FOR BESTO: Anette Kårstad og dottera Alma Margrete Kårstad Fauske gjekk for mor til Anette, som døydde av lungekreft for fem år sidan.

Alma Margrete (5) gjekk for å heidra besto

Førre veke donerte Gerhard Alsaker 100 kroner per tur til Blåbærhaugen. Søndag lodda «Tysnes» stemninga i bakkane.
Publisert 20.03.2019 kl. 13.54. Oppdatert kl. 14.11.

– Me er på tur, og samlar inn pengar mot kreft, så dei kan kjøpa medisin, sa vesle Alma Margrete Kårstad Fauske (5).

– Og så har du ei beste som døydde av kreft, ikkje sant? la mamma Anette Kårstad til.

– Så då går me for ho.

Mor til Anette døydde for fem og eit halvt år sidan, av lungekreft. Gjennom innsamlingar som den Anette og dottera tok del i på søndag, håper ho at fleire vil få den hjelpa dei treng i framtida.

• Les også: 189.000 til kreftaksjonen frå Tysnes


Gjekk heile veka

– Me har gått heile veka, sa Hildegunn Flakke.

– Ja, me går vel eigentleg to gongar per dag, heile året, la turkamerat Helen Hystad til.

Begge trekte fram at turgåing er både sosialt og godt for helsa.

– Det er grønn resept, meinte Helen.

– Denne veka har det vore bra med folk frå heile øya, la ho til.

Dei to turgåarane skrytte òg av at det blei donert pengar for kvar tur den veka:

– Det er kjempebra! Kreft er noko som rører ved alle, sa Helen.

– Alle kjenner nokon som har hatt kreft, sa Hildegunn, før dei tura vidare.


Samla inn 1.600

– Me går for krafttak mot kreft, men me går jo her eigentleg heile tida likevel, sa Anne Britt Onarheim.

Saman med dotter Susann Onarheim og mann Gunnar Onarheim hadde ho gått turar opp Blåbærhaugen heile veka.

– Når me legg saman turane frå heile veka, trur eg familien har samla inn rundt 1.600 kroner til saman, sa ho vidare.

– Det er et veldig godt initiativ! sa ho, om innsamlinga.


Alle kjenner nokon

– Me går for å støtta ei god sak, sa Aud Marit Øvrevåge.

Avisa trefte ho saman med venninna Elin Vevatne, då dei var på veg ned frå Blåbærhaugen.

– Alle har nokon i sin omkrins som har hatt kreft, sa Aud Marit, som var på sin sjette tur for veka, då «Tysnes» prata med ho.

Til liks med fleire andre, trekte óg Aud Marit fram det sosiale aspektet ved turgåing.

– Ein treffer mykje folk.


Har hatt kreft sjølv

I starten av den siste brekka opp mot toppen, møtte journalisten Audun Magnussen og Ruth Johanne Dalland, som òg gjekk inn pengar til kreftsaka.

– Det er ei veldig viktig sak, sa Ruth Johanne.

– Eg har sjølv hatt prostatakreft. Eg er heldig som blei kreftfri, sa Audun.

– Det er rundt 5.000 menn som blir ramma i året. Viss ein oppdagar det for seint er det dødeleg, heldt han fram.

– Det er lett å ta seg ein tur for ei så god sak, sa Ruth Johanne.


Flott tiltak

– Me går for å samla inn pengar til kreftsaka. Eg har sjølv hatt kreft, og det er viktig med støtte til saka. Dette er eit flott tiltak, sa Arne Tvedt.

– Ja, det er verkeleg fantastisk bra. Me ser at det er mange som støttar saka, la kona Vigdis Frugård Tvedt til.

Arne peikte i tillegg på folkehelseaspektet med aksjonen:

– Dette er eit tiltak som får folk som gjerne ikkje hadde gått elles, til å gå på tur, sa han.


Ungane med

– Ungane var her på fredag. Heile Stjernereiso barnehage gjekk saman opp, sa Lars Trane.

Småbarnsfaren hadde med ungane Håkon (5) og Selma (4).

– Det er litt kjedeleg å gå her i dag òg, sa Selma.

– Eg har gått her tre gongar! sa Håkon.

Pappa Lars lo, og konstaterte at ungane nok hadde vore der iallfall ti gongar, sjølv om dei ikkje hugsa det i forbifarta.

– Me går fordi det er ei veldig viktig sak, la Lars til.

– Og så får me sjokolade! smilte Selma fornøgd.


MANGE TURAR: Helen Hystad og Hildegunn Flakke gjekk til Blåbærhaugen kvar dag førre veke. (Alle foto: Vetle Mikkelsen)
MANGE TURAR: Helen Hystad og Hildegunn Flakke gjekk til Blåbærhaugen kvar dag førre veke. (Alle foto: Vetle Mikkelsen)
FAMILIETUR: Anne Britt Onarheim og familien gjekk inn 1.600 kroner til kreftsaka i veka som var. Frå venstre: Susann Onarheim, Anne Britt Onarheim og Gunnar Onarheim
FAMILIETUR: Anne Britt Onarheim og familien gjekk inn 1.600 kroner til kreftsaka i veka som var. Frå venstre: Susann Onarheim, Anne Britt Onarheim og Gunnar Onarheim
PÅVERKAR ALLE: Aud Marit Øvrevåge meinte at kreftsaka er noko som rører ved oss alle. Til høgre er turvenninne Elin Vevatne.
PÅVERKAR ALLE: Aud Marit Øvrevåge meinte at kreftsaka er noko som rører ved oss alle. Til høgre er turvenninne Elin Vevatne.
HELDIG: Audun Magnussen blei kreftfri. Søndag gjekk han inn pengar til Kreftforeningen. Til høgre: Ruth Johanne Dalland.
HELDIG: Audun Magnussen blei kreftfri. Søndag gjekk han inn pengar til Kreftforeningen. Til høgre: Ruth Johanne Dalland.
FOLKEHELSE: Arne Tvedt hadde tru på at kreftaksjonen gjorde at fleire enn vanleg kom seg ut på tur. Til venstre er kona Vigdis Frugård Tvedt.
FOLKEHELSE: Arne Tvedt hadde tru på at kreftaksjonen gjorde at fleire enn vanleg kom seg ut på tur. Til venstre er kona Vigdis Frugård Tvedt.
SJOKOLADE: For Selma (5) var det litt kjedeleg å gå den same turen to gongar, men heldigvis fekk ho sjokolade som lønn for strevet. Frå venstre: Selma Trane, Lars Trane og Håkon Trane.
SJOKOLADE: For Selma (5) var det litt kjedeleg å gå den same turen to gongar, men heldigvis fekk ho sjokolade som lønn for strevet. Frå venstre: Selma Trane, Lars Trane og Håkon Trane.

Siste saker Gå til framsida