RETUR: For ti år sidan var Helge Jordal i Kjevikjo og framførte «Terje Vigen». I år kjem Jordal tilbake med reprise av framsyninga onsdagen under Tysnesfest. (Foto: Tysnesfest)
RETUR: For ti år sidan var Helge Jordal i Kjevikjo og framførte «Terje Vigen». I år kjem Jordal tilbake med reprise av framsyninga onsdagen under Tysnesfest. (Foto: Tysnesfest)

Gjentar ti år gammal suksess

Helge Jordal får oppgåva med å lokka folk utandørs på den fyrste festivaldagen.
Publisert 06.07.2019 kl. 13.00.

– Det vert ein reprise av den fyrste framsyninga me hadde i Kjevikjo under Tysnesfest, fortel dagleg leiar for festivalen, Øystein Vaage.

For ti år sidan prøvde Tysnesfest noko nytt då dei hadde framsyning i Kjevikjo. Då kom Helge Jordal og framførte diktet «Terje Vigen», til ros frå det frammøtte publikumet.

Arrangementa i Kjevikjo vart ein tradisjon, men har dei siste åra vore bytt ut med konsert på Solstråleøya. I år er Kjevikjo tilbake på programmet, og det er sjølvaste Helge Jordal som kjem tilbake for å framføra «Terje Vigen» på nytt.


Både prat og song

Ibsen-diktet «Terje Vigen» vart skrive i 1861, og handlar om ein sjømann frå Sørlandet som under napoleonskrigen ror til Danmark for å skaffa mat til familien.

Øystein Vaage fortel at framsyninga til Jordal kjem til å innehalda mykje song og musikk, men at til forskjell frå i 2009, kjem han i år til å ha med seg fullt band.

I tillegg til Helge Jordal, kjem også Stord-gruppa Småsceneri til Kjevikjo. Det er ei teatergruppe som ifølgje seg sjølv driv med improteater, dramatiseringar og visuell kunst og musikk av eit lite kaliber.

– Eg har høyrt mykje skryt av Småsceneri, så eg trur det innslaget vert veldig kjekt, seier Vaage.


Ramnanuten opp

Tidlegare på onsdagen går motbakkeløpet Ramnanuten opp av stabelen for femte gong. Også opplegget frå i fjor med eigen klasse for ungdom opp til 16 år vert vidareført. Det same vert barneløpet for barn opp til ti år, og den eigne mosjonsklassen.

Løpet startar ved SvingenPuls, og deltakarane skal gjennom ei kring 2.600 meter lang løype, som samtidig stig 260 meter, før dei går i mål på Ramnanuten. Barneløpet startar ved same stad, og barna spring til Tysnes kyrkje og attende til SvingenPuls.

I fjor var det Erlend Gjerdevik Sørtveit som vann herreklassen framfor Jørgen Austvik og Johan Løve Gjersvik. Gjerdevik Sørtveit sprang på tida 15.24. I kvinneklassen var det ikkje overraskande løpestjerna Pernilla Epland som var raskast med tida 16.44. Ho vann framfor Ingrid Wergeland og Ingunn Martinsen.

I ungdomsklassene var det Johannes Dalland og Julia Dyrset som brukte kortast tid opp Ramnanuten.


Tentipi

I vår har det vore gjort mykje arbeid med E-brygga, som frå no skal liggja permanent i hamna i Våge. Under Tysnesfest skal store delar av den opne plassen på E-brygga brukast til å setja opp ein tentipi, som er ein slags lavvo-variant av eit partytelt.

I tentipien vert det mykje program gjennom heile festivalen, og det startar allereie med kino for heile familien onsdagen. I år er det «Legofilmen 2» som vert vist onsdag kveld.

Onsdagen består også av generasjonsgudsteneste i Uggdal kyrkje, der småbarn er ekstra velkomne. Frå onsdagen er det også aktivitet ved Årbakka handelsstad, der det gjennom heile Tysnesfest vert open krambu og lokale utstillarar.


MOTBAKKELØP: Ramnanuten opp har vorte eit populært innslag på opningsdagen til Tysnesfest. I fjor var det 56 deltakarar i barneløpet, 53 i konkurranseklassane og 38 i mosjonsklassen. (Arkivfoto: Lena Helvik)
MOTBAKKELØP: Ramnanuten opp har vorte eit populært innslag på opningsdagen til Tysnesfest. I fjor var det 56 deltakarar i barneløpet, 53 i konkurranseklassane og 38 i mosjonsklassen. (Arkivfoto: Lena Helvik)
FOR DEI MINSTE: Generasjonsgudstenesta i Uggdal kyrkje onsdag føremiddag er den aller fyrste programposten under Tysnesfest. For to år sidan fekk barna blåsa såpeboblar i kyrkja. (Arkivfoto: Camilla Korsnes)
FOR DEI MINSTE: Generasjonsgudstenesta i Uggdal kyrkje onsdag føremiddag er den aller fyrste programposten under Tysnesfest. For to år sidan fekk barna blåsa såpeboblar i kyrkja. (Arkivfoto: Camilla Korsnes)

Siste saker Gå til framsida

Fjord1 vil møta tysnespolitikarane

Prosjektdirektør Nils Kristian Berge i Fjord1 set si lit til at politikarane i Tysnes godkjenner søknaden om nytt teknisk bygg på ferjekaien i Våge på neste møte i utval for landbruk/teknisk.

Svindel-e-post florerer

Politiet har fått inn fleire meldingar om svindel-e-post. – Me har mellom anna fått fleire henvendingar frå folk som mottek e-post med vedlagt faktura, frå bedrifter som dei ikkje har vore i kontakt med i det heile tatt, fortel Susann Rosvold, politibetjent ved Tysnes lensmannskontor. – Dette er rein svindel, og viss fleire har opplevd å få ein slik faktura, kan dei sjå bort...