SONGFUGLAR: Her ser me sopranane under øving i OnarTun. Frå venstre: Lise Skjåk Dalen, Eli Johnsen, Hildur Heie, Benedikte H. Nygård, Eva Storetvedt Lien, Astrid Thomassen, Loreta Jociene, Beate Kildal Rønning, Ingunn Myklebust og Ingjerd Tveit. (Foto: H.O.D)
SONGFUGLAR: Her ser me sopranane under øving i OnarTun. Frå venstre: Lise Skjåk Dalen, Eli Johnsen, Hildur Heie, Benedikte H. Nygård, Eva Storetvedt Lien, Astrid Thomassen, Loreta Jociene, Beate Kildal Rønning, Ingunn Myklebust og Ingjerd Tveit. (Foto: H.O.D)

Korkafé med spennande meny

Komande søndag inviterer Tysnes kammerkor til korkafé i Vonheim. Publikum kan sjå fram til eit variert program med mykje song og musikk.
Publisert 01.04.2019 kl. 06.00.

Koret skal framføra to avdelingar, og kan lokka med alt frå «Liten fuggel» av Vamp til «Aks av gull» (Fields of gold), signert Sting. «Laudate» og «Ormen Lange» er andre godbitar på programlista.

– Eit vakkert stykke av Georg Friedrich Händel får publikum òg høyra, og i tillegg skal ein solist i aksjon med «Ved havet», som Helene Bøksle har gjort stor lukke med, fortel kormedlem Hans Ole Dalland til «Tysnes».


Allsong og åresal

Og det er ikkje berre kammerkoret som skal underhalda neste søndag. Anders Bakke og Endre og Eirik Hodneland er hyra inn som musikalske krefter, noko som er til stor inspirasjon for koristane.

– Dei har alltid mykje å by på, og dei er dyktige musikalske formidlarar. Anders skal også leia allsongen, noko han meistrar svært godt. Det viste han på ein overtydande måte med «maratonallsongen» under Tysnesfest i fjor.

På menyen i Vonheim står elles åresal, matpause med kaffi og kaker, og nokre song- og musikkinnslag utanom koret sine to avdelingar.

– Koret vonar mange møter fram til ei triveleg stund i ungdomshuset, seier Dalland.


Nye medlemmar

Kammerkoret er ifølgje Dalland inne i ein aktiv og innhaldsrik vårsesong.

– Etter arrangementet i Vonheim tek koret turen til Huglo siste tysdag i april og arrangerer kulturkveld der. Neste opplegg vert felles konsert med fleire andre kor under eit arrangement i Trengereid i byrjinga av mai. Siste helga i mai skal koret vera med på stor korfestival i Haugesund, og elles kjem fleire av medlemene til å ta del i dugnad under Tysnesfest, fortel Dalland.

Han kan også opplysa at kammerkoret har fått fleire nye medlemmar.

– Det har tilført koret ny vitalitet og glød, noko som er eit viktig grunnlag for det vidare arbeidet for ein sentral kulturberar i lokalsamfunnet.


Siste saker Gå til framsida