AVGJERANDE HEADING: Med denne hodestøyten sikra Didrik Milde Thorbjørnsen eitt poeng for Njardar/Tysnes mot Nore Neset/Lysekloster 2.
AVGJERANDE HEADING: Med denne hodestøyten sikra Didrik Milde Thorbjørnsen eitt poeng for Njardar/Tysnes mot Nore Neset/Lysekloster 2.

Stanga inn uavgjort i siste sekund

Det vart høgdramatisk då a-laget sikra sine fyrste poeng for sesongen laurdag.
Publisert 19.05.2019 kl. 11.27. Oppdatert kl. 11.39.

– Det følast nesten som ein siger, i og med at utlikninga kjem så seint, fortel trenar Kjartan Hagen.

Det er god stemning i Njardar-leiren etter kampen mot Nore Neset/Lysekloster 2. Ein nerverpirrande kamp enda til slutt 3–3, og det vart dramatikk til siste sekund.


Opna best

Kring 80 tilskodarar hadde teke turen til Reiso laurdag, og det tok ikkje lang tid før dei fekk valuta for frammøte. Njardar stod høgt med laget, og sette eit tidleg press på motstandaren.

Etter berre fire minutt kom den fyrste sjansen for gultrøyene. Øyvind Helvik, som for anledninga spelte venstreback, kom seg fri i god innleggsposisjon på kanten. Innlegget trefte Alexander Gjerstad Kleppe, som fekk hodet på ballen og heada i buge mot det lengste krysset. Men dessverre for Njardar gjekk headinga like utanfor.

Heimelaget fortsette å pressa, og kom til fleire gode sjansar etter gode innlegg. Didrik Milde Thorbjørnsen fekk også ein stor målsjanse då han prøvde å curla ballen i krysset frå 18 meter. Også denne avslutninga gjekk rett utanfor motstandar-målet.

Nore Neset/Lysekloster 2 klarte også å spela seg til gode moglegheiter, og etter 20 minutt fekk ein av blåtrøyene stå heilt umarkert på ein corner, men heada over Njardar-målet frå kort hald.

– Me bestemte oss for å pressa høgt frå start av, og det fungerte bra, konkluderer trenar Hagen etter kampen.


Gjekk opp i leiinga

Midtvegs i omgangen løsna det ordentleg for heimelaget. I det 23. minutt fekk Gjerstad Kleppe ballen rettvend 20 meter frå motstandarmålet. Han spelte gjennom spisskollega Milde Thorbjørnsen, som frå skrått hald sette ballen sikkert i mål aleine med keeper. 1–0 til Njardar.

Berre fire minutt seinare fekk Milde Thorbjørnsen ein ny gjennombrotspasning å jobba med. Keeper kom ut til 16-meterstreken og når ballen fyrst, men han var uheldig med klareringa som gjekk rett i beina på Gjerstad Kleppe. På sikkert vis slo ballen i ein boge over keeper, og inn i det opne målet.

Med ein draumestart på kampen såg det lyst ut for Njardar med tanke på å få sine fyrste poeng denne sesongen, men gjestane frå Os svarte umiddelbart på 2–0-leiinga.

To minutt etter målet til Gjerstad Kleppe, var det bortelaget som fekk sitt fyrste mål for dagen. Heile Reiso ropte på offside då ein Nore Neset/Lysekloster-spiss vart spelt aleine gjennom med Njardar sin keeper for dagen, Marcus Dalland. Dommeren let spelet gå vidare, og aleine med motstandar-spissen hadde Dalland ingen sjanse til å hindra redusering.

Ein intens fyrsteomgang enda 2–1 til Njardar.


Snudde kampen

Heimelaget opna andre omgang på same måte som den fyrste omgangen, og fekk tre store sjansar i opningsminutta. Etter dette fekk bortelaget eit spelemessig overtak, og det var Njardar som vart pressa tilbake på banen.

I det 55. speleminutt gjekk ein blåkledd spelar i bakken i Njardar sin 16-meter, og dommaren dømte straffe til bortelaget. Straffesparket vart sikkert sett i mål bak keeper Dalland, og Nore Neset/Lysekloster reduserte til 2–2.

Heimelaget var nære på å svara på scoringen to minutt seinare. Midtbanegeneral Lasse Aarland Skulstad fyrte laus frå drygt 20 meter, og både Njardarbenken og heimepublikummet byrja å jubla før dei innsåg at ballen ikkje gjekk rett i krysset, men i nettveggen like utanfor.

I den neste perioden prøvde begge laga å tilriva seg eit overtak i kampen, men det var gjestane frå Os som var nærast scoring, og midtvegs i omgangen fekk dei utteljing. Eit gjennomspel frå midtstreken sende nok ein Nore Neset/Lysekloster-spelar aleine med keeper Dalland, som ikkje kunne gjera noko for å forhindra at bortelaget gjekk opp i leiinga 2–3.

Njardar prøvde å setja inn ein sluttspurt, og klarte å setja press på osingane, utan å skapa dei største sjansane.


Siste sekund

I det 90 minutt var passert, såg kampen ut til å ebba ut i Nore Neset/Lysekloster-siger. Njardar sleit med å spela seg inn i 16-meteren til bortelaget, men fleire minutt på overtid fekk heimelaget eit frispark på midtbanen.

Njardar sende alle mann i angrep, inkludert keeper, medan Thomas Hagen gjorde seg klar til å slå frisparket. Ballen vart slått med stor presisjon inn i feltet, og i duell med to forsvarsspelarar var det den rutinerte målscoraren Didrik Milde Thorbjørnsen som raga høgast. Han fekk hodet på ballen, og styrte den i det lengste hjørnet, utakbart for keeper.

Målscoraren sjølv feira målet med stoisk ro, medan medspelarane jubla som om Njardar hadde sikra sigeren. Eit skuffa bortelag fekk ikkje sjansen til å svara på målet, då dommaren blåste av oppgjeret rett etter avspark. Ein nervepirrande kamp enda med 3–3, og eitt poeng til begge lag.


Gjekk i krigen

– Det er utruleg deilig, og det følast som ein siger, seier Milde Thorbjørnsen, som er strålande nøgd etter kampen.

Han ga alt for å få ballen i mål på dødballen i sluttsekunda.

– Ein tenkjer at det er krig. Det gjeld å vera fyrst på ballen, og så kan alt skje, seier to-målsscoraren, som meiner det var fortent at utlikninga kom til slutt.

– Det er den beste kampen me har spelt i år, og eg føler eigentleg at me hadde fortent alle tre poenga, seier han.

Milde Thorbjørnsen får støtte frå trenar Kjartan Hagen.

– Det var eit utruleg fortent poeng i ein kamp der me kanskje hadde fortent å vinna, seier han.

Hagen er normalt å finna i Njardar-målet, men er ute med skade. Han måtte dermed følgja den spennande kampen frå sidelinja.

– Det er mykje meir nervepirrande enn å spela sjølv, fortel han.


Kampfakta:

Njardar/Tysnes - Nore Neset/Lysekloster 2, 18.05.19 - 15:30, Reiso kunstgras

Resultat: 3 – 3 (2 – 1)

Målscorarar Njardar: Didrik Milde Thorbjørnsen (2), Alexander Gjerstad Kleppe

Startoppstilling Njardar: Marcus Dalland – Øyvind Helvik, Birger Gilje, Ørjan Malkenes, Fahri Akyuz – Børge Pedersen, Lasse Aarland Skulstad, Aksel Lande, Thomas Hagen – Didrik Milde Thorbjørnsen, Alexander Gjerstad Kleppe

Innbyttarar: Kjartan Hagen, Emre Hagen, Vidar Storesætre, Arild Storesætre, Heine Sandvik Henanger, Roy Skaten





GOD START: Midtvegs i fyrste omgang leia heimelaget 2–1. Her jublar Alexander Gjerstad Kleppe saman med Didrik Milde Thorbjørnsen etter 2–0-målet.
GOD START: Midtvegs i fyrste omgang leia heimelaget 2–1. Her jublar Alexander Gjerstad Kleppe saman med Didrik Milde Thorbjørnsen etter 2–0-målet.
NØKKELSPELAR: Thomas Hagen spelte ein god kamp for Njardar både som høgrekant og høgreback.
NØKKELSPELAR: Thomas Hagen spelte ein god kamp for Njardar både som høgrekant og høgreback.
KOM INN: Vidar Storesætre gjorde comeback for a-laget, og spelte spiss i sluttminutta av kampen.
KOM INN: Vidar Storesætre gjorde comeback for a-laget, og spelte spiss i sluttminutta av kampen.
INNBYTTAR: Den unge angriparen Emre Hagen kom inn i andre omgang, og var med å pressa på for utlikning mot slutten av kampen.
INNBYTTAR: Den unge angriparen Emre Hagen kom inn i andre omgang, og var med å pressa på for utlikning mot slutten av kampen.
PAUSEPRAT: Njardar leia 2–1 til pause, og trenar Kjartan Hagen stod for pausepraten.
PAUSEPRAT: Njardar leia 2–1 til pause, og trenar Kjartan Hagen stod for pausepraten.
MIDTBANESJEF: Kaptein Aksel Lande la ned mange kilometer på midtbanen.
MIDTBANESJEF: Kaptein Aksel Lande la ned mange kilometer på midtbanen.
JUBEL: Det var god stemning blant spelarar og tilskodarar etter utlikningsmålet i siste sekund av kampen.
JUBEL: Det var god stemning blant spelarar og tilskodarar etter utlikningsmålet i siste sekund av kampen.
SPISS: Didrik Milde Thorbjørnsen vart to-målsscorar, og siktar seg nok ein gong inn på Njardar sin toppscorartrone.
SPISS: Didrik Milde Thorbjørnsen vart to-målsscorar, og siktar seg nok ein gong inn på Njardar sin toppscorartrone.
MÅL OG ASSIST: Alexander Gjerstad Kleppe la ned mykje jobb på spissplass, og fekk utteljing både med mål og assist.
MÅL OG ASSIST: Alexander Gjerstad Kleppe la ned mykje jobb på spissplass, og fekk utteljing både med mål og assist.
FORSVARER: Ørjan Malkenes danna stopparpar saman Birger Gilje.
FORSVARER: Ørjan Malkenes danna stopparpar saman Birger Gilje.

Siste saker Gå til framsida