FOREDRAG: Mette Nygård Havre var onsdag på Tysnes folkebibliotek for å gje folk tips til korleis ein kan «redda» meir mat.
FOREDRAG: Mette Nygård Havre var onsdag på Tysnes folkebibliotek for å gje folk tips til korleis ein kan «redda» meir mat.

– Ein må bruka sansane sine på mat som har gått ut på dato

«Matreddar» Mette Nygård Havre vitja Tysnes folkebibliotek med gode tips for å redusera matsvinn.
Publisert 11.04.2019 kl. 16.08.

– Det er kjempegøy å reisa rundt og prata med folk, fortel Mette Nygård Havre, som onsdag var på Tysnes folkebibliotek med eit foredrag om å «redda» mat.

Tysnes-besøket er ein del av ein biblioteksturné rundt om i Hordaland, og ho skal i alt innom 17 bibiliotek i fylket.


Vil redusera matsvinn

Nygård Havre introduserte seg sjølv for publikum som grunnleggjaren av folkerørsla «Spis opp maten». Ho er aktuell med ei bok med det same namnet, og ho kallar seg sjølv «matreddar».

– Eg jobba i BIR (Bergensområdets interkommunale renovasjonsselskap, journ. anm.) i fleire år, og då skjønte eg kor mykje god mat som vert kasta, fortel ho til «Tysnes».

No jobbar ho aktivt med å redusera matsvinnet i Norge. I tillegg til bok og ein instagramkonto med over 40.000 følgjarar, jobbar ho tett opp mot matprodusentar, og det var ho som fekk Q-Meieriene til å skifta «best før»-teksten til «best før, men ikke dårlig etter».


Bevisstgjering

Det var kring 30 tysnesingar som hadde møtt opp til foredraget, noko både Nygård Havre og bibliotekssjef Mats Løve Gjersvik var godt nøgde med.

– At det er så mange som møter opp gjer det meir motiverande å arrangera liknande tilstellingar igjen, seier Løve Gjersvik.

Ei av dei som møtte fram på foredraget var Synnøve Hodneland.

– Ho fortel ein del ting som er ganske oppsiktsvekkande, seier Hodneland.

Ho reagerer mellom anna på informasjonen Nygård Havre kom med om at over 60.000 bananar vert kasta i Norge kvar dag.

– Det er ei viktig bevisstgjering, og det vert ein oppvekkar, seier Hodneland, som fortel at ho vart inspirert av tipsa til foredraghaldaren om korleis ein kan redda mat.


Bruka sansane

For i tillegg til å dela tal og faktaopplysningar kring matsvinn, som mellom anna at kvar nordmann kastar 47 kilo etande mat i året, kom Nygård Havre med ei rekkje tips til kva ein kan gjera for å kasta mindre mat. Det handla mellom anna om å planleggja handleturane, ha kontroll på kva ein har i kjøleskapet, og å kurera datoskrekk.

– Ein må bruka sansane sine på mat som har gått ut på dato. Mykje mat held seg lenge etter at datoen er gått ut, sa ho til dei frammøtte.

Sjølv om Nygård Havre har bygd seg opp mykje kunnskap om matsvinn, jobbar ho stadig med å tileigna seg meir kunnskap.

– Eg kan kanskje kalla meg ekspert, men eg har framleis mykje å læra, og eg plukkar alltid opp gode tips når eg er ute og pratar med folk, fortel ho.


Siste saker Gå til framsida