KUNDEKVELD: Det vrimla med folk på kundekvelden hos Annes Klær tysdag kveld, og Anfinn og Anne Margaret Kleppe var godt nøgd med frammøtet.
KUNDEKVELD: Det vrimla med folk på kundekvelden hos Annes Klær tysdag kveld, og Anfinn og Anne Margaret Kleppe var godt nøgd med frammøtet.

Feira fem år som butikk

Annes Klær var stappfull med folk då butikken markerte 5-årsjubileum med kundekveld.
Publisert 05.06.2019 kl. 15.58. Oppdatert kl. 16.42.

– Me pleier å ha moteoppvisning ein til to gongar i året, men no gjer me litt ekstra ut av det for å markera 5-årsjubiléet, fortel Anfinn Kleppe.

Tysdag leia han kundekvelden hos Annes Klær, der over 70 personar hadde møtt fram for å feira klesbutikken i Våge.

– Me er veldig godt nøgde med frammøtet, seier han.


Viste fram kleda

Kvelden opna med moteoppvisning, og dei fire modellane viste fram ti plagg kvar. Ein tradisjonell catwalk var bytt ut med ein veg mellom stolradene på tvers av butikken, og publikum kom tett på både modellane og antrekka.

– Me har fått med veldig kjekk modellar, som er flinke til å visa fram varene, fortel Anfinn.

Dei fire modellane var Liv Merchant, Ingrid Tysnes Stue, Lena Epland Sløgedal og Kristina Hauglid. Medan dei tre fyrste var temmeleg kjende for publikum, fortalde Anfinn at sistnemnde var innleigd frå Stord.

40 antrekk vart vist fram for publikum, og det var stor applaus for kvart einaste eitt. Det var òg tydeleg at fleire av plagga vekte interessa hos kundane.


Godt nøgd

Medan Anfinn leia showet ute blant publikum, heldt dagleg leiar Anne Margaret Kleppe seg baki kulissane, og hadde kontroll på modellane og klesbyta.

– Eg fekk ikkje sett så mykje av showet på nært hald sjølv, men det høyrtest ut som det gjekk veldig bra, fortel ein nøgd dagleg leiar etter oppvisninga.

Ho har ikkje mykje tid til å prata med «Tysnes», for det kjem stadig kundar som spør om ulike plagg dei såg på «catwalken».

– Det er heilt klart eit godt teikn at folk spør etter det me viste fram for dei.

Resten av kvelden bydde butikken mellom anna på loddtrekning, der ein både kunne vinna ein kjole, i tillegg til goodiebags med diverse innhald. Det var også tid til drøs, og ikkje minst shopping.

Butikken vrimla av kundar, og det var travelt bak disken.

– Me har mange gode og faste kundar, som me set veldig stor pris på, fortel Anfinn, og trekkjer det fram som ein av suksessfaktorane i løpet av dei fem åra butikken har eksistert.

Anne Margaret skyt også inn ein annan viktig faktor.

– Me har utruleg dyktige og flotte medarbeidarar, seier ho, før ho sjølv må innfinna seg bak kassen for å hjelpa fleire ivrige kundar.


MOTESHOW: Lena Epland Sløgedal var ein av modellane på moteoppvisninga. Denne rosa kjolen vart seinare lodda ut til ein heldig vinnar.
MOTESHOW: Lena Epland Sløgedal var ein av modellane på moteoppvisninga. Denne rosa kjolen vart seinare lodda ut til ein heldig vinnar.
ULIKE ANTREKK: Moteoppvisninga var populær, og Ingrid Tysnes Stue og dei andre modellane viste fram totalt 40 antrekk.
ULIKE ANTREKK: Moteoppvisninga var populær, og Ingrid Tysnes Stue og dei andre modellane viste fram totalt 40 antrekk.

Siste saker Gå til framsida

Ynskjer ekstra omsorgsbemanning

Budsjettforhandlingane er godt i gang, og i formannskapet måndag tok Arne Leite (Sp) og Anne Merete Fjeldstad (Ap) til orde for å sjå på høva for å få fleire stillingar inn i omsorgstenestene.