LØFTA TAKET: Dette koret trong ingen mikrofonar. Elevane ved Uggdal skule song for full hals under lunsjkonserten sist veke.
LØFTA TAKET: Dette koret trong ingen mikrofonar. Elevane ved Uggdal skule song for full hals under lunsjkonserten sist veke.

Fylte gymsalen med song

Viss nokon lurte på kva dei høge lydane på Reiso var rundt lunsjtider sist fredag, var det berre elevane ved Uggdal skule som song så taket nesten løfta seg.
Publisert 18.06.2019 kl. 10.00.

Den etter kvart så tradisjonsrike lunsjkonserten til Uggdal skule trekte eit stort publikum, og gymsalen var full av foreldre og besteforeldre, onklar og tantar og små og store søsken som ville få med seg elevane sin opptreden.

– Det er utruleg kjekt at så mange ville komma hit i dag. Det er nesten så ein skulle tru at ingen hadde noko å ta seg til på ein fredag føremiddag, spøkte rektor Bente Raknes, til latter frå salen.


Forseinka feiring

Lunsjkonserten vart i år arrangert for fjerde gong, og er ein del av den nasjonale feiringa av skulane sin songdag. Eigentleg var songdagen onsdag sist veke, og vart då feira med mellom anna direktesendt allsongfest i Oslo Konserthus, med fleire hundre elevar og Oslo-Filharmonien.

– Dessverre kunne ikkje me ha konsert den dagen, for då var me berre SFO-elevar her på skulen, fortalde Raknes til publikum.

Men sjølv om dei var eit par dagar på etterskot, skorta det ikkje på song- eller danseglede hjå dei over 100 elevane då dei endeleg fekk ta del i feiringa.

– Dette er kjempekjekt, og flott å høyra på, kommenterte Jorunn Iversen etter konserten. Ho har barnebarn på skulen, og var på konserten for fjerde gong.


Hummar og kanari

Med eit fullspekka og variert program underheldt elevane i nesten ein time, og imponerte med flinke solistar og koreografert dansing. Programmet var sett saman av eit utval songar som elevane har øvd på i løpet av skuleåret, så publikum fekk servert alt frå 17. mai-songar til songar frå julemusikalen «Knut og Fjompenissen», med meir.

– Det er litt hummar og kanari, sa rektoren med eit smil, før elevane opna konserten med songen «Her er starten», frå «Knut og Fjompenissen».

Allereie under den andre songen var det på grensa til å verta allsong i gymsalen, då elevane med stor innleving song ein av «nasjonalsongane» til Tysnes, nemleg Anders Bakke-låten «Seila Heim».


Kardemomme by

Fleire av songane på programmet er kjende frå Folk og røvere i Kardemomme by av Thorbjørn Egner, og rektoren kunne fortelja at skulen eigentleg hadde planar om å ha ei teateroppsetjing av den populære barneboka.

– Me har øvd på songane, men me rakk ikkje å ha ei oppsetjing. Difor syng me nokre av songane no, for at ikkje alt arbeidet skal vera forgjeves, sa Raknes, før publikum fekk høyra «Tante Sofies sinte vise», «Kamomilla spiller» og «Papegøyen fra Amerika».

To songar som verkeleg fekk reinska ut øyrevoksen på tilhøyrarane, var den artige songen «Traktor», og sist men ikkje minst «Det går et festtog gjennom landet», som vart skriven til grunnlovsjubileet i 2014.

– Me avsluttar med denne fordi – unnskyld språket – me er dritgode på denne songen, sa rektoren, før elevane demonstrerte at dét hadde ho heilt rett i.


Kjempar for song i skulen

Konserten fekk eit preg av alvor då rektoren uttrykte uro over at song og musikk kan forsvinna frå klasseromma når dei nye læreplanane trer i kraft frå 2020. Demonstrasjonar for å bevara song i skulen fann stad framfor Stortinget same dag som skulane sin songdag vart arrangert sist veke, og kampsaka er noko rektoren støttar heilhjarta.

– Det er godt for helsa og for læring med song og musikk, og me kjem til å halda fram med det, konstaterte ho, og fekk støtte frå mellom anna Sigfrid Sandvik Helland, som var blant publikum og er bestemor til to av borna ved skulen.

– Det er så stor songglede, så dette var absolutt verdt å få med seg. Det er for gale at dei snakkar om å ta vekk song i skulen. Ein ser jo kor godt borna likar å synga, konstaterte ho etter konsertslutt.


FLINKE SOLISTAR: Nesten kvar song kunne by på ein ny solist. Her er det Regine Kjellevold Tvedt som syng «Kamomilla spiller».
FLINKE SOLISTAR: Nesten kvar song kunne by på ein ny solist. Her er det Regine Kjellevold Tvedt som syng «Kamomilla spiller».
DANSENUMMER: Elevane hadde til og med eit par dansenummer, der halve gymsalen vart gjort om til dansegolv for dei danseglade borna.
DANSENUMMER: Elevane hadde til og med eit par dansenummer, der halve gymsalen vart gjort om til dansegolv for dei danseglade borna.
NEI TIL MOBBING: Uggdal skule held på med å bli sertifisert som ein Olweus-skule, noko som inneber å følgja eit program for å førebyggja mobbing. Då passa det godt å syngja ein song om temaet.
NEI TIL MOBBING: Uggdal skule held på med å bli sertifisert som ein Olweus-skule, noko som inneber å følgja eit program for å førebyggja mobbing. Då passa det godt å syngja ein song om temaet.
NØGD PUBLIKUM: Ein nesten fullsett gymsal fekk ein god start på helga og ein god dose songglede å ta med seg heim.
NØGD PUBLIKUM: Ein nesten fullsett gymsal fekk ein god start på helga og ein god dose songglede å ta med seg heim.

Siste saker Gå til framsida

Fotominne frå Langeland

Staden er Langeland og året 1970. Hesten og den gamle slåmaskinen heldt på denne tida framleis stand i jordbruket, fortel Harry Solberg, som har sendt oss dette kjekke bildet. Det er Jens Langeland som held i taumane, og borna på høykjerra er syskena Solberg frå Odda. Har du eit bilete frå farne tider som fortener å koma på trykk? Send det til redaksjonen@tysnesbladet.no, og hugs...