GJENNOMKØYRING: Skulekorpset har starta oppkøyringa til NM, og spelte NM-programmet for publikum i Tysneshallen søndag.
GJENNOMKØYRING: Skulekorpset har starta oppkøyringa til NM, og spelte NM-programmet for publikum i Tysneshallen søndag.

Fyrste gjennomkøyring før NM

Søndag var det huskonsert i Tysneshallen, der skulekorpset for fyrste gong framførte NM-programmet for publikum, medan kulturskuleelevar bydde på flott song og musikk.
Publisert 03.06.2019 kl. 07.33.

– Me har framleis litt å jobba med, men det var ei god gjennomføring, fortel Nick Hughes, som er dirigent for Tysnes skulekorps.

Dei har starta oppkøyringa til NM, som er tre veker unna, og søndag framførte korpset NM-programmet for fyrste gong for publikum.


2. divisjon

I fjor imponerte korpsgjengen stort under NM i Grieghallen, og kom på fyrsteplass i 3. divisjon, noko som gjer at dei i år skal spela i 2. divisjon. Dirigent Hughes er spent på kva som møter dei i ny divisjon, samtidig som han ikkje altfor oppteken av kva plassering dei skulle enda på.

– Det viktigaste er at me klarar å spela best mogleg, og så vert det ein bonus om me får ein god plassering i tillegg, seier han.

Ei av dei som gler seg til å reisa med korpset til NM, er Tiril Sundal, som meiner dei framleis har meir å gå på.

– Eg synest me har spelt dette programmet betre på øving enn på framføringa i dag, så me treng kanskje eit par øvingar til før me er klare for NM, fortel ho.

For skulekorpset er NM eit av dei største høgdepunkta i løpet av året.

– Det er det gøyaste me er med på, seier Tiril.


Kulturskulen

I tillegg til at skulekorpset fekk vist seg fram for publikum, inneheldt konserten søndag også innslag frå elevar ved kulturskulen, og dei bydde på både song, piano- og gitarspeling.

Ein av dei som fekk prøvd seg, var Thor Eide, som spelte bass saman med to gitaristar.

– Det er fyrste gong eg har spelt ein ordentleg konsert, fortel han.

Thor har spelt bass i kring eit år.

– Det er kjekt, og eg tenkjer å fortsetja med spelinga, seier han.

Mange av dei som song eller spelte piano, har hatt Jurgita Bubilaite som instruktør, og ho er imponert over alle som framførte i Tysneshallen, sjølv om dei ikkje har halde på lenge med spelinga.

– Dei var kjempemodige som spelte framfor publikum, og dette er veldig god læring. Det er læring og meistring dette handlar om, i tillegg til at det er sosialt å kunne arrangera konsertar i lag med andre, fortel ho.




EIT STEG OPP: Korpset skal i år spela i 2. divisjon, etter at dei vann 3. divisjon i fjor.
EIT STEG OPP: Korpset skal i år spela i 2. divisjon, etter at dei vann 3. divisjon i fjor.
HAR TRUA: Dirigent Nick Hughes håpar dei klarar å gjera sitt beste under NM.
HAR TRUA: Dirigent Nick Hughes håpar dei klarar å gjera sitt beste under NM.
GITAR: Også elevar frå kulturskulen fekk prøvd seg framfor publikum i Tysneshallen. Desse gutane opna konserten, og Thor Eide (i midten) syntest det var kjekt å spela framfor publikum.
GITAR: Også elevar frå kulturskulen fekk prøvd seg framfor publikum i Tysneshallen. Desse gutane opna konserten, og Thor Eide (i midten) syntest det var kjekt å spela framfor publikum.
MANGE DELTAKARAR: Det var denne gjengen frå kulturskulen som enten spelte eller song på konserten.
MANGE DELTAKARAR: Det var denne gjengen frå kulturskulen som enten spelte eller song på konserten.
APPLAUS: Det frammøtte publikummet viste at dei var nøgd med konserten.
APPLAUS: Det frammøtte publikummet viste at dei var nøgd med konserten.

Siste saker Gå til framsida

Fotominne frå Langeland

Staden er Langeland og året 1970. Hesten og den gamle slåmaskinen heldt på denne tida framleis stand i jordbruket, fortel Harry Solberg, som har sendt oss dette kjekke bildet. Det er Jens Langeland som held i taumane, og borna på høykjerra er syskena Solberg frå Odda. Har du eit bilete frå farne tider som fortener å koma på trykk? Send det til redaksjonen@tysnesbladet.no, og hugs...