TIL TOPPS: Nick Hughes er ein etterspurt kar. Stuntet med å satsa på eit samarbeid mellom korpsa på Huglo og Onarheim vart i helga krona med gull under Hordablæsten.
TIL TOPPS: Nick Hughes er ein etterspurt kar. Stuntet med å satsa på eit samarbeid mellom korpsa på Huglo og Onarheim vart i helga krona med gull under Hordablæsten.

Samarbeid er gull

Vanlegvis skal det bruer eller tunnelar til for å knyta to øysamfunn saman. Tysnes og Huglo har klart det med korpsmusikk, og ein dirigent frå Wales. Slikt vert det resultat av.
Publisert 27.03.2019 kl. 09.11. Oppdatert kl. 09.23.

Laurdag ettermiddag gjekk medlemmene av Onarheim/Huglo samarbeidskorps av scenen i Peer Gynt-salen. Alle med store smil om munnen. Dei visste at betre enn dette kunne dei knapt gjort det. Dirigent Nick Hughes er som dei fleste veit ein sindig kar, men akkurat då var han så glad at det var vanskeleg å skjula.

– No er eg berre veldig stolt. Dette var rett og slett kjempebra. Den desidert beste gjennomkøyringa me har gjort nokon gong, stråla han på veg ut av Grieghallen, etter første dag av Hordablæsten. Vel eit godt døger seinare fall domen.


Til topps med 93

– Me visste at dette kunne halda til ei topplassering. Etter å ha vorte nummer to og tre med Onarheim dei to siste åra, var det sjølvsagt ekstra stas at me til slutt klarte å snika oss heilt til topps, poenget framfor Hordabø. Ned til Etne og Odda på tredje- og fjerdeplass var det ytterlegare to og fire poeng.

– 93 poeng er ein strålande poengsum, sjølv om me konkurrerer i klassen for generasjonskorps. Den meir utfyllande domarrapporten er også veldig i tråd med det eg sjølv kjende på. Det er noko å henta på sjølve balansen i korpset. Elles berre småplukk. Likevel nett nok til å ha ting me kan jobba vidare med. At balansen ikkje er hundre prosent er jo ikkje så rart når det er to ulike korps som berre har spelt saman fem gonger. Men under konserten i Grieghallen var det ein fryd å dirigera. Ba eg om meir, fekk eg meir. Og minst like gode svar då eg ønskte det litt rolegare, skryter han.


Travel mann

Nick Hughes er ein etterspurt kar. I tillegg til korpsa på Huglo og Onarheim, har han også fått ansvaret for to skulekorps; Tysnes og Rosendal. Sistnemnde har han nett starta med, og dei hadde ein annan dirigent under Hordablæsten.

Men dei unge og lovande korpsmusikantane på Tysnes har han fått jobba litt med. Søndag var dei klare for den store salen i Grieghallen, i kampen om plassering og poeng i 2. divisjon. Det viste seg å verta ein tøff batalje, der korpset enda sist, på ein 8. plass. Med 84 poeng var dei likevel ikkje meir enn fire poeng unna pallen.


Beste solist

– Det er litt spesielt å spela i den store salen. Eg har gjort det før saman med Tysnes musikklag, men det er aller første gongen med denne gjengen. Lyden forsvinn på eit vis, så ein får gjerne ei kjensle av å spela for lågt, seier Marte Stien frå Uggdal.

Ho spelte solistrolla på «Memory», og imponerte både publikum og domarar med trombone-spelinga si. Og sjølv om Tysnes ikkje klarte å hevda seg i sjølve korpskonkurransen, vann ho solistprisen i 2. divisjon. Og der veldig mange av dei dyktigaste musikantane går på musikkliner, har 16-åringen byrja på media og kommunikasjon på Stord vgs.

– Eg har hybel på Stord, men reiser heim på øving både med skulekorpset og musikklaget, kvar måndag og onsdag. Det kjem eg nok til å halda fram med så lenge eg har det kjekt med spelinga, seier dottera til Else Marit Særsten, ei viktig brikke i musikklaget.

– Ho er nok også den viktigaste årsaka til at eg starta med korpsmusikk.

– Kva som er bra med konkurransar som Hordablæsten?

– Veldig mykje handlar om meistring. Det er jo ikkje alle som er like flinke i handball, smiler Stien.


Retta på til NM

William Raknes Leite er berre 14 år, men har allereie vist seg som eit stort korpstalent. I Bergen i helga hadde også han ei solistrolle med trommesettet sitt. Han er ikkje i tvil om kva det er som triggar mest av alt.

– Det er den gode kjensla av å stå på scenen og visa fram det ein kan. Å få til noko heilt spesielt saman med vener og kjente i korpset. Det er heilt suverent.

Dirigent Nick Hughes var stort sett nøgd med det musikantane hans presterte. Og på ny ganske så samd med domarane.

– På ny var det snakk om balansen. Der har eg allereie tenkt på eit par grep, som kjem til å bli gjennomført i løpet av ei veke. I tillegg meinte domarane at me mangla litt på det reint rytmiske. Dette er ting me skal klara å retta opp fram mot NM i Stavanger i juni. Me treng rett og slett berre litt meir tid saman, så kjem dette til å bli veldig bra, slår Hughes fast.


SUKSESS: Samarbeidskorpset Onarheim/Huglo er ferdige med programmet sitt, og dei veit at dette vert ikkje lett å slå. Så klarte heller ingen å tukta korpset sine 93 poeng.
SUKSESS: Samarbeidskorpset Onarheim/Huglo er ferdige med programmet sitt, og dei veit at dette vert ikkje lett å slå. Så klarte heller ingen å tukta korpset sine 93 poeng.
TALENT: William Raknes Leite (14) og Marte Stien (16) gjorde begge svært gode solistjobbar. Sistnemnde sikra Tysnes skulekorps solistprisen med framifrå innsats på trombonen sin.
TALENT: William Raknes Leite (14) og Marte Stien (16) gjorde begge svært gode solistjobbar. Sistnemnde sikra Tysnes skulekorps solistprisen med framifrå innsats på trombonen sin.
I BERGEN: Her er korpsframtida på Tysnes samla i ei trapp i Grieghallen.
I BERGEN: Her er korpsframtida på Tysnes samla i ei trapp i Grieghallen.
MÅLBEVISSTE: Det spirer og gror godt i korpsmusikken på Tysnes.
MÅLBEVISSTE: Det spirer og gror godt i korpsmusikken på Tysnes.

Siste saker Gå til framsida

Turlaget på Stord vitja Tysnes

Nyleg var Stord - Fitjar Turlag på sin årlege tur til Tysnes. Dei ti medlemene som tok turen denne dagen gjekk opp frå Vadla til Tysnessåto, og deretter til Hovlandsnuten via Etlådnefjellet. Deretter ned til Vasstølen og parkeringsplassen ved Skaret. – Planen var ifylgje programmet å gå enten berre til Såto eller Nuten, men i det fine veret denne dagen, var det ynskje frå gruppa om å ta...