TEIKNA KJØKKENET: Linn Mari Kvamsdal har jobba mykje på kjøkken, heilt sidan lærlingtida. (Foto: Vetle Mikkelsen)
TEIKNA KJØKKENET: Linn Mari Kvamsdal har jobba mykje på kjøkken, heilt sidan lærlingtida. (Foto: Vetle Mikkelsen)

Har rusta opp kjøkkenet i ungdomshuset i Lunde

For to år sidan blei toaletta i ungdomshuset i Lunde oppgraderte. I år stod kjøkkenet for tur.
Publisert 16.06.2019 kl. 06.00.

– Alle i bygda visste jo at dette kjøkkenet som var her, det var ikkje god standard på lenger, seier Linn Mari Kvamsdal (34).

Ho er aktiv i Lunde ungdomslag, og var i mars med på å rusta opp det gamle kjøkkenet i ungdomshuset i Lunde.

Ifølge Kvamsdal var det på nittitalet at kjøkkenet sist blei opprusta; sjølve huset er frå 1920.

– Dei fann ein lapp frå nittitalet i veggen, då dei reiv den, fortel ho.


Gjort mykje arbeid

– Eg teikna kjøkkenet, så reiste eg på IKEA og fekk ferdigteikna det der, med nokre småjusteringar, seier Kvamsdal.

Sjølv har ho ikkje mykje erfaring med bygging av kjøkken, men ho har jobba på kjøkken sidan lærlingtida; no er ho kjøkkensjef på Mandelhuset.

Kvamsdal såg på fleire ulike typar kjøkken, før ho landa på den noverande kjøkkenløysinga.

– Eg tenkte at dette må no vera greitt. Det er masse benkeplass og store flater, seier ho.

– Og så valde me ei lita øyløysing på hjul, som me kan flytta inn i salen, eller ut, viss me treng meir plass, legg ho til, og viser til benken midt i rommet.


Dugnad i mars

Hovuddugnaden i ungdomshuset gjekk av stabelen 23. mars.

Under oppussinga av kjøkkenet blei nokre av veggane rivne ned, og ein sette opp nye veggpanel. I tillegg blei dei gamle skapa og kjøkkenbenkane erstatta med nye.

– Her var det ei open luke, så ein kunne servera, seier Kvamsdal, og peiker på den eine veggen.

– Men det er ikkje slik me driv i dag. No er det enten buffé, elles serverer me på fat og tallerkar, legg ho til.

Derfor blei serveringsluka lukka igjen.


Mange stilte opp

– Kven er det som har utført sjølve arbeidet?

– Mange frå Lundebygda. Me sette opp lapp, og så stilte mange på dugnad, fortel Kvamsdal.

Ho trekker spesielt fram Nils Kåre Fjeldet Lunde og Kristoffer Lunde, som gjorde mykje arbeid både før og etter dugnaden.

– På hovuddugnaden, då jobba folk i cirka åtte-ti timar. Det var ein del som gjenstod i dagane og vekene etterpå, som då Kristoffer og Nils Kåre gjorde, seier ho.

– Kva synest du om resultatet?

– Eg er veldig fornøgd! Eg liker veldig godt at det er god plass til å laga mat på, seier Kvamsdal.

– Kva enda det opp med å kosta?

– Til slutt så blei det vel 50.000, svarer ho.


Mykje brukt hus

– Kva bruker folk ungdomshuset til?

– No i helga var det for eksempel bryllaupsfest her. Og folk bruker det til konfirmasjon og barnedåp, og me i ungdomslaget har hatt nokre dansar og ungdomsarrangement og liknande, svarer Kvamsdal.

– Det er ein del aktivitet i huset, altså?

– No på sommaren er det vel ein del mindre, for då er folk så opptatte med ferie og festival, og å jobba som frivillig for Tysnesfest, seier ho.

Kvamsdal legg til at det i vår, i tillegg til konfirmasjon og bryllaupsfest, har vore 17. mai-arrangement i bygget.

– Me i ungdomslaget hadde ein stor dans her 17. mai, i tillegg til at Lundebygda hadde 17. mai-feiring på dagtid. Det var mykje folk innom, både på dagtid og kveldstid, seier ho.

Ho fortel vidare at Lundegrend idrettslag har faste, årlege basarar i huset. I tillegg har Big Men Bluesband øvingslokale der.

– Huset er ikkje berre for nokon, det er for alle i bygda. Viss ein har lyst på ei samling, enten det er ungdommar, barneselskap, diskotek eller ein kortkveld for den del, så er huset der, seier Kvamsdal.

Ho håper at fleire får augo opp for at ungdomshuset kan leigast til ulike formål.


Sosialt fellesskap

Kvamsdal flytta til Tysnes i 2012, etter å ha budd fleire år i Bergen. Opphaveleg kjem ho frå Masfjorden. Ho trekker fram dugnadsarbeid som noko som hjelpte ho til å bli kjent med fleire på Tysnes, då ho var fersk tilflyttar.

– Kva tid begynte du å engasjera deg i frivilligheita her på Tysnes?

– Det var vel ikkje eigentleg så lenge etter at eg flytta hit, at eg blei spurt av ungdomslaget, seier ho.

– Eg liker dugnadsarbeid fordi ein blir fort kjent med folk, legg ho til.


FØR: Slik såg kjøkkenet ut tidlegare i år. (Foto: Privat)
FØR: Slik såg kjøkkenet ut tidlegare i år. (Foto: Privat)
ETTER: Forskjellen er stor, frå korleis kjøkkenet såg ut før. (Foto: Vetle Mikkelsen)
ETTER: Forskjellen er stor, frå korleis kjøkkenet såg ut før. (Foto: Vetle Mikkelsen)

Siste saker Gå til framsida

Fotominne frå Langeland

Staden er Langeland og året 1970. Hesten og den gamle slåmaskinen heldt på denne tida framleis stand i jordbruket, fortel Harry Solberg, som har sendt oss dette kjekke bildet. Det er Jens Langeland som held i taumane, og borna på høykjerra er syskena Solberg frå Odda. Har du eit bilete frå farne tider som fortener å koma på trykk? Send det til redaksjonen@tysnesbladet.no, og hugs...