GIVANDE TUR: Johanne Dalland og Irene Dalland opplevde mykje på få dagar i Nice. Turen var frå 28. mars til 2. april, og i regi av Oppland bonde- og småbrukarlag. (Alle foto: Privat)
GIVANDE TUR: Johanne Dalland og Irene Dalland opplevde mykje på få dagar i Nice. Turen var frå 28. mars til 2. april, og i regi av Oppland bonde- og småbrukarlag. (Alle foto: Privat)

Reisebrev frå Nice

Publisert 13.04.2019 kl. 15.00.

For ei reise og ei oppleving! Me ankom Nice, Frankrike, ein torsdag formiddag. Sola sto høgt på himmelen og varma mykje betre enn den gjorde heime på Tysnes før me reiste. Me fann fort fram til kystlinja, me som kjem frå Tysnes likar vel å navigera oss ut i frå kvar kystlinja ligg?

Det var ei vakker steinstrand med allereie badande gjestar. Me sat oss ned og naut sola, varmen, sjølukta og freden. Temperaturmålaren viste 17 grader i skuggen. Herleg! Desse to-tre timane før me skulle møta resten av reisegruppa, skulle visa seg å vera dei roligaste timane me fekk fram til me sette beina på tysnesjord igjen. Klokka 17 trefte me resten av reisefølget. Alle introduserte seg, og fortalde kva dei dreiv med. Alle var relaterte til enten landbruk eller matproduksjon. Me trefte fleire kjente frå Bjørnefjorden matkultur som var på samme turen.


Anderavioli og bondebønner

Så bar det vidare på besøk til ein økologisk butikk ikkje så langt i frå hotellet. Dei samarbeidde med lokale bønder, og tok berre inn økologiske varer som hadde maks 100 kilometer reiseveg inn til butikken. Dei var opptekne av å redusera plastforbruk og selde mykje i lausvekt. Flott butikk! Felles middag om kvelden, på ein lokal restaurant som heitte «21 bønder». Ein butikk og restaurant som vart starta opp av ein mann som hadde trua på økologiske varer og mat. Samarbeidet byrja med 21 forskjellige bønder – derav namnet. Me fekk servert anderavioli og svinekotelettar.

Fredag morgon reiste me med lokalbuss til ein liten fjellgard rett utanfor Nice. Ein liten gard med cirka 15 mål grønnsaker. Nydeleg gard, med nydelege mennesker som var veldig opne og smilande. Dei hadde laga til eit stort kjøken inne i drivhuset, der me fekk servert nyplukka salat, løkgrateng med eit skinkestykke attåt og litt brød. Fantastisk mat! Me fekk vera med på å hausta mangold og bondebønner. Flotte sittegrupper inne i lokalet, der me fekk ta ein «siesta» etter maten.

For å ta eit priseksempel: ein bunt med cirka 12 mangoldblad selde dei for 20 kroner på marknaden i Nice. Dei hadde ein tilsett som hjelpte dei med innhaustinga. Inspirerande gard!


Brattlendt terreng

Laurdag reiste me lengre opp mot fjella, til ein liten gard som dreiv med ammeku. Dei hadde nedskjæringslokale der dei stykka dyra opp og laga pølser. I tillegg til ammekyrne, hadde dei oliventre og produserte olivenolje. På olivenoljeproduksjonen hadde dei rundt 200.000-250.000 kroner i året. Igjen fekk me smaka god mat og olivenolje! Garden låg i eit så brattlendt terreng at minibussen ikkje kom seg opp der, og me måtte gå siste stykket. Noko av det fyrste me la merke til i Frankrike, var dei smale og trange vegane. Nesten kvar ein bil hadde bulkar, og dei passerte kvarandre på vegar så smale at det var ufatteleg. Me har innsett at vegane me har på Tysnes faktisk ikkje er så verst!

Søndag reiste me vidare til Puget theniers. Ein liten landsby på rundt 600 moh. Her overnatta me i to netter. På veg opp til landsbyen køyrde me innom eit sauebruk som nyleg hadde bygd nedskjæringslokale og gardsbutikk. Me fekk omvising, og kunne handla i butikken. Dei hadde både grønsaker, kjøt, cider, honning, drops, ullfeller og mykje meir i butikken. Dei kunne fortelja at dei hadde store problem med ulv, og måtte ta inn saueflokken om natta for å beskytta flokken. Han hadde no rundt 650 sauar, og hadde gått ned frå cirka 800 sauar fordi han begynte med nedskjæringsannlegg, og fekk dermed meir pengar per kilo kjøt enn før.


«Trappetrinn» med grønsaker

Då me kom til Puget Theniers, besøkte me fyrst ein lokal butikk, der dei selde lokalproduserte og økologiske produkt. Etter deileg lunsj, med blant anna saueyoghurt til dessert, fekk me sjå ein gard på rundt 25 mål, i eit så bratt terreng som me aldri har sett. Grønsakene blei produsert på kvar sine «etasjar». På avstand såg det ut som store trappetrinn med grønsaker. Dei hadde ein liten traktor som kunne snu på ein-to-tre!

Alt utstyr var lite, og dei hadde betalt rundt 300.000 kroner for traktoren og alle reiskapane som dei hadde til den (harv, plog, potetsetjar, fres, med meir.) Dei hadde 300 høns som la egg, og dei hadde store uteområde oppover dei bratte fjellsidene. Ei av utfordringane deira var rovfugl, som av og til dukka opp og tok høns. Garden omsette for rundt 800.000-850.000 kr i året, og både mannen og kona jobba fulltid på garden.


Vakker natur

Måndag reiste me vidare opp mot alpene, og opplevde den mest nervepirrande bussturen me nokosinne har vore på! Fjellsidene var så bratte, og landskapet var mektig. Anbefalast for naturglade menneske! På 1300 moh. fekk me omvising på ein flott gard i eit lite fjellsamfunn. Her dreiv dei med mjelkesau. Av mjelka laga dei ost og yoghurt. Dei selde og alt sauekjøtet direkte til kundar, og noko kjøpte ei lokal dame som hadde si eiga foredlingsbedrift. Ho laga sauekebab av kjøtet, som ho selde på marknadar rundt i området. Ho tok 80 kroner for ein kebab. Me fekk smaka denne til lunsj – spanande og godt.

Her oppe hadde dei og mykje snø på vinteren, og dei kunne fortelja at det var to gongar i vinter at dei ikkje hadde kome seg frå landsbyen grunna snø. Denne landsbyen hadde kvinneleg ordførar som kom og helste på oss.

Me avslutta turen med felles middag på ein lokal restaurant i Puget theniers. Her fekk me servert aure og kjøttgryte. Ein travel, spanande og inspirerande tur tok brått slutt! Me reiste attende til Tysnes med inspirasjon og friskt pågangsmot, det er mange moglegheiter på småbruka på Tysnes!

Turen var delvis sponsa av midlar frå Tysnes bonde- og småbrukarlag og Bjørnefjorden matkultur.


FJELLANDSBY: Medlemmar frå Bjørnefjorden matkultur, 1300 meter over havet. Johanne Dalland (t.v.) og Irene Dalland står på kvar sin kant.
FJELLANDSBY: Medlemmar frå Bjørnefjorden matkultur, 1300 meter over havet. Johanne Dalland (t.v.) og Irene Dalland står på kvar sin kant.
MYKJE GRØNT: Dette biletet er teke i drivhuset på den fyrste garden reisefølgjet besøkte – «Le Potager de Saquier», rett utanfor Nice. 15 mål med grønsaker, og noko utandørs og.
MYKJE GRØNT: Dette biletet er teke i drivhuset på den fyrste garden reisefølgjet besøkte – «Le Potager de Saquier», rett utanfor Nice. 15 mål med grønsaker, og noko utandørs og.
SOLRIK TUR: I bondebønneåkeren på den vesle garden «Le Potager de Saquier» fekk turdeltakarane både hausta og smaka.
SOLRIK TUR: I bondebønneåkeren på den vesle garden «Le Potager de Saquier» fekk turdeltakarane både hausta og smaka.
STOR GJENG: Her ser me heile reisefølget saman med bøndene, «sauekebabdama» og reiseleiarane Yvonne Tonnaer og Ole-Jacob Christensen.
STOR GJENG: Her ser me heile reisefølget saman med bøndene, «sauekebabdama» og reiseleiarane Yvonne Tonnaer og Ole-Jacob Christensen.

Siste saker Gå til framsida