KLARE TIL SERIESTART: Det var nokre forfall, men 13 Njardar-spelarar stilte på den nest siste treninga før sesongopning laurdag. Bak frå venstre: Roy Skaten, Didrik Milde Thorbjørnsen, Heine Henanger, Birger Gilje, Ole Bakke Rosvold, Roy Korsnes og Raymond Epland. Framme frå venstre: Emre Hagen, Aksel Lande, Lasse Aarland Skulstad, Øyvind Helvik, Fahri Akyuz og Børge Pedersen.
KLARE TIL SERIESTART: Det var nokre forfall, men 13 Njardar-spelarar stilte på den nest siste treninga før sesongopning laurdag. Bak frå venstre: Roy Skaten, Didrik Milde Thorbjørnsen, Heine Henanger, Birger Gilje, Ole Bakke Rosvold, Roy Korsnes og Raymond Epland. Framme frå venstre: Emre Hagen, Aksel Lande, Lasse Aarland Skulstad, Øyvind Helvik, Fahri Akyuz og Børge Pedersen.

Njardar-herrane med siste finpuss før sesongopninga

Njardar/Tysnes sitt a-lag er klare for sesongstart, og opnar med eit smell mot rivalane frå Eikelandsosen laurdag.
Publisert 25.04.2019 kl. 18.00.

– Me veit ikkje heilt kva me går til, fortel Njardar-trenar Raymond Epland.

Tysdag leia han seniorlaget på ein av dei siste treningane før den nye sesongen smell i gang. Etter mange år i 7. divisjon får laget endeleg prøva seg på eit høgare nivå etter opprykket sist sesong.

Epland fortel at laget ser fram til å starta sesongen, og at dei er førebudd på nivåforskjellen frå i fjor.

– Me er innstilte på at det kjem til å verta tøft. Det vert tette kampar, og me er nøydd til å gå i krigen i kvar og ein kamp, fortel trenaren.


Seriestart

Og krigen startar allereie på laurdag. Då er det klart for fyrste seriekamp heime på Reiso, og på motsett banehalvdel står Eikelandsfjorden.

– Det er eit rivaloppgjer frå gamalt av, fortel Epland.

Han er førebudd på ein tøff kamp, men håpar at heimelaget bit godt frå seg.

– Den fyrste kampen kan vera viktig med tanke på resten av sesongen. Det betyr mykje å få ein god start, seier trenaren.

Han håpar også at mange vil ta turen til Reiso for å sjå gultrøyene spela 6. divisjons-fotball for fyrste gong på mange år.

– Det er endå kjekkare å spela fotball når det er mange tilskodarar på plass for å støtta oss. Eg håpar folk vil ta turen på laurdag, seier Epland.


Klare til dyst

I sesongoppkøyringa har Njardar spelt tre treningskampar i ein vinterserie. Epland fortel at dei spelte jamt mot Loddefjord 3 og Kjøkkelvik i dei to fyrste kampane, sjølv om det vart tap i begge. Mot avdelingskollega Trane i den siste kampen gjekk det verre. Her vann bergensarane heile 10–0.

– I den kampen var det så vidt me klarte å stilla elleve mann på banen, seier Epland, som meiner den kampen ikkje er heilt representativ for Njardar sitt nivå.

Han fortel likevel at det ikkje har vore den mest optimale sesongoppkøyringa for laget.

– Me har hatt mykje skader, men det er i ferd med å betra seg.

Epland håpar ikkje laget vil få for store utfordringar med skader og forfall til kampane.

– Me har ein del som jobbar i ulike rotasjonsturnusar, mellom anna i Nordsjøen, så eg håpar ikkje me endar opp i situasjonar der alle er vekke samtidig, seier han.

Trenaren føler elles at nivået på treningane er godt, og at laget er klare til dyst på eit høgare nivå enn i fjor.

– Me har prøvd å vidareføra det me jobba med i fjor, og eg føler det har vore framgang etter vinteren. Målet er at me skal gjera det godt i 6. divisjon, og aller helst enda trygt plassert på øvre halvdel av tabellen.

Han er også bestemt på kva som er nøkkelen reint spelmessig for å lukkast i divisjonen.

– Me må ha fokus og vera nøyaktige i spelet vårt. Viss ein misser på enkle pasningar, så vert ein mykje hardare straffa i 6. divisjon enn i 7. divisjon.


Nye fjes

Saman med Epland er det i år den rutinerte keeperen Kjartan Hagen som skal trena laget. I tillegg til ny mann i trenarduoen, er det også kome inn nokre nye fjes blant spelarane.

Av nye spelarar kan Epland mellom anna nemna Birger Gilje, som i fjor spelte for Dirdal i Rogaland, og rutinerte Magnus Hjartåker Bakke, som gjer comeback for klubben.

Ein annan «nykommar» Njardar-tilskodarane kan få sjå mykje av, er unge Emre Hagen. Tysnesingen spelte for gutelaget til Stord i fjor, men valde no å koma tilbake til moderklubben for å spela på a-laget.

Epland fortel at Hagen er i fyrstelagsplanane til klubben, og han beskriv unggutten som ein giftig spiss med hurtigheit som sitt fremste våpen.

– Han er ein veldig lovande spelar, men han manglar framleis litt fysikk, fortel Epland.


Måltørst

Emre Hagen, som fyller 16 år i løpet av sesongen, ser også sjølv fram til sesongstart, og å få prøva seg på seniornivå. Oppgjeret mot Eikelandsfjorden laurdag vert Hagen sin seriedebut på a-laget til Njardar/Tysnes, og han fryktar ikkje overgangen frå gutefotball.

– Det er bra at eg får prøva meg på seniornivå, seier han.

Ungguten kan fort enda opp med å danna eit nytt spisspar med erfarne Didrik Milde Thorbjørnsen, og Hagen sjølv trur dei to vil væra ein god spissduo.

– Me utfyller kvarandre godt. Didrik er ein møtande spiss, medan eg bruker farta mi til å springa i bakrommet, fortel han.

Hagen håpar han kan visa seg fram i 6. divisjon.

– Eg forventar å putta nokre mål i løpet av sesongen.

Han er heller ikkje bekymra for å møta større og sterkare midstopparar enn han sjølve i motstandarane sine rekkjer.

– Dei største stopparane er som oftast litt treige, så eg skal bruka farten min mot dei, seier han.


God stemning

Hagen har god tru på laget før sesongstart, og skryter av samhaldet og lagånda i spelargruppa.

– Det er god stemning på treningane, og me jobbar for kvarandre, fortel han.

For det er viktig at laget står samla, uansett korleis resultata vert.

– Det suger å tapa, men me skal både tapa og vinna som eit lag, seier han.

Trenar Epland er samd i at lagmoralen er god, og håpar det vil ha innverknad på resultata.

– Eg trur det betyr mykje å spela på eit lag der ein trivst godt og det er kjekt å spela fotball. Då speler ein betre òg, avsluttar trenaren.


FORSTERKINGAR: Emre Hagen (t.v.) og Birger Gilje er to av dei nye spelarane til Njardar/Tysnes denne sesongen. Hagen er tilbake i klubben etter eit år på gutelaget til Stord.
FORSTERKINGAR: Emre Hagen (t.v.) og Birger Gilje er to av dei nye spelarane til Njardar/Tysnes denne sesongen. Hagen er tilbake i klubben etter eit år på gutelaget til Stord.
VETERAN: Børge Pedersen har runda 50 år, men viste på skottreninga at han framleis har krut i støvlane.
VETERAN: Børge Pedersen har runda 50 år, men viste på skottreninga at han framleis har krut i støvlane.
NØKKELSPELAR: Lasse Aarland Skulstad er sikker med ball i beina, og var ein nøkkelspelar for Njardar sentralt på midtbanen i fjor.
NØKKELSPELAR: Lasse Aarland Skulstad er sikker med ball i beina, og var ein nøkkelspelar for Njardar sentralt på midtbanen i fjor.
DUELLAR: Tysdag trente Njardar-herrane i kveldssola på Reiso. Her vert Lasse Aarland Skulstad og Aksel Lande utfordra av Roy Korsnes.
DUELLAR: Tysdag trente Njardar-herrane i kveldssola på Reiso. Her vert Lasse Aarland Skulstad og Aksel Lande utfordra av Roy Korsnes.
SKOTTRENING: Alle spelarane fekk testa skotfoten på treninga tysdag.
SKOTTRENING: Alle spelarane fekk testa skotfoten på treninga tysdag.

Siste saker Gå til framsida

Folketalet auka med 14

Ved utgangen av tredje kvartal i 2019 er folketalet i Tysnes kome opp i 2.862. Det er 14 fleire enn ved utgangen av andre kvartal. Då var folketalet 2.848.Elleve personar er fødd i Tysnes i dette kvartalet, medan fire personar har døydd. Det gjev eit fødselsoverskot på sju.I same periode har det flytta 30 personar inn til Tysnes, av desse fire frå utlandet. 23 personar har flytta...