EXTRA SPENTE: Dei tilsette på Coop Prix i Våge gler seg til fornyinga. Frå venstre: Morten Christensen, Vigdis Christensen og Linda Tye. (Foto: Vetle Mikkelsen)
EXTRA SPENTE: Dei tilsette på Coop Prix i Våge gler seg til fornyinga. Frå venstre: Morten Christensen, Vigdis Christensen og Linda Tye. (Foto: Vetle Mikkelsen)

Prix blir til Extra: – Me får vel rundt 2.500 fleire varer

Coop-butikken i Våge skal endra utsjånad, utval og prisar. Butikksjefen håper alt er klart til sommaren.
Publisert 15.04.2019 kl. 14.55. Oppdatert kl. 16.13.

– Me endrar profil. Viss alt går etter planen, er me ferdige til sommaren, seier Morten Christensen, dagleg leiar hos Coop Prix Tysnes.

I Våge skal nemleg Coop Prix bli til Coop Extra, lågpriskonseptet til Coop. Christensen og dei tilsette har allereie visst om endringane ei stund.

– No er me klare, seier han.

Etter påske skal han i møte med byggmeister og handverkarar, for å diskutera endringane som må gjerast. Sjølve arbeidet reknar han med at ikkje tar meir enn nokre dagar, altså vil ikkje butikken vera stengt i ein lang periode under oppussinga.


Endring i utvalet

– Me får eit større utval av både kjølevarer og ferskvarer. Det er som dei seier på reklamen: Ekstra stort utval for ekstra låge prisar, seier butikksjefen.

– Det blir eit kjempestort utval. Me får vel rundt 2.500 fleire varer, legg han til.

Ifølge Christensen er Extra blant landets billigaste butikk-kjeder.

Sidan varene blir både fleire og billigare, er butikken avhengig av å selja meir.

– Me skal opp i omsetning. Det blir spennande å sjå kor mykje me klarer å selja, seier han.


Store endringar

– Me får byta ut alt som heiter kjøledisk og frysar, fortel Christensen.

I tillegg vil det meste inne i butikken bli omorganisert, samt at fargane blir endra til å følga Extra sin raude og gule profil.

– Og så kjem det sjølvscannande kassar, seier Christensen.

Det vil òg koma elektriske merkelappar, slik at dei tilsette slepp å skriva ut nye lappar kvar gong dei skal endra ein pris.

– Vil dei automatiske kassane gå ut over bemanninga?

– Bemanninga skal ikkje ned. Dei nye kassane gjer at ein kan jobba meir rundt i butikken. Forhåpentlegvis går bemanninga opp, svarer den daglege leiaren.


Spente tilsette

– Me gler oss veldig. Dette er ei stor satsing frå Coop, som viser at dei har trua på butikken vår, smiler butikksjefen.

Christensen har tru på at satsinga vil koma både kundane og dei tilsette til gode. Han meiner dette vil vera med på å sikra jobben til dei som arbeider i butikken.

– Dette blir veldig positivt, både for oss og kundane, seier Vigdis Christensen, som òg jobbar i butikken.

Ifølge ho vil det skje mange endringar i butikken; det einaste som vil stå på nokolunde same plass som i dag, er blomane og frukta.

– Og så blir det berre ein vanleg kasse. Resten er sjølvbetente, fortel ho.


Siste saker Gå til framsida

Rune Alver kjem til OnarTun

Er du glad i klassisk musikk av den storslegne kaliberen, bør du ikkje gå glipp av konserten med Rune Alver og Lise Skjåk Dalen.

– Det finst ikkje liknande

Forfattar og lokalhistoriker Knut Rage reiser kvart år frå Tysnes til Hatlestrand for å få med seg Mytologifestivalen. I år skulle ikkje vera eit unntak.

Vel blåst på Tysnessåto

Søndag var det friluftsgudsteneste på Tysnessåta i skiftande seinsommarvêr. Initiativtakar til denne gudstenesta var tysnesingen Arne Nesse. Døveprest Inge Sørheim hadde ansvar for gudstenesta, og dei hadde med eigen tolk. Det bles friskt på toppen, så den vesle kyrkjelyden søkte ly litt nedom toppen. Der vart det preike, bøn og salmesong med eit fantastisk skue over...

Lesarbrev: Innfør gratis skulemat

Eit gratis skulemåltid kvar dag til alle elevar i den norske skulen kan vera blant dei viktigaste tiltaka for folkehelse og sosial utjamning. Vil politikarane jobba for å innføra skulematordning i vår kommune?Det er få stader sosiale skilnader kjem tydelegare til syne enn blant matpakkane til elevar i den norske skulen. Diverre er det slik at langt ifrå alle born får med seg god og sunn...