MANN OVER BORD: Her har Petter Strømme gått i sjøen. «Jo» kullsegla på veg inn til land etter å ha kryssa målstreken under laurdagens andre seglas.
MANN OVER BORD: Her har Petter Strømme gått i sjøen. «Jo» kullsegla på veg inn til land etter å ha kryssa målstreken under laurdagens andre seglas.

Kollsegla i vanskeleg vind

Ustabile vindforhold prega årets sommarregatta.
Publisert 23.06.2019 kl. 17.37. Oppdatert kl. 17.56.

– Det bles kring tre til sju sekundmeter i går, men det var meir i kasta. Då var det oppe og lukta på frisk bris.

Det fortel regattasjef Torbjørn Meland då «Tysnes» snakkar med han tidleg søndag ettermiddag. Då er dei 13 påmelde båtane ute på fjorden, i gong med dagens fyrste seglas.


15 år sidan siste kretsmeisterskap

I år er sommarregattaen til Båtlaget Njord/Tysnes delt inn i to klasser: oselvar K-klasse, og oselvar spriklasse. K-klassen har ti kvadratmeter store bermudasegl, medan den meir vanlege spriklassen har sprisegl på åtte kvadratmeter. I spriklassen er det fem båtar med, medan det i K-klassen er åtte båtar.

– Det er ikkje så verst. Det er lenge sidan det har vore mønstra så mange båtar med bermudasegl, konstaterer regattasjefen nøgd.

På grunn av det høge talet på påmelde båtar, vert det i år arrangert kretsmeisterskap i K-klasse, for fyrste gong sidan 2004.

Oselvarane i K-klassen fangar meir vind og kan difor gå raskare på sjøen. Når ein kombinerer dét med ustabile vindtilhøve, kan seglturen fort by på meir spenning enn ein kanskje hadde ønska seg.

– Me hadde eit par båtar som kollsegla i går. Den eine kollsegla under seglasen, medan den andre kollsegla etter at han hadde gått i mål ute ved Teiglandsfluo, og var på veg attende til land, fortel Meland.

Sistnemnde var Milde-båten «Jo».

– Det var då eg hadde symjeundervisning, ja, humrar Kjell Totland, då «Tysnes» spør han om hendinga. Både han og resten av mannskapet fekk seg ein noko ufriviljug symjetur medan dei jobba med å få båten til land.


Frå for mykje til for lite vind

Dei skiftande vindforholda førte óg til uventa situasjonar for dei andre deltakarane. Meland fortel at det på laurdag var ein båt, som hadde leia store deler av løpet, som vart forbigjengen omtrent på målstreken, då vinden brått snudde.

– Det er ikkje så kjekt for seglarane når det er så upårekna vindforhold som det, seier Meland.

Søndagen var prega av at det var vesentleg mindre vind på fjorden.

– Det er vinden som avgjer kor mange løp det vert. Målet er å få til to, forklarar regattasjefen.

Etter laurdagens to seglasar var det båten «Jo» frå Milde Båtlag som låg i leiinga i K-klassen, medan Tysnes-båten «Berserk» leidde i spriklassen. Alle dei fem båtane i spriklassen segla vel å merka for Njord/Tysnes.


Følgjer i faren sine fotspor

14 år gamle Tiliam Strømme, og faren Petter Strømme, var begge med som mannskap på «Jo», der Kjell Totland var skipper. Tenåringen seglar laser for RAN Seilforening regelmessig, og byrja læra seg å segla oselvar for eitt år sidan.

– Det er Kjell som lærer han det. Han lærte meg å segla oselvar då eg var på same alder, fortel faren. Han har vore aktiv i oselvarmiljøet sidan 1988, og har vore med på regattaar på Tysnes mange gonger.

Dei to fortel om krevjande forhold denne helga, men legg ikkje skjul på at dei likar litt vind i segla.

– Det har vore ein kjekk regatta, i alle fall med tikvadratssegl, for det går litt fortare då, smiler Tiliam Strømme.

– Det var kjekt i går, då me kom ut på fjorden og fekk mykje vind og fart. Det er spesielt kjekt å segla med tikvadratssegl, så det skulle eg gjort oftare, seier Petter Strømme, og legg til at han vekslar mellom å segla oselvar med vanleg sprisegl og med bermudasegl.


Gull og sølv til Milde Båtlag

Sjølv om ein av båtane i spriklassen, «Seira», måtte bryta under andre seglas laurdag, på grunn av ein vant som rauk, stilte alle båtane på startstreken att til søndagens løp.

Etter to seglasar, vart vinnarane av dei to klassene kåra. Sigeren i spriklassen gjekk til «Berserk», med skipper Jan Vee og mannskap Steffen S. Opdal og Eline Teigland. Andreplassen gjekk til «Seira», styrt av Svein Økland, Sindre Økland og Åshild Økland. Sistnemnde fekk og eit napp i vandrepokalen «Falne Seileres Pokal», for største forsprang. Startpokalen, Kåre Johnsen Minnepokal, gjekk og til «Seira».

Vinnaren av K-klassen, og dermed ny kretsmeister, vart båten «Sjanse» frå Milde Båtlag, med skipper Nils-Ove Nipen og mannskap Harald Nipen og Ove Gram Nipen. Dei sikra seg óg eit napp i Harald Dalland sin minnepokal.

– Det var veldig skiftande vind, så det gjekk litt på hell og lykke. Men ellers var det greitt, svarar skipperen, når han får spørsmål om korleis det var å segla i helga.

Andreplassen i K-klassen var det «Jo» som stakk av med.

– Det må me vera nøgde med, konstaterer Petter Strømme med eit smil.






DRAHJELP: Petter Strømme og "Jo" blir slepte mot land.
DRAHJELP: Petter Strømme og "Jo" blir slepte mot land.
FINT PÅ FJORDEN: «Kostalita», med (f.v.) Alex Cato Lunde, Gisle Mikalsen og Børge Pedersen rundar ei blåse.
FINT PÅ FJORDEN: «Kostalita», med (f.v.) Alex Cato Lunde, Gisle Mikalsen og Børge Pedersen rundar ei blåse.
GOD FART: Her har «Mossi», med (f.v.) Jarle Aase, Knut-Ove Gjersvik og Åsne Instanes fått vind i segla.
GOD FART: Her har «Mossi», med (f.v.) Jarle Aase, Knut-Ove Gjersvik og Åsne Instanes fått vind i segla.
ASSISTANSE: Det måtte eit par båtar og nokre ekstra nevar til for å berga oselvaren.
ASSISTANSE: Det måtte eit par båtar og nokre ekstra nevar til for å berga oselvaren.
DAG TO: Søndagen gjekk to nye løp av stabelen. Her seglar "Bris" og "Berserk" nesten side om side. I bakgrunnen kan ein skimta "Glimt" og "Mossi".
DAG TO: Søndagen gjekk to nye løp av stabelen. Her seglar "Bris" og "Berserk" nesten side om side. I bakgrunnen kan ein skimta "Glimt" og "Mossi".
VINNAR SPRI: Skipper Jan Vee (midten), Steffen S. Opdal og Eline Teigland har all grunn til å smila, etter at dei vann spriklassen med båten "Berserk".
VINNAR SPRI: Skipper Jan Vee (midten), Steffen S. Opdal og Eline Teigland har all grunn til å smila, etter at dei vann spriklassen med båten "Berserk".
VINNAR K-KLASSE: (f.v.) Harald Nipen, Ove Gram Nipen og skipper Nils-Ove Nipen vann K-klassen med båten "Sjanse". Dei seglar for Milde Båtlag.
VINNAR K-KLASSE: (f.v.) Harald Nipen, Ove Gram Nipen og skipper Nils-Ove Nipen vann K-klassen med båten "Sjanse". Dei seglar for Milde Båtlag.
MILDE PÅ ANDREPLASS: Milde-båten "Jo" stakk av med andreplass i K-klassen. Mannskapet (f.v.) Petter Strømme, Tiliam Strømme og skipper Kjell Totland sa seg nøgde med det.
MILDE PÅ ANDREPLASS: Milde-båten "Jo" stakk av med andreplass i K-klassen. Mannskapet (f.v.) Petter Strømme, Tiliam Strømme og skipper Kjell Totland sa seg nøgde med det.
TRE POKALAR: Tysnes-båten "Seira" kom på andreplass i spriklassen, og fekk dessutan napp i to andre pokalar. F.v. Sindre Økland, Åshild Økland og skipper Svein Økland.
TRE POKALAR: Tysnes-båten "Seira" kom på andreplass i spriklassen, og fekk dessutan napp i to andre pokalar. F.v. Sindre Økland, Åshild Økland og skipper Svein Økland.

Siste saker Gå til framsida

Leiar: Lokalsamfunn med eit godt hjelpeapparat

Natt til laurdag tok det til å brenna i eit bustadhus i Uggdal. Den unge familien kom seg til all lukke ut av det brennande huset utan fysiske skadar. I «Tysnes» denne veka kan me lesa at brannvesenet var på brannstaden eit kvarter etter at mor i huset fekk varsla om brannen klokka 03.23. Det gler...