TIL MINNE: Tidlegare fylkesmann Svein Alsaker tek seg ein augneblink med refleksjon framføre statuen av Johannes Heggland.
TIL MINNE: Tidlegare fylkesmann Svein Alsaker tek seg ein augneblink med refleksjon framføre statuen av Johannes Heggland.

– Han ser veldig avslappa ut, sånn som han alltid var

Avdukinga av statuen av Johannes Heggland markerte starten av 100-årsjubileet til forfattaren.
Publisert 29.06.2019 kl. 14.25.

I strålande sommarsol vart i dag statuen av den velkjende Tysnes-forfattaren avduka i grøne omgjevnadar utanfor Tysneshallen.


Fekk stor pengegåve

Både ordførar Kåre Martin Kleppe, og styreleiar i Tysnes kraftlag, Audun Magnussen, tala varmt om arbeidet med å få stelt i stand ei jubileumsmarkering for Johannes Heggland.

– Det har vore eit godt stykke arbeid å få laga til denne markeringa, og det skulle berre mangla, for me har mange å takka for det. Men aller fremst Johannes Heggland. Eg vil og få lov til å særskilt gratulera familien til Johannes med dagen i dag, sa Kleppe til forsamlinga, som sjølvsagt inkluderte familien til Johannes Heggland.

Tysnes kraftlag har vore med som sponsor for prosjektet, og Magnussen overraska under sin tale ordføraren med ein sjekk på 150.000 kroner til prosjektet.


«De hev gneista»

Tidlegare fylkesmann Svein Alsaker fekk æra av å avduka statuen, og heldt ein lengre tale der han mellom anna delte små anekdotar frå Heggland sitt lange og produktive liv.

– Johannes Heggland bestemte seg tidleg for å verta forfattar. Allereie som ung tenåring skreiv han mykje, og las alt han kom over. Fjorten år gamal sende han sitt første bokmanuskript til eit forlag. Det var ein røvarroman, som vart refusert av indremisjonsforlaget Sambåndet. Med følgande oppmuntrande ord: «De hev gneista. Så berre hald fram», fortalde Alsaker, til ei lattermild forsamling.

Heldigvis for alle, heldt Johannes Heggland fram.


Vaks opp med Johannes i heimen

Etter den høgtidelege avdukinga, overrekte ordføraren ei blomegåve til kunstnaren som har laga skulpturen, Vidar Bratlund-Mæland. Han kunne fortelja at han sjølv vaks opp med Johannes Heggland i heimen, fordi mora hans var forfattar, som Johannes tok inn under venga si.

– Så det er vanvittig stas å få lov til å bruka eit år meir med Johannes, sjølv etter at han er vekke. Så takk for at de gav meg sjansen, sa han til dei frammøtte.

Det vanka mange kompliment til kunstnaren etter avdukinga, ikkje minst frå dei to døtrene til Johannes Heggland.

– Han ser veldig avslappa ut, sånn som han alltid var, kommenterte Marianna Heggland Brungot, då ho fekk ta statuen i nærmare augesyn.


Meir på programmet

Jubileumsfesten heldt fram med konsert i Tysneshallen, før det vart arrangert forfattarsamtale om den kommande Heggland-biografien av Ernst Berge Drange.

Seinare i dag er det duka for den store premieren på spelet om Olavsgildet, som Johannes Heggland gav til Tysnes kommune for 20 år sidan.


VELKOMST: Ordførar Kåre Martin Kleppe ønskte folk velkomen til jubileumsfeiringa.
VELKOMST: Ordførar Kåre Martin Kleppe ønskte folk velkomen til jubileumsfeiringa.
MANGE INTERESSERTE: Det var mange som tok turen til Gjerstad for å få med seg avdukinga av Heggland-statuen på det som ville vore forfattaren sin 100-årsdag.
MANGE INTERESSERTE: Det var mange som tok turen til Gjerstad for å få med seg avdukinga av Heggland-statuen på det som ville vore forfattaren sin 100-årsdag.
HYLLA HEGGLAND: Svein Alsaker heldt ein lang og spennande tale der han fortalde om Johannes Heggland sitt liv og virke.
HYLLA HEGGLAND: Svein Alsaker heldt ein lang og spennande tale der han fortalde om Johannes Heggland sitt liv og virke.
SKULPTØREN: Vidar Bratlund-Mæland har laga skulpturen av forfattaren, som han kjende personleg.
SKULPTØREN: Vidar Bratlund-Mæland har laga skulpturen av forfattaren, som han kjende personleg.
KONSERT: Etter avdukinga var det flott konsert i Tysneshallen, med fløytist Vidar Austvik og klassisk gitarist Njål Vindenes.
KONSERT: Etter avdukinga var det flott konsert i Tysneshallen, med fløytist Vidar Austvik og klassisk gitarist Njål Vindenes.

Siste saker Gå til framsida

Fjord1 vil møta tysnespolitikarane

Prosjektdirektør Nils Kristian Berge i Fjord1 set si lit til at politikarane i Tysnes godkjenner søknaden om nytt teknisk bygg på ferjekaien i Våge på neste møte i utval for landbruk/teknisk.

Svindel-e-post florerer

Politiet har fått inn fleire meldingar om svindel-e-post. – Me har mellom anna fått fleire henvendingar frå folk som mottek e-post med vedlagt faktura, frå bedrifter som dei ikkje har vore i kontakt med i det heile tatt, fortel Susann Rosvold, politibetjent ved Tysnes lensmannskontor. – Dette er rein svindel, og viss fleire har opplevd å få ein slik faktura, kan dei sjå bort...