VISTE FRAM SKOTARMEN: Annica Reimdal Vee og resten av Tysnes-jentene kjempa godt mot Sædalen i fyrste kamp i fylkesmeisterskapen. Annica scora fire mål mot Sædalen og vart seinare på dagen Tysnes sin toppscorar mot Os/Nore Neset 2 med seks mål.
VISTE FRAM SKOTARMEN: Annica Reimdal Vee og resten av Tysnes-jentene kjempa godt mot Sædalen i fyrste kamp i fylkesmeisterskapen. Annica scora fire mål mot Sædalen og vart seinare på dagen Tysnes sin toppscorar mot Os/Nore Neset 2 med seks mål.

Spelte jamt med fylkesmeisteren

Tysnes J15 beit godt frå seg mot dei andre avdelingsvinnarane under fylkesmeisterskapen i Framohallen laurdag.
Publisert 07.04.2019 kl. 11.02. Oppdatert kl. 11.09.

– Det er ikkje gøy å tapa, men me spelte bra, seier Marta Rocio Santillana Luna på Jenter 15-laget til Tysnes IL.

Sola skin på Framohallen i Fyllingsdalen, og det er fleire som tek seg ein tur utanfor bygget mellom kampane.

Tysnes-jentene har nettopp møtt Sædalen i den fyrste kampen i fylkesmeisterskapen for Jenter 15 på B-nivå i Hordaland. B-nivå er det nest høgste serienivået i fylket for J15-lag, og som vinnar i si avdeling i det ordinære seriespelet fekk Tysnes prøva seg mot dei to andre avdelingsvinnarane på same nivå.

Sjølv om det vart tap i den fyrste kampen, er ikkje jentene nedfor.

– Det er betre å tapa når me heng så godt med, seier Maren Jensen Nes.


Opna godt

Dagen opna med det som vart ein særs spennande handball-kamp mellom Tysnes og Sædalen, og stemninga vart stor blant dei tilreisande supportarane etter at Tysnes-keeper Emma Marie Bruntveit redda straffe allereie i fyrste speleminutt.

– Tysnes! Tysnes! Tysnes! runga det frå tribunen i Framohallen.

Anette Christensen, Brita Austvik og Annica Reimdal Vee fekk alle tidlege nettkjenningar, og gjorde at Tysnes var i leiinga i starten av kampen. Resten av den fyrste omgangen vart jamn og tett, og eit lite overtak til Sædalen midtvegs i omgangen gjorde at stillinga til pause var 9–10 i favør bergensarane.


Jamt til siste minutt

Andre omgang fortsette som den fyrste. Laga følgde kvarandre tett, og forsvarte seg godt. Med ti og eit halvt minutt igjen av omgangen vart det teke time-out på stillinga 15–16 i favør Sædalen.

Etter dette skifta kampen karakter. Det var framleis jamspelt, men ingen av laga makta å få ballen i nettet. Tysnes-jentene jobba hardt for å utlikna, men enda kampen på 15 mål. Sædalen punkterte oppgjeret med mindre enn eitt minutt igjen å spela, og då hadde det gått nesten ti minutt utan mål til nokon av laga.

Det enda 15–17 til Sædalen, men heile Tysnes-gjengen var likevel godt nøgd med kampen.

– Det kunne like godt ha vippa i motsett favør, fortel Ingebrigt Vermedal, som er ein del av trenar-teamet saman med Geir Austvik.

Keeper Emma var blant nøkkelspelarane i kampen. I tillegg til høg redningsprosent, hadde ho tre flotte strafferedningar.

– Ho er kjempegod, og ho har redda oss i ein del kamper denne sesongen, seier Ingebrigt.

LES OGSÅ: Jenter 12 er seriemeistrar


Kjekt å vera med

Før den siste kampen mot Os/Nore Neset 2, har Tysnes-jentene klare tankar om kva som skal til for å få med seg ein siger.

– Me rota litt for mykje i angrep i fyrste kampen. Me må prøva å prata litt meir i lag i neste kamp, seier Kristine Pettersen Opdal.

Uansett korleis resultatet i sluttspelet vert, er jentene godt nøgd med å ha vunne serien, og få vera til stades på fylkesmeisterskapen.

– Det er gøy å vera med. Då veit me at me har gjort det godt i år, seier Kristine vidare.

Dei trekkjer fram trenar Geir Austvik som ein viktig årsak til suksessen, og beskriv han som både streng og tydeleg, på ein positiv måte.

– Han er sjefen, seier Marta Rocio Santillana Luna.


Nytt tap

Jentene er optimistiske før den siste kampen mot Os/Nore Neset 2, men får ein tøff start på oppgjeret. Sjølv om Brita Austvik sender laget i ei tidleg leiing, og keeper Emma Marie Bruntveit leverer ei rekkje gode redningar i opningsminutta, får tysnesningane det tøft utover i omgangen.

Laget frå Os viser mykje flott handball, og med eitt står det 4–12 på resultattavla i favør osingane. Men sjølv åtte mål bak, visar Tysnes-jentene god moral og kjempar vidare. Ei straffescoring frå Annica Reimdal Vee og eit kontringsmål frå Mia Jensen Nes, samt to kjappe redningar frå Emma i målet, gjer at Tysnes framleis er med i kampen. Til pause er stillinga 11–15, og Os/Nore Neset 2 leiar berre med fire mål.

Men motstandaren vart for sterk for Tysnes sitt lag. Osingane vann med siffera 23–28, og det var dermed opp til Os/Nore Neset 2 og Sædalen å spela om totalsigeren i fylkesmeisterskapen. Det oppgjeret vann Sædalen med klar margin, og kan dermed kalla seg fylkesmeistrar for Jenter 15 på B-nivå.

LES OGSÅ: Gjorde trenaren stolt



NØGD TRASS TAP: Tysnes-jentene hadde ein god kjensle etter det knepne tapet mot Sædalen, og var nøgd med eigen innsats. Frå venstre Marta Rocio Santillana Luna, Maren Jensen Nes, Kristine Pettersen Opdal, Mia Jensen Nes, Marita Fagerbakk Lunde og Annica Reimdal Vee.
NØGD TRASS TAP: Tysnes-jentene hadde ein god kjensle etter det knepne tapet mot Sædalen, og var nøgd med eigen innsats. Frå venstre Marta Rocio Santillana Luna, Maren Jensen Nes, Kristine Pettersen Opdal, Mia Jensen Nes, Marita Fagerbakk Lunde og Annica Reimdal Vee.
PLAYMAKER: Brita Austvik styrte Tysnes sitt spel frå sentralt i banen.
PLAYMAKER: Brita Austvik styrte Tysnes sitt spel frå sentralt i banen.
NØKKELSPELAR: Emma Marie Bruntveit hadde mange gode redningar og fekk mykje skryt for målvaktsarbeidet. Dette skotet klarte ho diverre ikkje å redda.
NØKKELSPELAR: Emma Marie Bruntveit hadde mange gode redningar og fekk mykje skryt for målvaktsarbeidet. Dette skotet klarte ho diverre ikkje å redda.
ENGASJERTE: Trenarane Geir Austvik og Ingebrigt Vermedal nytta høvet til å koma med instruksar til spelaraen under time-out.
ENGASJERTE: Trenarane Geir Austvik og Ingebrigt Vermedal nytta høvet til å koma med instruksar til spelaraen under time-out.
FORSVARTE SEG GODT: Maria Andronikidu vart henta inn frå J12-laget til kampane i Framohallen, og kjempa godt mot Sædalen. Bak ho står Maren Jensen Nes, og til høgre står Malin Dalland.
FORSVARTE SEG GODT: Maria Andronikidu vart henta inn frå J12-laget til kampane i Framohallen, og kjempa godt mot Sædalen. Bak ho står Maren Jensen Nes, og til høgre står Malin Dalland.
LAGBILETE: Tysnes IL sende ein solid gjeng til fylkesmeisterskapen. Bak frå venstre: Marita Fagerbakk Lunde, Maren Jensen Nes, Marta Rocio Santillana Luna, Malin Dalland, Kristine Pettersen Opdal, Annica Veimdal Ree og Brita Austvik. Framme frå venstre: Hanna Langballe, Anette Christensen, Emma Marie Bruntveit, Elise Vermedal og Mia Jensen Nes. Maria Andronikidu og Synne Malkenes var også med på laget laurdag, men kom ikkje med på lagbiletet.
LAGBILETE: Tysnes IL sende ein solid gjeng til fylkesmeisterskapen. Bak frå venstre: Marita Fagerbakk Lunde, Maren Jensen Nes, Marta Rocio Santillana Luna, Malin Dalland, Kristine Pettersen Opdal, Annica Veimdal Ree og Brita Austvik. Framme frå venstre: Hanna Langballe, Anette Christensen, Emma Marie Bruntveit, Elise Vermedal og Mia Jensen Nes. Maria Andronikidu og Synne Malkenes var også med på laget laurdag, men kom ikkje med på lagbiletet.

Siste saker Gå til framsida