KREATIV SJEL: Hanne Dahle stiller ut på Årbakka for første gong i år. (Alle foto: Vetle Mikkelsen)
KREATIV SJEL: Hanne Dahle stiller ut på Årbakka for første gong i år. (Alle foto: Vetle Mikkelsen)

– Det er veldig kjekt å få lov til å stilla ut her

Langfredag er det sesongopning på Årbakka Handelsstad. Både vertskapet og fleire av kunstnarane er nye av i år.
Publisert 15.04.2019 kl. 14.00.

– Eg har eigentleg ikkje drive med dette særleg lenge, men eg er ei kreativ sjel, seier Hanne Dahle, ein av kunstnarane som snart skal stilla ut på Årbakka Handelsstad; handelsstaden har si offisielle sesongopning på langfredag.

Ho målar med akrylmåling, og beskriv måleria sine som abstrakt kunst. Til dagleg er ho tannteknikar, eit yrke som òg krev ein viss dose kreativitet; som tannteknikar designar ho nemleg erstatningstenner.

– Det er veldig deilig å laga noko heilt fritt, seier Dahle, som til dagleg held til på Os.

Måling begynte ho for alvor med då ungane flytta ut av huset.

– Eg blir veldig glad av å måla, og av den fridomskjensla det gir, smiler Dahle.

Det er første gong ho stiller ut på Årbakka, men ho er på ingen måte framand for plassen.

– Eg har vore mykje i området. Det er veldig kjekt å få lov til å stilla ut her, seier ho.


Trekunstnar

Òg blant dei som skal stilla ut på Årbakka er Arvid Søvik. Han arbeider mykje med tre i sin kunst; Søvik både dreier, skjer og målar på tre.

– Eg har høyrt om dei (Årbakka Handelsstad, journ.merk) tidlegare, seier Søvik, som òg stiller ut på handelsstaden for første gong.

– Eg har forventningar om å selja ein del, legg han til.

Gjennom å stilla ut på Årbakka håper han å få fleire kundar i området.

– Eg har allereie kundar frå Lindesnes til Nordkapp, seier Søvik.

At Søvik driv med trearbeid er ikkje overraskande. Det er nemleg fleire som har jobba med tre i hans familietre; far hans snikra møblar, og fleire av forfedrane hans har vore båtbyggarar.


Vil utvida sesongen

Det er ikkje berre kunstnarane som er nye på Årbakka i år. Dette blir den første sesongen Rebekka Høgestøl er vertskap på handelsstaden.

– Det er litt sånn skrekkblanda fryd. Eg har aldri gjort dette før, seier den ferske Årbakka-driftaren.

Langfredag arrangerer ho sesongopning av den gamle handelsstaden. Då kan ho by på alt frå minimarknad med kunstnarar, handverkarar og matprodusentar, til foredrag om naturlege hudpleieprodukt – og kunstutstilling, sjølvsagt.

Høgestøl er i prosessen med å flytta tilbake til Tysnes, etter å ha budd andre stader i inn- og utland i fleire år.

– Viss eg har moglegheit til det, ønsker eg gjerne å utvida sesongen her, seier Høgestøl.

Det er blant anna derfor ho opnar handelsstaden såpass tidleg i år.

For opninga på fredag har ho følgande oppfordring til både lokale og tilreisande:

– Kom nedom for å ta ein kopp kaffi eller ein prat. Ta gjerne med båten om du vil. Det er meldt strålande vêr.


SJØBUO: Kunsten blir utstilt i sjøbuo på Årbakka Handelsstad. Her viser driftar Rebekka Høgestøl kor Hanne Dahle kan henga måleria sine.
SJØBUO: Kunsten blir utstilt i sjøbuo på Årbakka Handelsstad. Her viser driftar Rebekka Høgestøl kor Hanne Dahle kan henga måleria sine.
TREARBEID: Arvid Søvik både dreier, skjer og målar på tre.
TREARBEID: Arvid Søvik både dreier, skjer og målar på tre.
SKREKKBLANDA FRYD: Rebekka Høgestøl er spent på sesongen.
SKREKKBLANDA FRYD: Rebekka Høgestøl er spent på sesongen.

Siste saker Gå til framsida

Ingen sommar utan is

Kva is smakar best i sommarvarmen? «Tysnes» har spurt dei som kanskje er mest glade i is – barna.