BLID: Torstein Hatlevik kjøpte Ole Vaage-huset i 2015. No er det innflyttingsklart. (Foto: Vetle Mikkelsen)
BLID: Torstein Hatlevik kjøpte Ole Vaage-huset i 2015. No er det innflyttingsklart. (Foto: Vetle Mikkelsen)

Torstein skal bu og driva butikk i Ole Vaage-huset

Fire år har gått sidan Torstein Hatlevik kjøpte Ole Vaage-huset. No kan han endeleg flytta inn i det historiske bygget.
Publisert 29.05.2019 kl. 06.00.

– Det er fullstendig restaurert, sa Torstein Hatlevik søndag.

Husfaren på Haaheim Gaard kjøpte Ole Vaage-huset i 2015, og har sidan den gong prøvd å få det i god nok stand til å bu i. No er arbeidet så godt som ferdig.

Søndag var det open dag i det nyrenoverte huset. Veteranbåten MF Granvin tok òg turen innom, til glede for dei frammøtte.

– Eg skal bu oppe og ha butikk nede, fortalde Torstein vidare.

– Eg skal ha leilegheit på Haaheim òg, la han til.

Han fortalde vidare at motivasjonen hans for renovasjonen har vore å ta vare på det gamle huset.

– Gamle hus har mange gode kvalitetar, og sjel, sa Torstein.

Butikken i grunnetasjen blir av typen lokalmatbutikk, der mesteparten av varene skal vera sjølvproduserte.


Lang tradisjon

Det har ifølge han vore butikkdrift på Uggdalseidet sidan 1887; huset han no har restaurert blei bygd i 1902, av Engelaus Vaage.

– Han hadde fått 30.000 kroner i medgift for kona si, og bygde dette huset, sa Torstein.

– Sonen, Ole Vaage, overtok i 1947 og dreiv butikken til 1987, la han til.

Sjølv om Engelaus var den som starta opp butikken, er det Ole Vaage dei fleste forbind den med; det finst nemleg framleis mange på Tysnes som kjente og hugsar Ole Vaage.

Etter butikken blei nedlagd, blei bygget kjøpt opp av ei stifting. Stiftinga starta òg opp eit renovasjonsarbeid, men det stoppa opp, på grunn av manglande midlar.


Hugsar butikken

Blant dei frammøtte laurdag var Vermund Onarheim. Han hugsar butikken godt.

– Eg var med far min, som var mjølkemann, og kjøpte is, sa Vermund.

Seinare blei han sjølv mjølkemann, og køyrde mjølkespann frå Onarheim til meieriet på Uggdalseidet.

Han fortalde at det den gongen var tre lastebilar som køyrde mjølk til meieriet; ein køyrde frå Onarheim, ein frå Lunde og ein frå Våge.

– Eg jobba der på 50- og 60-talet, sa Vermund.

– Det er veldig interessant å sjå her. Eg har aldri vore her oppe, berre nede på butikken. Det er veldig flott, sa han.

– Ole Vaage var ein veldig høfleg mann, det må du gjerne få med.


Gøy å sjå

– Eg var på visning her då dei la huset ut til sals, sa Bente Andersland.

– Det er pussa opp, men det er ikkje endra, la ho til.

– Eg synest det er bevart, og det er veldig flott.


Mange lovord

– Veit du kva, her er det berre kjempeherleg! sa Olaug Kvalvik.

Stordabuen er frivillig på MF Granvin, som la til kai ved Uggdalseidet søndag.

– Eg har vore her før, og då var det Sodoma og Gomorra. No er det praktfullt. Eg er så imponert over Torstein, sa Olaug, som har vore på Haaheim ved fleire høve.

– Når ein finn folk som satsar så hardt som han, så er det ein gevinst. Han gir så mykje av seg sjølv, sa ho.

NB: I denne saka bruker «Tysnes» namnet Engelaus, for E. H. Vaage. Me er merksame på at det fleire stader på nett er skrive Engolai Vaage, men me har valt å halda oss til det som står i Tysnes-soga, etter Tysne sogelag ved Ernst Berge Drange.



MIMRA: Vermund Onarheim tenkte tilbake på ungdomstida.
MIMRA: Vermund Onarheim tenkte tilbake på ungdomstida.
FLOTT: Bente Andersland sette pris på at huset var godt bevart gjennom renovasjonsprosessen.
FLOTT: Bente Andersland sette pris på at huset var godt bevart gjennom renovasjonsprosessen.
GRANVIN: Veteranbåten MF Granvin la til kai ved Uggdalseidet.
GRANVIN: Veteranbåten MF Granvin la til kai ved Uggdalseidet.
LYST OG FINT: Dette er eitt av mange soverom i huset.
LYST OG FINT: Dette er eitt av mange soverom i huset.
SMAKFULLT: Torstein har vore nøye i val av møblar og innreiing.
SMAKFULLT: Torstein har vore nøye i val av møblar og innreiing.
LIV OG RØRE: Det var mange som tok turen til Ole Vaage-huset søndag.
LIV OG RØRE: Det var mange som tok turen til Ole Vaage-huset søndag.

Siste saker Gå til framsida

Ynskjer ekstra omsorgsbemanning

Budsjettforhandlingane er godt i gang, og i formannskapet måndag tok Arne Leite (Sp) og Anne Merete Fjeldstad (Ap) til orde for å sjå på høva for å få fleire stillingar inn i omsorgstenestene.