KJEMPA GODT: Maria Lillesletten Hagen og dei andre Tysnes-spelarane får ros av trenaren etter kampen mot Bjarg.
KJEMPA GODT: Maria Lillesletten Hagen og dei andre Tysnes-spelarane får ros av trenaren etter kampen mot Bjarg.

Gjorde trenaren stolt

Damelaget viste bra stå-på-vilje mot Bjarg fredag kveld.
Publisert 30.03.2019 kl. 16.57. Oppdatert 01.04.2019 kl. 10.09.

Handballsesongen går mot slutten, og Tysnes IL sitt damelag har gjort unna sin siste kamp denne våren. Med Bjarg som gjester i Tysneshallen måtte dei til slutt sjå seg slått 19-24, men eit tap treng heldigvis ikkje vera synonymt med sure miner.


Frimerke

Det fyrste målet i kampen vart sett inn av Tysnes, på straffe. Bjarg svara, og kom kjapt opp i 1–3-leiing. Heimelaget fekk så utlikna til 3-3, men etter dette var gjestene i tet resten av kampen.

Det energiske Bjarg-laget hadde strategien klar, og eit av tiltaka var å setja frimerke på Kristin van der Meeren. Ho er den spelaren i pulja som har scora flest mål per kamp (7,9), og til saman har det blitt heile 119 mål.

Dette var eit irriterande trekk, men heimelaget greidde likevel å halda bra tritt med blåtrøyene. Fleire gonger var dei nærme ei ny utlikning, men gjestene fekk sikra seg eit forsprang til pause (12-16).


God publikumsstøtte

Før pausen pådrog ein Tysnes-spelar seg raudt kort i ein forsvarssituasjon, og måtte setja seg på tribunen. Heimelaget hadde knapt med innbytarar, og samtlege spelarar fekk med andre ord kjørt seg godt denne kvelden. Då hjelpte det med støtte frå ein solid publikumsgjeng, som hylte av begeistring når Tysnes viste fine prestasjonar.

Men håpet om heimesiger svann etterkvart som minuttane gjekk. Bjarg var det beste laget på banen, og midtvegs i omgangen stod det 14-20 på tavla. Dette var uansett eit oppgjer med god underhaldningsverdi, og publikum var «med» heile vegen.

Kampen enda 19-24, og nøgde Bjarg-spelarar kunne hasta av garde til ferja med to poeng i bagasjen.


– Gøy kamp

Då tysnesdamene spelte i Bjarghallen før jul, blei stillinga 30-16. Målskilnaden denne gongen vart med andre ord vesentleg mindre, og laget har god grunn til å vera nøgd med innsatsen mot opprykksklare Bjarg.

– Me tapte, men det var ein gøy kamp, kommenterer Sveinung Halvorsen til «Tysnes» etter kampslutt.

Han rosar laget for god innsats:

– Dette var siste kampen vår, og planen var å gi jernet. Det synest eg me gjorde. Kristin fekk frimerke på seg, men sånn er «gamet». Me fann mange gode måtar å løysa det på, seier han.

– Eg håpar publikum likte kampen. Eg er stolt av jentene i dag.


Håpar på fleire spelarar

Tysnes IL sitt damelag legg no bak seg ein veldig ujamn sesong, med sju sigrar og ti tap. Det gjev 7. plass på tabellen.

Laget har mange unge spelarar, og i tillegg har det ifølgje trenaren vore ei utfordring å stilla mannsterke på kampane.

– Me har ein sårbar stall, seier Halvorsen.

Litt rekruttering har det likevel vore. Nyleg byrja nemleg Oda Skaten Aarbakke på laget.

– Det er kjekt med nye, unge spelarar. No håpar eg det kjem spelarar frå Jenter 15, me er litt for få på laget.

– Blir du med vidare?

– Det spørst om dei vil ha meg, smiler han lurt, og legg kjapt til:

– Eg stiller!


FLYGAR FRÅ VING: Julie Bakke (midten) følger med på lagveninna Hannah Halvorsen sitt målforsøk.
FLYGAR FRÅ VING: Julie Bakke (midten) følger med på lagveninna Hannah Halvorsen sitt målforsøk.
MANGE STRAFFER: Bjarg-spelar Hilde Hatlestad sette inn heile fem mål frå 7-meteren.
MANGE STRAFFER: Bjarg-spelar Hilde Hatlestad sette inn heile fem mål frå 7-meteren.

Siste saker Gå til framsida

Fylte gymsalen med song

Viss nokon lurte på kva dei høge lydane på Reiso var rundt lunsjtider sist fredag, var det berre elevane ved Uggdal skule som song så taket nesten løfta seg.

Leiar: Bomskot å føreslå nedlegging av landbruk/teknisk

Framstegspartiet sin representant i formannskapet, Magnar Solheim, føreslår å leggja ned utval for landbruk/teknisk. Det er eit bomskot.I sist møte i formannskapet fortalde Solheim at hovudårsaka til at han har sendt inn ein slik førespurnad, eller eit ønske, er saksmengda og måten å behandla saker i...