TRE POENG: Jenter 13-laget tok ein flott siger på graset på Reiso torsdag kveld.
TRE POENG: Jenter 13-laget tok ein flott siger på graset på Reiso torsdag kveld.

Vann i generalprøven til Norway Cup

Jenter 13 avslutta vårsesongen med ein solid 4-1-siger over Sotra på graset på Reiso.
Publisert 17.06.2019 kl. 10.07. Oppdatert kl. 10.22.

Det låg an til å verta ein jamn kamp mellom Njardar/Tysnes og Sotra i 1. divisjon i J13-klassen. Berre eitt poeng, i favør Njardar, skilde laga før dei torsdag møtte kvarandre til den siste kampen før sommaren. Ein sommar som for Jenter 13 sin del betyr tur til Oslo og Norway Cup.


Tok leiinga

Sidan kunstgraset vart brukt til Gutar 14 sin kamp mot Rosendal/Uskedal, nytta jentene høvet til å ta grasbanen på Reiso i bruk. Og sjølv om heimelaget er van til å spela på kunstgras, såg det ut til å vera dei som fekk den største fordelen av underlaget.

Njardar gjekk offensivt ut frå start, og sette tidleg eit press på jentene frå Sotra. Presset enda opp i ein corner i det fjerde minuttet, og dødballtakar Mia Helvik skrudde corneren rett inn i nettet.

Etter den gode opninga vart kampen meir jamspelt, men Njardar-keeper Stine Erstad hadde god kontroll lengst bak på banen, og det var heimelaget som skapte dei største sjansane.

Etter kring 30 minutt spelte Njardar seg fint fram på venstresida, og fekk lagt inn til Mia Helvik som venta framfor mål. Ei vending og avslutting av høg kvalitet frå ti meter dobla leiinga, og gultrøyene kunne gå til pause med 2–0-leiing.


Punkterte kampen

Njardar-jentene starta andre omgang med same høge press som i starten av kampen, og dei fekk utteljing med ein gong. Ikkje mange minutta var spelt då Tora Nødland Austvik kom seg laus på venstresida, og fekk sett inn 3-0. Like etter var Mia Helvik igjen frampå, og sikra seg hattrick med sitt tredje mål for kvelden.

Kampen var i grunn avgjort på dette tidspunktet, men bortelaget fortsette å kjempa, og kom til fleire gode sjansar, og mot slutten av kampen fekk dei også eit trøystemål med seg heim frå Tysnes.

Njardar vann dermed 4–1, og klatra til fjerdeplass på ein jamn 1. divisjonstabell. Dei har berre fem poeng opp til serieleiar Bjarg, men samtidig berre fire poeng ned til Sotra, som ligg på åttande og nest siste plass på tabellen.


Viktige poeng

Med ei så jamspelt avdeling, var det tre viktige poeng Njardar-jentene fekk med seg for å halda seg unna botnstriden.

– Det var ein av dei viktigaste kampane i år, fortel ei nøgd Alma Vermedal etter matchen.

– Korleis er det då å gå sigrande ut av ein så viktig kamp?

– Det er heilt nydeleg. Ein føler seg 100 kilo lettare, svarar ho.

Ho er tydeleg på kva som gjorde at dei presterte så bra mot Sotra.

– Me fekk verkelet til lagspelet i dag. Alle må vera gode viss me skal vinna, og i dag var alle gode.

Dette var Njardar-jentene sin siste kamp for sesongen, og laget skal no gjera seg klare til å reisa til Norway Cup i slutten av juli.

– Det vert spennande, og eit heilt anna nivå, og med lag frå både Oslo og Trondheim. I tillegg vert det masse folk som ser på, avsluttar Alma.


KLATRA: Dei tre poenga mot Sotra førte Njardar-jentene opp på fjerde plass på tabellen.
KLATRA: Dei tre poenga mot Sotra førte Njardar-jentene opp på fjerde plass på tabellen.
JUBEL: Det var ein nøgd gjeng med Njardar-spelarar som kunne jubla etter sigeren.
JUBEL: Det var ein nøgd gjeng med Njardar-spelarar som kunne jubla etter sigeren.
KLAR FOR NORWAY CUP: Dette var laget sin siste kamp før sommaren, og avreise til Norway Cup.
KLAR FOR NORWAY CUP: Dette var laget sin siste kamp før sommaren, og avreise til Norway Cup.

Siste saker Gå til framsida

Leiar: Lokalsamfunn med eit godt hjelpeapparat

Natt til laurdag tok det til å brenna i eit bustadhus i Uggdal. Den unge familien kom seg til all lukke ut av det brennande huset utan fysiske skadar. I «Tysnes» denne veka kan me lesa at brannvesenet var på brannstaden eit kvarter etter at mor i huset fekk varsla om brannen klokka 03.23. Det gler...