Leiar: Sogespelet var prikken over i’en for eit verdig Heggland-jubileum

Publisert 04.07.2019 kl. 18.00.

Gratulerer alle saman, og Marte og Øyvind spesielt.

Dei to unge amatørskodespelarane Marte Stien og Øyvind Skartveit imponerte storleg i Spelet om Olavsgildet i kulturkyrkja på Onarheim fredag og laurdag, i rollene som riksmanndottera Sigyn og fattige Greip frå Laukhamar. Imponerte gjorde og alle dei andre som deltok i sogespelet, anten dei hadde små eller store roller. Det var imponerande å sjå dei aller yngste, korleis dei boltra seg på den nye fine scenen i Onarheimskyrkja, og like imponerande var det å følgja resten av skodespelarane, både dei litt eldre og dei eldste i flokken. Denne samansetjinga av unge og eldre gjorde spelstykket til eit blinkskot, som regissør Johanne Øvstebø Tvedten skal ha all ros for.

Ros fortener alle dei andre også, som medverka til at denne imponerande historiehelga blei ei minnerik oppleving. Musikarane og songarane, musikkansvarleg Yngve Nikolaisen og prosjektleiar Ingebjørg Hatteberg, sminkerane og ikkje minst dei entusiastiske medlemene i husflidslaget som har sytt for alle dei fantastiske kostyma.

Heilt spesielt er det også, at ein i eit historisk skodespel frå Vestlandet på 1300-talet får med seg både ordførar, rådmann og tidlegare lensmann i viktige roller. Det er med og framhevar prosjektet. Me trur ikkje det er mange kommunar som kan visa til noko liknande. Men det kan me i Tysnes.

Han hadde fortent å få sjå denne flotte oppsetjinga, Johannes Heggland, som forfattar og ideskapar til sogespelet som han sjølv overrekte til Tysnes for 20 år sidan, på 80-årsdagen sin.

Superlativa haglar frå publikum på Facebook etter framføringane: Knallflinke, ei fantastisk oppleving, kjempeflott sogespel, fantastisk flinke, imponert, kvalitet i alle ledd, ei stor oppleving, mektig imponert, de var dyktige, absolutt heilt topp, eit eventyr, magisk å vera publikum, all teksten som borna hadde lært seg og som dei framførte så flott, ei oppleving for historiebøkene, så flott - så fint - så godt skuespilleri og sang og musikk at jeg ble helt satt ut - levert av amatører fra vesle Tysnes, magisk å vera publikum, tenk så mange flinke folk fra Tysnes, fantastisk rett og slett, er heilt imponert, gler meg til neste gong for dette lyt de fortsetja med.

Ja, superlativa frå publikum ville ingen ende ta. Og det er vel fortent. Dette var berre heilt topp, alle de som har vore involvert i prosjektet. Rosen og æra er vel fortent. Dette blei ei imponerande historiehelg på vesle Tysnes.

29. juni 2019 kan gå inn i historiebøkene våre som ein merkedag, som tok til med ei flott avduking i Tysnesbygdo. Hundre år etter at forfattar, historikar, lokalpolitikar og samfunnsmann Johannes Heggland blei fødd, fekk tidlegare fylkesmann Svein Alsaker æra av å avduka statuen av han. Kunstnar Vidar Bratlund-Mæland har forma ein tenkjande Johannes, sitjande på ei lita steintrapp ved vegen ned til Tysneshallen, skuande utover Tysnesbygdo, med den roa Johannes hadde over seg i kvardagen. Som forfattar sette Johannes Tysnes på kartet som ingen etter han har gjort i Sunnhordland. Det fortener ei statue.

• Les også: – Han ser veldig avslappa ut, sånn som han alltid var

All honnør til Tysnes kommune som tok ansvar for at hundreårsjubileet blei markert på ein fin og verdig måte. Takk også til dei som har jobba i kulissane for denne markeringa, som vil bli ein merkedag i Tysnessoga.

redaksjonen@tysnesbladet.no


NATURTALENT: Marte Stien og Øyvind Skartveit gjorde svært god figur i Spelet om Olavsgildet i helga. (Foto og video: Ole Skaten)
NATURTALENT: Marte Stien og Øyvind Skartveit gjorde svært god figur i Spelet om Olavsgildet i helga. (Foto og video: Ole Skaten)

Siste saker Gå til framsida

Leiar: Lokalsamfunn med eit godt hjelpeapparat

Natt til laurdag tok det til å brenna i eit bustadhus i Uggdal. Den unge familien kom seg til all lukke ut av det brennande huset utan fysiske skadar. I «Tysnes» denne veka kan me lesa at brannvesenet var på brannstaden eit kvarter etter at mor i huset fekk varsla om brannen klokka 03.23. Det gler...