PÅ BISLETT: I kveld spring Pernilla Eugenie Epland (t.v.) 1.500 meter på Bislett Games. Målet er ny personleg rekord. Her frå 10.000-meteren under NM i Førde i fjor. (Arkivfoto)
PÅ BISLETT: I kveld spring Pernilla Eugenie Epland (t.v.) 1.500 meter på Bislett Games. Målet er ny personleg rekord. Her frå 10.000-meteren under NM i Førde i fjor. (Arkivfoto)

Spring 1.500 meter på Bislett Games i kveld

Tysnesing Pernilla Eugenie Epland er på startstreken når storstemnet Bislett Games går av stabelen i Oslo i kveld, torsdag.
Publisert 13.06.2019 kl. 12.47.

Bislett Games er ein lekk i den verdsomfattande serien Diamond League, og stjerner frå heile verda kjem til Oslo for å delta.

Pernilla skal denne gongen delta på 1.500 meter. Ho føler at ho er godt førebudd.

– Det har fungert fint på trening i det siste. Eg trur det skal gå bra, seier ho på telefon til «Tysnes» nokre timar før ho skal i elden.

Starten går klokka 18.21.

Eigentleg er 1.500-meteren litt for kort for Pernilla, ifølgje ho sjølv.

– Eg tek løpet i kveld litt som ei oppkøyring til 5.000-meteren som eg skal delta på i England på laurdag, kommenterer ho.

Målet er uansett å setja ny personleg rekord. Frå før har ho 4.24 på 1.500 meter, frå august i fjor.

Heile 17 damer står på startstreken på Bislett på 1.500 meter i kveld.

– I så store felt blir det ofte taktisk springing. Ein må følgja med heile tida, viss det skjer eit rykk, forklarar ho.

Verforholda i Oslo i dag er gode for ein løpar frå Vestlandet: Det er overskya og vindstille, og meldt om 14 grader i kveld.

– Det trivst eg godt med. Det ligg til rette for eit godt løp, seier Pernilla, som kom til Oslo i går.

NRK har sending frå Bislett Games frå klokka 17.45.


Siste saker Gå til framsida