GRATIS INNGANG: Eva Karin Wathne og Thomas Rennedal slepp å betala for festivalpass framover. (Begge foto: Vetle Mikkelsen)
GRATIS INNGANG: Eva Karin Wathne og Thomas Rennedal slepp å betala for festivalpass framover. (Begge foto: Vetle Mikkelsen)

Eva og Thomas får gratis inngang på Tysnesfest livet ut

Kva ville du gjort for å få gratis inngang på Tysnesfest? Eva og Thomas tatoverte «Tysnesfest» på handledda sine.
Publisert 15.06.2019 kl. 06.00.

– Det blei veldig spontant, seier Thomas Rennedal.

Søndag la Tysnesfest ut ein kampanje på Facebook. I kampanjen heitte det at dei 20 første som tatoverte «Tysnesfest», eller logoen til festivalen, ein synleg plass på kroppen skulle få gratis inngang livet ut.

Thomas og sambuaren Eva Karin Wathne var ikkje seine med å melda seg.

– Eg kjenner ein tatovør, så då berre skreiv eg ei melding til han, og spurde om han var klar dagen etter, seier Thomas.

– Kva synest de om tatoveringane?

– Dei funkar greitt, dei, seier Eva.

– Eg liker tatoveringar, eg skal ha på heile armen etter kvart, smiler Thomas.


Liker Tysnesfest

– Kva er dykkar forhold til Tysnesfest?

– Me bur jo her. Det er ikkje så mykje anna som skjer her. Det er jo årets store happening på øya, seier Thomas.

– Det er ein god fest med bra musikk, og noko som skjer, legg Eva til.

– Det er veldig kjekt at dei har Tysnesfest. Det er viktig at dei held på den, seier ho.

Thomas kjem opphaveleg frå Sotra, medan Eva kjem frå Sandnes. Før dei flytta saman til Tysnes budde dei ei stund på Sotra, utanfor Bergen.

– Korleis trivst de på Tysnes?

– Eg saknar jo byen litt, men dette er ein trygg plass for ungane å veksa opp, seier Eva.

– Eg liker det stille og roleg, legg sambuaren til.


Måtte vera raskt ute

– Kva tenker de om at Tysnesfest måtte setta ei grense på 20 personar?

– Den grensa gjekk fort! utbryt Eva.

– Det visste eg. Det var derfor eg skreiv til dei med ein gong, seier Thomas.

– Kva gjer de om festivalen går konkurs?

– Då tar eg ein cover-up, seier Eva.

– Ikkje eg. Eg beheld den, seier Thomas.

Det er ikkje alle som har vore like imponerte over tatoveringsstuntet til dei to sambuarane:

– Det har vore mange negative kommentarar òg, eigentleg. Folk synest det er teit og heilt hòl i hovudet, fortel Thomas.

– Eg drit i det. Eg tenker det at dei er eigentleg berre misunnelege, for dei tør ikkje gjera det sjølv, legg han til.


Siste saker Gå til framsida

Fotominne frå Langeland

Staden er Langeland og året 1970. Hesten og den gamle slåmaskinen heldt på denne tida framleis stand i jordbruket, fortel Harry Solberg, som har sendt oss dette kjekke bildet. Det er Jens Langeland som held i taumane, og borna på høykjerra er syskena Solberg frå Odda. Har du eit bilete frå farne tider som fortener å koma på trykk? Send det til redaksjonen@tysnesbladet.no, og hugs...