INTIMKONSERT: Sigvart Dagsland er ein ettertrakta artist, og i helga spelte han og kona på Haaheim for fyrste gong. (Alle foto: Camilla Korsnes)
INTIMKONSERT: Sigvart Dagsland er ein ettertrakta artist, og i helga spelte han og kona på Haaheim for fyrste gong. (Alle foto: Camilla Korsnes)

Fylte Haaheim to dagar på rad

Sigvart Dagsland og Karoline Krüger leverte to stemningsfulle konsertar på Haaheim i helga.
Publisert 02.04.2019 kl. 15.27. Oppdatert kl. 19.20.

I 2017 spelte det musikalske ekteparet for ei fullsett Onarheim kyrkje. Denne gongen stod Haaheim Gaard for tur, noko den populære duoen hadde sett fram til.

– Me har høyrt om denne staden og gledd oss, sa Karoline Krüger til publikum innleiingsvis fredag kveld.

– Det innfrir! la ho smilande til.


– Ein stor suksess

Konsert og fem-rettars middag stod på programmet både fredag og laurdag, og alt var utseld på førehand.

Husfar Torstein Hatlevik er strålande nøgd etter helga.

– Dette vart ein stor suksess. Gjestene var veldig betatt, seier ein entusiastisk Haaheim-eigar.

Totalt var det kring 115 publikummarar i konsertsalen på Haaheim begge dagar, blant dei mange tilreisande gjester.

– Romma blei selde ut på eit par dagar i oktober-november. Resten av billettane trur eg gjekk unna på tre-fire dagar, seier Hatlevik.


Kjem tilbake

Haaheim Gaard er i desse dagar i full gang med å planleggja programmet for hausten og vinteren.

– Folk kan allereie no gle seg til at Karoline Krüger og Sigvart Dagsland kjem tilbake i 2020, røper han.

Men før det står andre kjende artistar på programmet. Om vel ei veke kjem Bjarte Hjelmeland til Haaheim, med både intimkonsert og Terje Vigen. Her er det framleis ledige plassar. Seinare i vår kjem både Helene Bøksle, Ingvard Wilhelmsen og Roar Brekke.


Siste saker Gå til framsida