LIKTE DET: Kjell Brekke (bak i midten) var strålande fornøgd med konserten. (Alle foto: Vetle Mikkelsen)
LIKTE DET: Kjell Brekke (bak i midten) var strålande fornøgd med konserten. (Alle foto: Vetle Mikkelsen)

– Eg likte dette valdsamt godt

Publikum fekk kosa seg med både humor, lyrikk og flott musikk, då Bjarte Hjelmeland underheldt på Haaheim laurdag.
Publisert 14.04.2019 kl. 10.00. Oppdatert kl. 10.07.

– Gu’ kor kjekt å vera her, endeleg! Eg har aldri vore her før. Utruleg vakker plass, sa Bjarte Hjelmeland til publikum.

Han introduserte seg sjølv og dei andre musikarane: Tove Kragset på piano og vokal, og Bjarte Aasmul på gitar. Dei tre har spelt saman ved fleire tidlegare anledningar.


Variert program

Hjelmeland baud på flott musikk, og lada kvar linje av kvar song med sterke kjensler. Han både song med stor innleving, og underheldt publikum med korte historier innimellom songane.

Spennet var stort; Hjelmeland framførte alt frå Alf Prøysen til Kari Bremnes, og Jan Eggum, og han kunne i tillegg by på sin heilt eigen tolkning av Bob Dylan sin «Make you feel my love».

– Eg har ikkje så mange hits, men eg har ein halv. Eg har omsett ein song frå Bob Dylan, sa han.

Til sist var det tid for dikt. Hjelmeland skulle lesa opp Terje Vigen av Henrik Ibsen.

Gjennom 25 minutt las Hjelmeland verselinje etter verselinje; det var lagt mykje sjel i framføringa, og han hadde publikum i si hule hand.


Nøgde publikummarar

– Det var veldig fint, sa Sylvi Lien til «Tysnes» etter konserten.

Ho var ikkje aleine om å lika det ho høyrte.

– Eg likte dette valdsamt godt, sa Kjell Brekke til lokalavisa.

– Kva var høgdepunktet for deg?

– Eg tenker nok Terje Vigen. Den sit så djupt hos meg, sa Brekke.

Diktet var nemleg på pensum då han gjekk på skule.

– Og så er det jo Bjarte Hjelmeland som person. Han treffer deg på alle område, sa Brekke, tydeleg fornøgd med det han hadde fått høyra den kvelden.




SJELFULLT: Bjarte Hjelmeland song med stor innleving.
SJELFULLT: Bjarte Hjelmeland song med stor innleving.
DYKTIG SPELEMANN: Bjarte Aasmul baud på både akkompagnement og flotte soloar.
DYKTIG SPELEMANN: Bjarte Aasmul baud på både akkompagnement og flotte soloar.
TOK DET PIANO: Tove Kragset spelte seg inn i hjarto til publikum.
TOK DET PIANO: Tove Kragset spelte seg inn i hjarto til publikum.
TERJE VIGEN: Hjelmeland framførte Henrik Ibsens berømte dikt, og hadde publikum i si hule hand.
TERJE VIGEN: Hjelmeland framførte Henrik Ibsens berømte dikt, og hadde publikum i si hule hand.
FINT: Sylvi Lien (midten) syntest musikken var fin å høyra på.
FINT: Sylvi Lien (midten) syntest musikken var fin å høyra på.

Siste saker Gå til framsida

Ingen sommar utan is

Kva is smakar best i sommarvarmen? «Tysnes» har spurt dei som kanskje er mest glade i is – barna.