HEILE FAMILIEN: Her er den vesle familien frå Eritrea samla i sofaen. Frå venstre: Ghirmay Ngusse, Yosan Ngusse (12), Sidana Ngusse (8) og Samrawit Tesfazgi.
HEILE FAMILIEN: Her er den vesle familien frå Eritrea samla i sofaen. Frå venstre: Ghirmay Ngusse, Yosan Ngusse (12), Sidana Ngusse (8) og Samrawit Tesfazgi.

– Alle på Tysnes er som familie og vennar

Ghirmay Ngusse og familien set pris på at lokale vil læra dei å kjenna.
Publisert 17.04.2019 kl. 15.00.

– Først var det litt vanskeleg, seier Ghirmay Ngusse.

Han òg familien har akkurat ønskt «Tysnes» sin utsende velkomen inn i leilegheita deira i Våge. Det duftar svakt av kaffi i stova; ved sida av den eine sofaen sit kona til Ghirmay, Samrawit Tesfazgi, og lagar tradisjonell eritreisk kaffi.

– Me kjem frå ein storby, Asmara, hovudstaden i Eritrea, medan Tysnes er ei lita øy, legg Ghirmay til.

Å gå frå ein by med nærmare 900.000 innbyggarar til ei øy med knappe 3.000 innbyggarar må ha vore ei tilvenningssak, men Ghirmay understrekar at dei no trivst godt på Tysnes.


Farefull ferd

Ghirmay kom til Norge i 2015. «Tysnes» har tidlegare skrive om den farlege reisa hans frå Eritrea til Europa. Han flykta først til nabolandet Etiopia, så til Sudan, og så til Libya.

– Eg drog frå Libya over Middelhavet i ein gummibåt, sa Ghirmay til avisa i 2017.

Vel framme i Norge var han eitt år på Nærbø i Rogaland, før han kom til Tysnes.

I 2017 fekk han innvilga familiegjenforeining; endeleg kunne kona og barna òg komma heim til Tysnes.


Ortodoks påske

Familien er ortodokse kristne. I år feirer dei påske den 28. april. Men før den tid fastar eritrearane i 56 dagar.

– Då kan ein ikkje eta kjøtt, egg og mjølk, fortel Heran. Når påsken kjem, kan dei endeleg bryta fasten. Då feirar dei med vennar og familie.

– Då et me injera og zigni, fortel Ghirmay.

Injera er ei slags lefse, som tradisjonelt blir laga med teff-mjøl. Zigni er ein krydra gryterett med kjøtt og tomatsaus. Zignien et ein ved å riva av bitar av injeraen, og bruka den til å plukka opp gryteretten.


Ein del av lokalsamfunnet

Ghirmay og Samrawit går på norskkurs, og gjer seg enkelt forstått på språket. Barna Heran (16), Yosan (12) og Sidana (8) går på skule, og snakkar tilnærma Tysnes-mål.

Ungane er i tillegg aktive i den lokale idretten.

– Eg speler fotball, medan søstrene mine speler fotball og handball, fortel eldstesøster Heran.

Familien føler dei har blitt godt motatt på Tysnes.

– Alle her hjelper oss, og blir kjent med oss. Alle på Tysnes er som familie og vennar, seier Ghirmay.

– Eg vil seia takk til folk på Tysnes. Dei hjelper oss, legg Heran til.

Når ein kjem frå Eritrea, kan norske vintrar vera rimeleg kalde. Då er det godt at ein no går lysare tider i møte.

– Me gler oss til sommaren, seier Heran.

– Og Tysnesfest, legg Ghirmay smilande til.


KAFFI: Samrawit Tesfazgi lagar eritreisk kaffi. Den er meir aromatisk enn vanleg, norsk filterkaffi, og minnar litt om mørk sjokolade.
KAFFI: Samrawit Tesfazgi lagar eritreisk kaffi. Den er meir aromatisk enn vanleg, norsk filterkaffi, og minnar litt om mørk sjokolade.

Siste saker Gå til framsida

Over 6.000 på Gjerstad laurdag kveld

Laurdag kveld blei den mest folksame på Gjerstad under Tysnesfest 2019.Ein times tid før Broiler avslutta konsertkvelden, skal det ha vore kring 6.300 publikummarar innom konsertarenaen.

Lesarbrev: Feil i NRK sin valgomat

I spørsmål 2 i valgomaten spør ein om Uggdal skule bør leggast ned og elevane flyttast til Gjerstad. I valgomaten er det oppført at Kristeleg Folkeparti har gått inn for flytting. Dette er feil. KrF har prøvt fleire gonger å få NRK til å korrigera valgomaten, men trass i fleire meldingar til dei er den førebels ikkje blitt retta...