OPEN FOR ALLE: Slik såg det ut i Våge under marknadsdagane i fjor. I år er marknadsområdet fritt for alle. (Arkivfoto: Camilla Korsnes)
OPEN FOR ALLE: Slik såg det ut i Våge under marknadsdagane i fjor. I år er marknadsområdet fritt for alle. (Arkivfoto: Camilla Korsnes)

Festival i festivalen og gratis marknadsdagar

Tysnesfest har lansert mykje av programmet som skal gå føre seg utanfor arenaen på Gjerstad.
Publisert 07.05.2019 kl. 17.21. Oppdatert kl. 17.26.

«Nytt i 2019 er at marknadsdagane blir gratis», skriv dagleg leiar for Tysnesfest, Øystein Vaage, i ei pressemelding.

Dei siste dagane har Tysnesfest lansert deler av festivalprogrammet som ikkje er ein del av kveldskonsertane på Gjerstad, i tillegg til nyheita om marknadsdagane. Tidlegare har besøkande vore nødt til å ha festivalpass eller kjøpa separat billett til marknadsområdet i hamna i Våge, medan det i år vert fri tilgang. I år vert det også slik at dei som kjem til Våge med båt ikkje treng festivalpass for å liggja i hamna.


Marknadsdagar

Tysnesfest-leiinga har også presentert litt av programmet som skal gå føre seg på kaiområdet fredagen og laurdagen. Mellom anna vert det sett stort fokus på lokalmat, der fleire lokale matprodusentar vert med.

Dette inkluderer mellom anna Myrdal Gard, Garden på Dalland, Jordbær frå Årbakka, Tveitakjerring, Villa Lunde Bakeri, Eva’s Mat og Spildegarden. Det kjem også spesielle gjester til Våge i samband med lokalmatfokuset.

«Fredagen kjem og Bodil Nordjorde, eller kanskje enda betre kjend som «Mentors kone» i Farmen, blant anna det året Lothepus var med. Ho skal snakka om lokalmat og viktigheita av å bringa matkunnskapen vidare», står det i pressemeldinga.

Denn unge sangduoen Vilde og Anna frå Nordfjordeid kjem også. Det same gjer sekkepipebandet Bergen Pipe and Drums.


Festival for barn og unge

«Me har i år gjort om på konseptet for marknadsdagane, og kjører ein heil dag med underhaldning for born og unge i Bermudateltet», skriv Vaage i ei anna pressemelding, der han lanserer konseptet Tysnesfest UNG, og kallar det ein «festival i festivalen».

Laurdagen er fokuset på det unge festivalpublikummet, og det er sett saman eit spesialprogram for dei i Bermudateltet. På plakaten står mellom anna youtubekjendisane Murdrocks og Agnetesh, bergensartisten Serlina og gutegruppa Gutta frå Frekhaug.

I tillegg vert det vitskapsshow og familiemusikal, og eit lokalt innslag med Tysnes Soul Children og Tysnes barnekor.


Gjensyn

Noko av programmet som er presentert, er velkjent for eit erfarent Tysnesfest-publikum. Dei lokale karane i Big Men Blues Band stiller nok ein gong på festivalen, og skal gjennomføra to bluescruise på MS Midthordland om laurdagen.

«Bluescruise med Big Men Bluesband er ein av Tysnesfests stoltaste tradisjonar», skriv Vaage i ei pressemelding.

I tillegg til bluesgutta, er også Stordabu Vibeke Grov, kjend under artistnamnet Mukti, klar for festivalen. Ho vart oppdaga av Tysnesfest-leiinga på 100 dagar-festivalen på Stord i vinter. Ho skal opptre på MS Sunnhordland saman med bandet sitt laurdagen.


Fortløpande lanseringar

Dei ferske festivalsleppa markerer starten på ei rekkje fortløpande lanseringar av dei siste artistane og programpostane til Tysnesfest 2019, og festivalsjef Vaage nyttar høvet til å «teasa» om framtidige lanseringar.

«Ta Sjansen», som normalt har vore ein laurdagsaktivitet, er i år flytta til fredagen. Ifølgje Vaage er dette for å gjera plass til ein ny aktivitet midt i hamna i Våge. Han avslører endå ikkje kva for ein aktivitet det er snakk om, men skriv at han trur det vil fengja mange.

«For å seia det slik: Det er ikkje noko for pyser», skriv Vaage i pressemeldinga.


SEKKEPIPE: Bergen Pipe and Drums skal vera med å laga liv under Tysnesfest. (Foto: Privat)
SEKKEPIPE: Bergen Pipe and Drums skal vera med å laga liv under Tysnesfest. (Foto: Privat)
LOKALMAT: Fleire lokale matprodusentar er til stades under marknadsdagane, mellom anna Garden på Dalland. Her frå opninga av pølsemakeriet på sjølve garden. (Arkivfoto)
LOKALMAT: Fleire lokale matprodusentar er til stades under marknadsdagane, mellom anna Garden på Dalland. Her frå opninga av pølsemakeriet på sjølve garden. (Arkivfoto)
KJENNINGAR: Tysnes-bandet Big Men Blues Band inviterer nok ein gong til bluescruise på MS Midthordland. (Foto: Privat)
KJENNINGAR: Tysnes-bandet Big Men Blues Band inviterer nok ein gong til bluescruise på MS Midthordland. (Foto: Privat)
FOR DEI UNGE: Laurdagen vert Bermudateltet fylt med program for barn og unge, mellom anna med musikalen «Gaten Vår». (Foto: Privat)
FOR DEI UNGE: Laurdagen vert Bermudateltet fylt med program for barn og unge, mellom anna med musikalen «Gaten Vår». (Foto: Privat)

Siste saker Gå til framsida

Dugnad i Peralio

– Me skal ha dugnad no i helga, både for tufteparken og resten av friluftsområdet ned mot badeplassen som me held på å opparbeida, seier Vegard Aslaksen i båtlaget Njord/Tysnes.«Tysnes» har tidlegare skrive om arbeidet med å få på plass ein tuftepark og ein badeplass i området. Om dugnaden på laurdag er ein suksess, kjem båtlaget nokre steg nærmare realisering av...