MANGE KJENSLER: Nervøsitet, glede, lette, vemod – dagen var full av kjensler for tiandeklassingane. F.v. Atle Hystad, Malin Dalland, Henriette Lid Hillesvik og Alida Tvedt Petterson.
MANGE KJENSLER: Nervøsitet, glede, lette, vemod – dagen var full av kjensler for tiandeklassingane. F.v. Atle Hystad, Malin Dalland, Henriette Lid Hillesvik og Alida Tvedt Petterson.

– Eg trudde eg skulle spy

Sterke kjensler har vore i sving på Tysnes skule i dag. Der har nemleg elevane i 10. klasse hatt sin aller siste eksamen på grunnskulenivå.
Publisert 14.06.2019 kl. 15.51.

I vestibylen møter avisa si utsende tre ungdommar som entusiastisk diskuterer eksamenserfaringane sine. Malin Dalland og Henriette Lid Hillesvik har allereie vore oppe til munnleg eksamen i norsk, medan Atle Hystad ventar på sin tur i same fag.

Av dei tre faga som elevane kunne komma opp i – norsk, matte og engelsk – stod norsk høgt oppe på ønskelista til mange.

– Eg ville ikkje komma opp i matte. Engelsk hadde vore ok, men då måtte eg ha snakka om nyhende, og det ville eg ikkje. Men norsk er greitt. Det er jo norsk, det går fint å snakka norsk, seier Malin.

– Eg óg håpa at eg skulle komma opp i norsk, legg Henriette til, tydeleg nøgd med at ønsket gjekk i oppfylling.

Ei som ikkje fekk det som ho ynskte, er Maren Jensen Nes. Ho kom nemleg opp i matte.

– Eg var knust då eg kom opp i det. Eg likar ikkje matte. Eg håpa på norsk, fortel ho.

Likevel er det berre smil å sjå, etter at eksamen er over for hennar del.

– Det gjekk overraskande bra. Eg har fått god hjelp på førehand. Eg er nøgd med korleis det gjekk, for det gjekk betre enn eg venta, smiler Maren.


Ulike gradar av nervøsitet

Jentene er, naturleg nok, letta etter at den munnlege eksamenen er over.

– Det er kjempedeilig! No har me ferie, og kan slappa av vel vitande om at det er lenge til neste gong me skal ha eksamen, seier Malin, til nikk frå venninna.– Var de nervøse i forkant?

– Eg trudde eg skulle spy, svarar Henriette kontant.

– Eg har ikkje vore så nervøs på lenge. Det var mange kjensler inne i bildet, fortel Malin.

Ein som derimot ikkje er nervøs, er Atle. Han ville eigentleg komma opp i engelsk, men fekk det ikkje som han ville. Likevel er han ganske avslappa, i alle fall på utsida.

– Eg held nervane i sjakk, seier han med eit smil.

– Det er dei siste fem minuttane før du skal inn at du blir nervøs, konstaterer dei to jentene som har vore inne.

Medan «Tysnes» snakkar med dei, dukkar Alida Tvedt Petterson opp. Ho skal ha eksamen i engelsk, og er godt nøgd med faget ho trekte.

– Det var akkurat det eg håpa på. Eg er litt nervøs, men ikkje så veldig, fortel ho.


Ein epoke er over

Heldigvis gjekk eksamen bra for dei som journalisten snakka med. Malin og Henriette trekte same tema – konflikt – og snakka mellom anna om konflikten mellom bokmål og nynorsk.

Maren måtte laga ein presentasjon til matteeksamenen, om temaet idrett. Då vart det ein matte-relatert presentasjon om handball, fortel ho.

No ser ungdommane fram til ein sommar med ferieturar, avslapping og kvalitetstid med vennane før ein ny kvardag ventar dei til hausten.

Malin og Henriette har begge søkt seg inn på helse på Fitjar, medan Maren har søkt det same på Os.

Sjølv om stemninga var høg i skulekorridorane like etter eksamen, låg det ein undertone av vemod i lufta også.

– Eg kjenner meg veldig letta no, men det er trist å vera ferdig på Tysnes skule, konstaterer Maren.


Siste saker Gå til framsida

Leiar: Lokalsamfunn med eit godt hjelpeapparat

Natt til laurdag tok det til å brenna i eit bustadhus i Uggdal. Den unge familien kom seg til all lukke ut av det brennande huset utan fysiske skadar. I «Tysnes» denne veka kan me lesa at brannvesenet var på brannstaden eit kvarter etter at mor i huset fekk varsla om brannen klokka 03.23. Det gler...