KYRKJEKONSERT: I år er det Marthe Wang som får æra av å runda av Tysnesfest med konsert på Tysnes omsorgssenter og i kyrkja på Onarheim.
KYRKJEKONSERT: I år er det Marthe Wang som får æra av å runda av Tysnesfest med konsert på Tysnes omsorgssenter og i kyrkja på Onarheim.

Marthe Wang avsluttar Tysnesfest

Søndagen vert Tysnesfest tradisjonen tru avslutta med kyrkjekonsert på Onarheim.
Publisert 07.07.2019 kl. 06.00.

Etter ei halv veke med stappfullt festivalprogram og intense kveldskonsertar på Gjerstad, er det som vanleg eit roleg søndagsprogram som avsluttar Tysnesfest. Hovudattraksjonen er konsert i kulturkyrkja på Onarheim, og i år er det bergensartisten Marthe Wang som skal stå for konserten.


«Til deg»

Marthe Wang er relativt fersk som artist, men slo gjennom med debutalbumet «Ut og se noe annet» i 2017. For dette albumet vart ho også nominert til Spelemannprisen i kategorien for viser.

Hennar mest populære låt, «Til deg», har fått mykje speletid på norsk radio, og vart i fjor haust brukt i reklamefilmar av Kirkens Bymisjon i høve TV-aksjonen. «Til deg» har fått mykje god omtale av både kritikarar og andre artistar. Mellom anna har artistkollega Maria Mena uttalt at «Til deg» er ein av dei nydelegaste låtane ho har høyrt på norsk.


Populært arrangement

– Me sel godt med billettar til Marthe Wang-konserten, fortel Øystein Vaage, som er dagleg leiar for Tysnesfest.

Kyrkjekonserten, som dei siste åra har sett namn som Ingebjørg Bratland, Ida Jenshus, Sigvart Dagsland og Karoline Krüger, har vorte eit populært innslag under Tysnesfest, og kyrkja på Onarheim har dei siste åra vore fullsette.

– Eg trur det vert ei fin avslutning på festivalen, seier Vaage.

I tillegg til å spela i kyrkja, tek Wang også turen innom Tysnes omsorgssenter for å syngja for bebuarar og spesielt inviterte.


Åndeleg påfyll

For mange kan søndagen følast som ein ordentleg «dagen derpå» etter fire intense festivaldagar, og som i fjor vert det arrangert «dagen derpå»-gudsteneste i Våge. Derimot vert gudstenesta flytta frå Bermudateltet og ned til Mandelhuset, noko som også gjeld festivalfrukosten alle dagar.

– Frukosten er lik som tidlegare, berre at den er flytta, seier Vaage.

Under gudstenesta vert det musikk med Andre Éide på piano og Nich Hughes på kornett.

«Dagen derpå»-gudstenesta er eit av fleire høve til å skaffa seg åndeleg påfyll gjennom festivalen. På ettermiddagstid torsdag, fredag og laurdag er det mogleg å ta seg ein «pit stop» ved Tysnes bedehus. Her vert det lova eit varmt vitnemål, tid for samtale om viktige spørsmål, og gratis kaffi og vaflar.

I tillegg til dette er det generasjonsgudsteneste i Uggdal kyrkje onsdagen, som startar heile festivalen. Til denne gudstenesta er spesielt småbarn inviterte.


DAGEN DERPÅ: Dei siste åra har sokneprest Marit I. Espedalen hatt gudsteneste i Bermudateltet. I år flyttar «dagen derpå»-gudstenesta seg ned til Mandelhuset. (Arkivfoto: Camilla Korsnes)
DAGEN DERPÅ: Dei siste åra har sokneprest Marit I. Espedalen hatt gudsteneste i Bermudateltet. I år flyttar «dagen derpå»-gudstenesta seg ned til Mandelhuset. (Arkivfoto: Camilla Korsnes)
PAUSE: Denne familien tok seg i fjor ein «pit stop» ved Tysnes bedehus, og gjekk derfrå med flotte ballonghattar. (Arkivfoto: Lena Helvik)
PAUSE: Denne familien tok seg i fjor ein «pit stop» ved Tysnes bedehus, og gjekk derfrå med flotte ballonghattar. (Arkivfoto: Lena Helvik)

Siste saker Gå til framsida

Lesarbrev: Kultur – Språk

Tysnes er ein nynorsk-kommune. Det er derfor med stor undring eg har lese innlegg i avisa frå Tysnes Arbeidarparti sin formann og ordførarkandidat skrive på bokmål på vegner av partiet. Skal ein vera ordførar i Tysnes, må ein kunna uttrykkja seg skriftleg på nynorsk – eventuelt med hjelp frå andre. Kva ein sjølv nyttar privat i skrift og tale, er irrelevant. Avisa 5.9.2019...